Psalm 92 in Yalunka

1 Tantun bɛtina. Sigi sariɲanxina. A xa ba Matabu Lɔxɔni.

2 A lan Alatala yi tantun. Kore Xɔnna Ala, a lan bɛtin xa ba i xa,

3 i ya hinanna fe yi fala xɔtɔn yo xɔtɔn, i ya tinxinna fe yi fala kɔɛ yo kɔɛ,

4 bɛtine yi ba i xa kondenna nun bɔlɔn xuiin na.

5 Alatala, i kɛwanle bata n nasɛwa. N sɛwa bɛtin bama nɛn i ya wanle fe ra.

6 Alatala, i ya wanle gbo de! I miriyane tilin han!

7 Xaxilitaren mi ito kolon. Daxun mi ito famuma.

8 Fa fala, muxu ɲaxin kelima nɛn alo sɛxɛ ɲaxina, fe ɲaxi rabane birin sabatima nɛn, koni habadan halagin nan e yɛɛ ra.

9 Amasɔtɔ i tan Alatala nan feen birin xun na habadan.

10 I yaxune ni i ra, Alatala, i yaxune ni i ra, e halagima! Fe ɲaxi rabane birin xuyama ayi nɛn.

11 I bata n sɛnbɛn gbo ayi alo burunna ɲingena, i yi ture faɲin susan n ma.

12 N na n yɛngɛfane yarabixin toma. N na n yaxune wuga xuiin mɛma.

13 Koni tinxin muxune sabatima nɛn alo tugu binla. E sɛnbɛn gboma ayi nɛn alo suman binle Liban yamanani

14 alo wudin naxanye sixi Alatalaa banxini. E sabatima nɛn en ma Alaa banxini.

15 E mɔn bogima hali e to bata kɔxɔ. E rafexi igen na, e xinde.

16 Na bata Alatalaa tinxinna yita. A tan nan n kantan fanyen na, fe ɲaxi yo mi a tan yi.