Psalm 18 in Yalunka

1 Alatalaa walikɛɛn Dawudaa bɛtin bɛti baane kuntigin xa. A bɛtini ito baxi nɛn Alatala to a ba a yaxune birin yii e nun Sɔli yii.

2 Alatala n fangana, n bata i xanu!

3 Alatala nan n kantan fanyen na, n ma yinna, n xunba muxuna. N ma Ala nan n kantan gɛmɛ gbeen na, n na n luxunma naxan yi. A tan nan n yɛ masansan wure lefaan na, e nun marakisi tiina naxan luxi alo n ma faran makantanxina.

4 Alatala xa tantun! N na a xili, a yi n nakisi n yaxune ma.

5 Sayaan gbalon bata yi n nabilin nun, halagin bata yi lu n xun ma nun alo ige xunfanna.

6 Laxira gbalon bata yi n nabilin nun. Bilinganna bata yi a lutin nati n yɛɛ ra nun.

7 N na Alatala xili nɛn n ma tɔrɔni, n yi n xuini te n ma Ala ma malina fe ra. A yi n xuiin mɛ a Batu Banxini, a yi a tuli mati n gbelegbele xuiin na.

8 Nanara, bɔxɔn yi xuruxurun, a yimaxa, geyane bunne yi siga, e xɛtɛ, e xuruxurun Ala xɔlɔn bun.

9 A liga alo tutin nan minima a ɲɔɛ yinla ra. Halagi ti tɛɛ dɛgɛn nun tɛɛ wolonne yi mini a dɛ.

10 A yi kuyeni bɔ firinna ra, a godo a sanne tixi kunda fɔrɛn fari.

11 A te maleka gubugubu kanna fari, a tugan xulɛn, a siga foyeni.

12 A a luxun dimini, kunda fɔrɛn nun tule igen yi a rabilin kore.

13 Kundaan yi mini a nɔrɔni. Balabalan kɛsɛne nun galanna yi godo.

14 Alatala yi a galanna xuiin namini keli kore, Kore Xɔnna Ala yi a xuiin namini.

15 A yi a xalimakunle woli a yaxune ma a e raxuya ayi. A e birin nagi kuye sarinna ra.

16 Alatala to falan ti e xili ma, a sɔnxɔ e ma xɔlɔni, fɔxɔ igen xɔnna yi mini kɛnɛnni bɔxɔ xɔnne yi to.

17 Ala yi a yiini bandun keli kore, a n suxu, a yi n ba igen tilin yireni.

18 A n xunba n yaxu sɛnbɛ kanne yii, n yɛngɛfaan naxanye fangan yi gbo n xa nun.

19 E n yɛngɛ nɛn, n yi gbaloni waxatin naxan yi, koni Alatala yi n natanga.

20 A n ba nɛn gbalo yireni, a n nakisi amasɔtɔ n tan a kɛnɛnxi.

21 Alatala bata n kɔntɔnna fi n ma tinxinyani, a n saren fi amasɔtɔ n kɛwanle sariɲan.

22 N bata sigan ti Alatala a kirane xɔn, n mi n makuyaxi Ala ra.

23 N bata a kitine birin suxu, n mi tondixi a tɔnne suxɛ.

24 Fɛ yo mi n na a yɛɛ ra yi, bayo n bata n yɛtɛ ratanga hakɛn ma.

25 Nanara, Alatala bata n kɔntɔnna fi n ma amasɔtɔ n tinxin, n kɛwanle sariɲan a yɛɛ ra yi.

26 Naxan na tinxin i xa, i tinxinma nɛn na kanna xa. Fɛ yo mi naxanye ra, i ya fɛtareyaan yitama nɛn ne ra.

27 I sariɲanma nɛn ne xa naxanye na sariɲan, koni i ɲaxuma nɛn na muxune ra naxanye ɲaxu.

28 Bayo i tan nan yiigelitɔne rakisima, i mɔn yi wasodene ragodo.

29 Alatala, i tan nan kɛnɛnna fima n ma, n ma Ala, i yi n ba dimini.

30 N ganla yɛngɛma nɛn i tan barakani. I tan yi, n tuganma yinna xun ma.

31 Alaa kirane kamalixi feu! Alatalaa falane tinxin. Naxanye na e luxun a yi, a ne kantanma nɛn alo wure lefana.

32 Alatala nan keden Ala ra. Nde en kantan fanyen na, ba en ma Ala ra?

33 A tan nan Ala ra naxan fangan fima n ma naxan n kantanma kira yi.

34 A n sanne sɛnbɛ soma nɛn alo xɛnla, a n nate geyane fari.

35 A bata n maxaran yɛngɛn ma, nanara n nɔxi sulan xali xɔdɛxɛn bandunɲɛ.

36 I bata n yɛ masansan wure lefaan so n yii, i yi n nakisi. I bata i yengi sa n xɔn ma, i ya maliin bata n nagbo.

37 I kirani tɔn n xa alogo n nama bira.

38 Koni n biraxi n yaxune fɔxɔ ra, n yi e suxu. N mi xɛtɛ e fɔxɔ ra han e ɲan.

39 N na e rabirama nɛn han e mi fa kelɛ sɔnɔn, e yi bira n sanna bun ma.

40 I sɛnbɛn soma n yii yɛngɛ so feen nan na, i n yaxune sa n bun ma.

41 I a liga n yaxune yi e gi n bun ma, n bata ne kala naxanye yi n naɲaxuma.

42 E wugama nɛn malina fe ra, koni muxu yo mi e rakisɛ. E Alatala xilima nɛn koni a mi e yabima.

43 N na e yilunburunma nɛn alo gbangbanna foyen sigama naxan na. N mɔn yi ti e fari alo bɛndɛna kiraan xɔn.

44 I bata n natanga yama murutɛxin ma, i yi n findi siyane xunna ra. N mi yi muxun naxanye kolon, n bata nɔɔn sɔtɔ ne xun na.

45 Xɔɲɛne e xinbi sinma n bun ma iki, e na n fala xuiin mɛ, e yi a suxu.

46 E yii xudin tuma ayi, e fa xuruxurunɲɛ keli e yinne ra.

47 Alatala na yi! Tantunna xa fi n natangamaan ma! N nakisimana Ala xa batu!

48 A tan Ala nan n gbeen ɲɔxɔma, naxan siyane luma n sɛnbɛn bun ma.

49 A n natangama n yaxune ma. I tan nan n natexi n yaxune xun ma, i mɔn yi n xunba gbalotɔne yii.

50 Nanara, n na i tantunma siyane tagi. Alatala, n na i xinla tantunma nɛn bɛtini.

51 Ala nɔ sɔtɔn nagidima a mangan ma han! A a hinanna yita a muxu sugandixin na, Dawuda nun a yixɛtɛne habadan.