Revelation 18 in Yalunka
1 Na danguxina, n mɔn yi maleka gbɛtɛ to godɛ keli kore naxan sɛnbɛ yi gbo, a nɔrɔn dɛgɛn yi bɔxɔn birin yiyalan.
2 A yi a xuini te, a naxa, “Babilɔn taa gbeen bata bira, a bata kala! A bata findi ɲinanne nun yinna ɲaxine birin dɔxɔden na e nun xɔli ɲaxin nun sube haramuxi xɔsixin sifan birin konna.
3 Amasɔtɔ siyane birin bata a yalunyaan dɔlɔ xɔlɛn min. Dunuɲa mangane birin bata yalunyaan liga a xɔn. Dunuɲa yulane bata findi nafulu kanne ra a nafulu kanya gbeen xɔn.”
4 Na xanbi ra, n yi fala xui gbɛtɛ mɛ keli kore, a naxa, “N ma yamana, ɛ keli a yi, alogo ɛ nama basan a yulubine ra, ɛ nun ne yi fitina fena ndee sɔtɔ ɛ bode xɔn.
5 Amasɔtɔ a yulubine bata e malan e bode fari te han kore xɔnna. Ala mi ɲinanxi a fe ɲaxine xɔn ma.
6 Ɛ a saranna fi alo a bonne saranxi kii naxan yi, ɛ a saranna fi a kɛwanle ra dɔxɔde firin. A dɔlɔn saxi igelengenna naxan kui, ɛ na rafe dɔxɔde firin.
7 A binyen nun yɛtɛ yiɲaxunna naxan nagidi a yɛtɛ ma, ɛ na tɔrɔn nun a sɔxɔlɛn ɲɔxɔnna ragidi a ma. Amasɔtɔ a fala nɛn a yɛtɛ ma, a naxa, ‘A mato, n bata findi ɲaxalan mangan na, kaɲa gilɛ mi n na, n mi sunɛ mumɛ!’
8 Na ma, fitina feni itoe birin fama a ma nɛn lɔxɔ kedenni: furen nun sunun nun fitina kamɛna, a mɔn yi woli tɛɛni, a gan. Amasɔtɔ Marigina Ala sɛnbɛn gbo naxan a kitin saxi.”
9 Dunuɲa mangan naxanye luxi yalunyaan nun yɛtɛ yiɲaxunni a xɔn, ne na a ganmatɔɔn tutin to tɛ waxatin naxan yi, e sunuma nɛn, e wuga a fe ra.
10 E gaxuxin yi sa ti wulani a ɲaxankatana fe ra, e yi a fala, e naxa, “Gbalona, gbalona, Babilɔn taa gbeena, taa sɛnbɛ kanna, i ya kitin bata fa i ma sanɲa ma kedenni!”
11 Dunuɲa yulane fan sunuma nɛn, e wuga a fe ra, amasɔtɔ muxu yo mi fa e sare seene sarama sɔnɔn:
12 naxanye findixi xɛmaan nun gbeti fixɛn nun bɔxɔ bun nafunle nun pɛrili gɛmɛ tofaɲin nun taa dugi faɲine nun dugi mamiloxine nun dugi faɲi gbɛtɛ nun dugi gbeele nun wudi faɲi sifane birin na e nun se faɲin sifan birin naxanye rafalaxi sama ɲinna ra, e nun wudi faɲine nun sulan nun wuren nun gɛmɛ faɲi fixɛne,
13 e nun sinamon wudi xiri ɲaxumɛn nun se xiri ɲaxumɛne nun latikɔnɔnna nun mirihi latikɔnɔnna nun wusulanna nun dɔlɔn nun turen nun murutu fuɲin nun murutun nun ɲingene nun yɛxɛɛne nun soone nun wontorone nun konyine nun muxune niine.
14 Yulane yi a fala taan muxune xa, e naxa, “Sare seen naxanye birin xɔli i ma, ne bata tunun, i ya nafunle nun i ya nɔrɔn bata ɲan. E mi fa toma sɔnɔn!”
15 Yulan naxanye nafunla sɔtɔ na taani yulayani, ne sa tima nɛn wulani, amasɔtɔ e bata gaxu a ɲaxankatan yɛɛ ra, e wugama nɛn, e sunu.
16 E yi a fala, e naxa, “Gbalona. Gbalon taa gbeeni ito xa. Na kaane yi maxidixi taa dugi faɲin nin, e nun dugi mamiloxin nun a gbeela e nun xɛmaan nun gɛmɛ tofaɲine.
17 Nafulu gbee sifani ito bata raxɔri sanɲa ma kedenni!” Kunki ragine nun kunki kui muxune nun kunkin walikɛne birin yi sa ti wulani.
18 E gbelegbelema, e yɛɛn tixi a ganmatɔɔn tutin tematɔɔn na, e naxa, “Taa mundun yi maliga taa gbeeni ito ra?”
19 E lu gbangbanna sɛ e xunne yi sununi, e yi lu wugɛ, e sunu, e naxa, “Gbalona, gbalon taa gbeeni ito xa! Kunki kanne birin findixi nafulu kanne ra taani ito nin. A bata raxɔri sanɲa ma kedenni!”
20 Ɛ sɛwa a halagi feen na, ɛ tan naxanye kore xɔnna ma, ɛ tan yama sariɲanxin nun a nabine nun a xɛrane, ɛ fan xa sɛwa. Amasɔtɔ Ala bata a makiti, a yi ɛ xun mafala kitin bolon.
21 Nba, maleka sɛnbɛmana nde yi gɛmɛ gbeen tongo alo se din gɛmɛna a yi a woli fɔxɔ igeni, a naxa, “Babilɔn taa gbeen nawolima ayi kala sɛnbɛ sifani ito nin, a mi fa to sɔnɔn.
22 Konden xuiin nun yenla xuiin nun xulen xuiin nun xɔta xuiin mi fa mɛma ayi sɔnɔn! Walikɛ kesuxi sifa yo mi fa toma ayi sɔnɔn. Se din xuiin mi fa mɛma ayi sɔnɔn!
23 Lɛnpu dɛgɛn mi fa toma ayi sɔnɔn. Ɲaxalandin nun ɲaxalandi kanna xuiin mi fa mɛma ayi sɔnɔn. Na birin bayo ɛ yulane yi findixi dunuɲa sɛnbɛ kanne nan na. Na birin bayo ɛ dunuɲa muxune birin mayenden nɛn ɛ woyimɛya feene xɔn.
24 Alaa nabine nun a yama sariɲanxin wunla minixi Babilɔn taan nin muxun naxanye birin faxa bɔxɔni, ne wunla goronna a tan nan ma.”