Psalm 38 in Yalunka

1 Dawudaa bɛtina. Maxandina.

2 Alatala, i nama n maxadi xɔlɔni! I nama fitina n xili ma, i n ɲaxankata.

3 I bata n maxɔlɔ i ya xalimakunla ra. I yi n nabira.

4 Kɛndɛya mi fa n fatini i ya xɔlɔna fe ra. N gbindin mi yalan n yulubina fe ra.

5 N hakɛne bata gbo ayi n xun ma han a radangu ayi, alo goronna naxan binya n mi a nɔɛ.

6 N ma korone bata kun, e xirin yi mini. Amasɔtɔ daxun nan yi n na nun.

7 N bɔɲɛn bata kala han n yi n xun sin. N lu wugɛ n bɔɲɛni fɛriɲɛn gbɛn!

8 N fatin birin wolonxi n ma kati! Kɛndɛya yo mi fa n fatini.

9 N bata yelefu bɔxɔn ma, n bata kala feu! N bɔɲɛn tɔrɔxi, n kutunma, amasɔtɔ n sɔxɔlɛxi.

10 Marigina, n naxan fenma, i na kolon. I bata n kutun xuiin birin mɛ.

11 N bɔɲɛn dinma, n fangan bata ɲan. N yɛtagin bata yitɔɲɔn.

12 N xɔyine nun n dɔxɔ bodene mi fa fama n fɛma amasɔtɔ n ma furen xɔn. Hali n kon kaane bata e makuya n na.

13 Naxanye waxi n faxa feni, ne bata lutin nati n yɛɛ ra. Naxanye waxi n maxɔlɔ feni, ne n kala feen falama. E mi xadanma fe ɲaxi yitɔndeni.

14 N bata liga alo tuli xɔrina, n mi fe mɛma. N bata liga alo bobona, n mi fala tima.

15 N bata liga alo muxun naxan mi yabin tiyɛ amasɔtɔ a mi fe mɛma.

16 Koni Alatala, n xaxili tixi i tan na. I n yabima nɛn, Marigina n ma Ala.

17 N naxa, “I nama tin n yaxune yi e xunnayeren n na, e nama ɲaxan n ma tɔrɔn na.”

18 N biramatɔɔn na a ra. N xɔlɛni waxatin birin.

19 N bata n ti n hakɛne ra, n yulubine bata n naxamin kati!

20 N yaxune tan kɛndɛ, e yixɔdɔxɔ. E wuya naxanye n naɲaxuxi fuu!

21 Naxanye fe faɲin saranma fe ɲaxin na, ne n tɔrɔma, amasɔtɔ n tan a faɲin nan fɔxɔ ra.

22 Alatala, i nama n nabeɲin. N ma Ala, i nama i makuya n na.

23 N Marigina, n nakisimana, n mali iki sa!