Psalm 68 in Yalunka
1 Dawudaa bɛtina, bɛti baane kuntigin xa. Sigi sariɲanxina.
2 Ala xa keli, a yi a yaxune raxuya ayi. Naxanye a raɲaxuxi, ne yi e gi a bun.
3 E kedi, alo foyen sigama tutin na kii naxan yi. E xa ɲan Ala yɛtagi alo dolen na lo tɛɛni.
4 Koni tinxin muxune xa ɲaxan, e sɛwa Ala yɛtagi. E xa gele ɲaxanni.
5 Bɛtin ba Ala xa, a xinla xa tantun bɛtini. Naxan fama kundani, ɛ na rasɛnɛ! A xili nɛn Alatala. En xa en sɛwa xuini te a yɛɛ ra!
6 Ala naxan a kon sariɲanxini, kiridine fafe na a ra, kaɲa gilɛne xun mayɛngɛn na a ra.
7 Ala denbayaan fima denbayatarene ma, A kasorasane xɔrɔyama, e mini bɛtin bɛ. Koni murutɛ muxune luma bɔxɔ yidunduxin nin.
8 Ala, i to ti i ya yamaan yɛɛ ra, i siga na tonbon yireni.
9 Bɔxɔn yi xuruxurun, koren yi rabi Ala yɛɛ ra, Sinayi Geyana Ala, Isirayilaa Ala.
10 Ala, i tule gbeen nafa nɛn, i ya bɔxɔn mɔn yi xɛtɛ a kiini.
11 I ya yamaan yi dɔxɔ na, I yi yiigelitɔne ki i ya nɛmana fe ra.
12 Marigin bata feni ito xibarun fi, ɲaxalan gali gbeen yi siga a ralideni, e naxa,
13 “Mangane nun sofane e gima! E e gima! Nxu tan ɲaxanle yi yɛngɛ yi se tongoxine yitaxun.
14 Ɛ tan naxanye fan luxi xuruseene dɛxɔn, ɛ a mɛ, Ala a yamaan suturama nɛn alo ganba tofaɲina naxan gabutɛye rafalaxi gbetin nun xɛma faɲin na.”
15 Ala Sɛnbɛ Kanna to na mangane raxuya ayi, e yolon alo balabalan kɛsɛna Geya Fɔrɛn ma.
16 Basan yamanan geyane gbo! Yire matexi wuyaxi e ma.
17 Nanfera ɛ Alaa geya sugandixin matoma xɔxɔlɔnni, Ala yɛtɛɛn dɔxi dɛnaxan yi? Alatala luma dɛnaxan yi habadan!
18 Marigin bata fa a yire sariɲanxini keli Sinayi Geyaan ma e nun a yɛngɛ so wontoro wuli wuli wuyaxi.
19 Marigina Alatala, i bata te kore, muxu suxine biraxi i fɔxɔ ra. I yi kiseene rasuxu adamadiine ra, hali muxu murutɛxine, i yi dɔxɔ na yi.
20 Barikan xa bira Marigin xa lɔxɔ yo lɔxɔ, en ma goronna saxi naxan xun ma, Ala en nakisimana.
21 En ma Ala, Ala na a ra naxan muxune rakisima. En Marigina Alatala na a ra naxan en bama sayani.
22 Ala yatina a yaxune xunne yibɔma nɛn naxanye kankanxi e sɔnne ma.
23 Marigin bata a fala, a naxa, “N fama nɛn ɛ yaxune ra keli Basan yi. N fama e ra nɛn sa keli fɔxɔ igen xɔnna ma
24 alogo ɛ xa ɛ sanne sin e wunli ɛ barene fan yi e wunla kɔn han e wasa.”
25 Ala, nxu bata i ya yamaan famatɔɔn to. I ya yamaan soma yire sariɲanxini i tan n ma Ala nun n ma mangana.
26 Bɛti baane yɛɛn na, maxa se maxane xanbin na, sungutunne wɔsɔwɔsɔnne maxama ne tagi.
27 Barikan bira Ala xa a malan gbeeni. Isirayila bɔnsɔnna birin xa Alatala tantun.
28 Bunyamin bɔnsɔnna, dɔnxɛ ra barin tixi e yɛɛ ra. Yuda bɔnsɔnna mangane fan fama, e sɔnxɔma e nun Sabulon mangane nun Nafatali mangane.
29 Ala, i sɛnbɛn nagodo, i sɛnbɛn mayita, Ala, alo waxati danguxini.
30 I Batu Banxin Yerusalɛn taani, mangane fama kiseene ra i xa na yi.
31 I xa falan ti Misiran bɔxɔn xili ma naxan nun sube xaɲɛn maliga sɛxɛni. Misiran luxi nɛn alo tura ganla siya gbɛtɛne biraxi naxan fɔxɔ ra alo ɲinge diine. E ragodo han e fa mudu gbetin na. Na siya yɛngɛ ralanne raxuya ayi!
32 Xɛrane kelima nɛn Misiran yamanani, Kusi kaane yi e yiine ti Ala xa a maxandideni.
33 Dunuɲa yamanane, ɛ bɛtin ba Ala xa, ɛ Marigin tantun bɛtini.
34 A masiga tima kore xɔnna ma xabu waxati xunkuye. A galan xuiin naminima fangani.
35 Ɛ Ala sɛnbɛna fe rali, a mangayaan nabama Isirayila xun na. A sɛnbɛn kore xɔnna ma.
36 Ala na mini a Yire Sariɲanxini, a magaxu han! Isirayilaa Ala sɛnbɛn fima a yamaan ma nɛn e nun fangana. Barikan xa bira Ala xa!