Psalm 37 in Yalunka

1 Dawuda gbeena. I nama xamin muxu ɲaxine ra. I nama i sa fe ɲaxi rabane ma.

2 E tununma nɛn xulɛn alo sɛxɛ xarena. E faxama nɛn alo si seen naxan bata lisi a ra.

3 I yigin sa Alatala yi, i yi fe faɲin naba. Nayi, i luyɛ yamanani nɛn, i yi sabati bɔɲɛ xunbenli.

4 I xa sɛwa Alatala yi nanara a i bɔɲɛn waxɔn feene ligɛ i xa.

5 Bira Alatalaa kiraan nan xɔn. I yigin sa a yi. Nanara a i maliyɛ.

6 I ya tinxinyaan nun sariya suxun makɛnɛnma nɛn a tan barakani alo yanyi tagi sogena.

7 I xa diɲa, i Alatala legeden. I nama xamin na muxune ra naxanye sabatima, naxanye e fe yitɔnxine rasɔnɔyama a ɲaxin na.

8 I nama xɔlɔ, i nama fitina, i nama xamin. Ne i birama tɔrɔni nɛn.

9 Muxu ɲaxine ɲanma nɛn, koni naxanye e yigin sama Alatala yi, bɔxɔn luma ne nan xa.

10 A mi buma muxu ɲaxine yi tunun. Ɛ ɛ yɛɛ rakoɲinma e ma nɛn, koni ɛ mi e toɛ.

11 Naxanye limaniyaxi, bɔxɔn luma ne xa nɛn, e yi sabati, e bɔɲɛ xunbenla sɔtɔ.

12 Muxu ɲaxin fe ɲaxin nan yitɔnma tinxin muxun xili ma, a a ɲinne raxin a xili ma.

13 Koni Marigin gelema muxu ɲaxine ma, amasɔtɔ a a kolon, e fitina lɔxɔn mi fa buma.

14 Muxu ɲaxine bata e silanfanne botin, e e xanle ba, e xa yiigelitɔne nun tɔrɔ muxune yɛngɛ, e xa muxu faɲine faxa.

15 Koni, e sɔxɔnma e gbee silanfanne nan na. E xanle yi gira.

16 Se xurin naxan tinxin muxun yii, na fisa muxu ɲaxine bannayaan xa.

17 Amasɔtɔ muxu ɲaxine sɛnbɛn kalama nɛn, koni Alatala tinxin muxune ratangama nɛn.

18 Alatala yengi dɔxi sɔntarene xɔn. E kɛɛn luma nɛn habadan.

19 E mi tɔrɛ waxati xɔdɛxɛne yi. Fitina kamɛn na so, e tan lugoma nɛn.

20 Koni muxu ɲaxine faxama nɛn. Alatala yaxune yi tunun alo xɛɛn fugene. E lɔma ayi nɛn alo tutina.

21 Muxu ɲaxin donla tongoma nɛn, a mi a fiyɛ. Koni tinxin muxun kiin tima fonisireyaan nin.

22 Ala naxanye barakama, bɔxɔn luma ne xa nɛn. Koni a naxanye dangama, ne ɲanma nɛn.

23 Alatala nan muxun sigati kiin nagidima a lu na kiraan xɔn naxan nafan a ma.

24 Xa a dagalanɲɛ ayi, a mi birɛ, amasɔtɔ Alatala a malima.

25 Dii mɛsɛn nan yi n na, koni iki n bata fori. N siin bata waxati xunkuye sɔtɔ. Koni n munma tinxin muxun nabeɲinxin to singen, hanma a diine yi donseen maxandi.

26 A kiin tima fonisireyaan nan na waxatin birin yi, a mɔn bonne dolima. Dubana a diine xa.

27 Ɛ xun xanbi so fe ɲaxini, ɛ fe faɲin naba, nanara i mamandenne luyɛ bɔxɔn ma habadan!

28 Amasɔtɔ sariya suxun nafan Alatala ma. A mi a muxu tɔgɔndiyaxin nabeɲinɲɛ. A a kantanma nɛn habadan. Koni muxu ɲaxine mamandenne tan ɲanma nɛn.

29 Tinxin muxune bɔxɔn sɔtɔma nɛn alo kɛɛna, e lu na yi habadan.

30 Tinxin muxun xaxilimaya falane nan tima. Sariyan nan a falan na.

31 A Alaa sariyan namarama a bɔɲɛni nɛn. A mi tantanma a fe yi mumɛ!

32 Muxu ɲaxin tinxin muxun legedenma a faxa feen nan na.

33 Koni Alatala mi a luyɛ a yaxune sɛnbɛn bun ma. A mi tinɲɛ a yalagi feen ma, a na kiti waxatin naxan yi.

34 Ɛ ɛ xaxili ti Alatala ra, ɛ yi lu a kiraan xɔn. A ɛ yitema nɛn, a yamanan so ɛ yii. Ɛ a toma nɛn nayi muxu ɲaxine bata ɲan.

35 N yi muxu ɲaxina nde kolon nun, gbalotɔɔn nan yi a ra naxan bata yi sabati alo wudi gbeena.

36 Koni a danguxi nɛn, a lɔ ayi feu! N yi a fen, koni n mi a to.

37 I xaxili lu sɔntaren xɔn. I yɛɛn sa muxu faɲin xɔn. Bɔɲɛ xunbelitɔɔn mayixɛtɛne sɔtɔma nɛn.

38 Koni yulubi kanne kalama nɛn feu! E bɔnsɔnna birin yi raxɔri.

39 Alatala tinxin muxune rakisima nɛn. E yigiya makantanxin nan a tan na tɔrɔ waxatine yi.

40 Alatala e malima nɛn a e ratanga. A e ratanga muxu ɲaxine ma nɛn, a e rakisi, amasɔtɔ e luxunxi a yi.