Psalm 40 in Yalunka

1 Dawudaa bɛtina, bɛti baane kuntigin xa.

2 N diɲa nɛn Alatala maliin legedendeni, a yi a tuli mati, a yi n ma mawuga xuiin mɛ.

3 A n ba yili ɲaxin na, a n ba boron nun bɛndɛni. A yi n ti fanyen fari, a san tide faɲin fi n ma.

4 A yi n xaran bɛti nɛnɛn ma, n na en ma Ala tantunma naxan na. Muxu wuyaxi na toma nɛn e yi gaxu a yɛɛ ra, e mɔn yi e yigin sa Alatala yi.

5 Sɛwan na kanna xa, naxan na a yigi sa Alatala yi, naxan mi kidene batuma, naxan mi a sama suxure batune ma.

6 I ya wali faɲine wuya ayi! Alatala, n ma Ala, i ɲɔxɔn mi na! I bata kabanako fe wuyaxi yitɔn nxu xa! N mi nɔɛ e fe falɛ, e yatɛn bata gbo ayi!

7 I mi waxi saraxan nun kiseen xɔn gbansan, fɔ i n tunle raba ayi. I mi yi saraxa gan daxine nun yulubi xafari saraxane gbansan fɔxɔ ra.

8 Nanara, n naxa, “N tan ni i ra. N bata fa. N ma fe sɛbɛxi Kitabuni.

9 N ma Ala, i sagoon nafan n ma! I ya sariyan namaraxi n bɔɲɛni.”

10 N tinxinyaan nalima nɛn i ya yamani. Alatala, i a kolon, n mi n dundɛ.

11 N mi i ya tinxinyaan namaraxi n kedenna xa. N ni i ya ɲɔndin nun marakisina fe falama nɛn. N mi i ya hinanna nun i ya lannayaan luxunɲɛ yamaan ma.

12 I nama tondi kininkininɲɛ n ma, Alatala. I ya hinanna nun lannayana n marama nɛn waxatin birin.

13 Amasɔtɔ, n ma tɔrɔne bata wuya han e mi yatɛ! N hakɛne bata n suxu, n mi fa se toma. E wuya dangu n xunsɛxɛne ra. Bɔɲɛ yixɔdɛxɛ mi fa n yi sɔnɔn.

14 Yandi, Alatala, n nakisi! Alatala, fa n mali iki sa!

15 Ala xa ne yarabi naxanye katama n faxa feen na, a e yɛ yifu fefe! Ala xa ne raxɛtɛ marafɛyani n ma tɔrɔyaan nafanxi naxanye ma.

16 Ala xa ne ratɛrɛna e yagin na, naxanye a falama n ma, e naxa, “Yɔ! I suxi yati!”

17 Naxanye birin i tan fenma, i xa ne birin nasɛwa. I ya kisin xɔnla naxanye ra, ne xa lu a falɛ, e naxa, “Alatala gbo!”

18 Koni, yiigelitɔɔn nun tɔrɔ muxun nan n tan na. N Marigin nama ɲinan n xɔn. I tan nan n maliin nun n ma maratanga tiin na. Ala, i nama buyɛ ayi.