Psalm 9 in Yalunka
1 Dawudaa bɛtina, bɛti baane kuntigin xa. A xa ba alo “Dii Xɛmɛ Faxan” bɛtina.
2 Alatala, n ni i tantunma nɛn n bɔɲɛn ma feu! N ni i ya kabanako feene yɛbama nɛn.
3 N ɲaxanma nɛn n sɛwa i ya fe ra. Kore Xɔnna Ala, n tantun bɛtin bama i xa nɛn.
4 N yaxune xɛtɛma e giyɛ nɛn i yɛɛ ra, e dagalanɲɛ ayi, e ɲan.
5 Bayo i bata n xun mayɛngɛ kitin bolon, i bata dɔxɔ i ya mangaya gbɛdɛni, i yi kitin sa tinxinni.
6 I bata falan ti siya gbɛtɛne xili ma, i mɔn yi muxu ɲaxine raxɔri, muxe mi fa e mirima e xinle ma sɔnɔn habadan!
7 Yaxune bata ɲan fefe, i bata e taane kala. Ɲinan bata ti e ma feu!
8 Koni Alatala nan mangan na habadan, a mangaya gbɛdɛn dɔxi kiti sa xinla ma.
9 A dunuɲa makitima tinxinni. A sariya kɛndɛn sama yamane xa.
10 Muxu yigbɛtɛnxine faran makantanxin nan Alatala ra, e luxundena tɔrɔ waxatine yi.
11 Naxanye i tan kolon, ne e yigi sama i yi nɛn, bayo naxan na i fen, Alatala, i mi i mɛ na ra mumɛ!
12 Ɛ Alatala tantun bɛtin na, naxan dɔxi Siyon yi, a manga taani! Ɛ a wali faɲine rali siyane ma!
13 Ala nan wuli bɔxɔnxin gbeeɲɔxɔ tiin na. A mi ɲinanɲɛ a xɔn ma. A yengi dɔxi yiigelitɔne wuga xuiin xɔn ma.
14 Alatala, kininkinin n ma! A mato n yaxune n nayarabima kii naxan yi, i tan naxan n bama faxan dɛ.
15 Nanara, n ni i tantunɲɛ Siyon kaane yɛtagi, n yi sɛwa i ya marakisina fe ra.
16 Siyane bata yinla ge, e bira a kui, e bata e suxu e yɛtɛ luti ratixine ra.
17 Alatala bata a yɛtɛ yita a kiti kɛndɛne xɔn ma. Muxu ɲaxin tan suxuma a kɛwanle nan na.
18 Muxu ɲaxine sigama laxira yi, e nun siyaan naxanye birin e mɛxi Ala ra.
19 Ala mi tɔrɔ muxune rabeɲinɲɛ mumɛ! Yiigelitɔne mi yigitɛgɛma.
20 Alatala, keli! Adamane nama nɔɔn sɔtɔ! Siyane xa makiti i yɛɛ xɔri!
21 Alatala, gaxun nagodo e ma! E xa a kolon fa fala daɲɔxɔn nan tun e ra.