Psalm 148 in Yalunka

1 Tantunna Ala xa! Ɛ tan naxanye kore xɔnna ma, ɛ Alatala tantun. Ɛ tan naxanye kore, ɛ a tantun.

2 Ɛ tan a malekane birin xa a tantun. Ɛ tan a ganla birin, ɛ a tantun.

3 Sogen nun kikena, ɛ a tantun. Ɛ tan saren naxanye yilenma, ɛ a tantun.

4 Ɛ a tantun, ɛ tan naxanye ariyanna yi, e nun ɛ tan igen naxanye kore walaxan fari.

5 Ɛ Alatala xinla tantun! Amasɔtɔ e daxi a yamarin nan bun ma.

6 A yi e ti e funfuni habadan han habadan. A yi yamarin fi naxan mi matandɛ mumɛ.

7 Ɛ Alatala tantun bɔxɔ xɔnna fari, ɛ tan ige yi sube magaxuxine, ɛ tan fɔxɔ igen tilinne,

8 kuye sarinna, balabalan kɛsɛna, kundaan nun ige xundina, foye gbeen naxan a falan suxu,

9 ɛ tan geyane nun yire matexine, wudi bogilane nun sumanne birin,

10 burunna subene nun xuruseene, xɔline nun bubu seene,

11 bɔxɔn mangane nun siyane birin, ɛ tan kuntigine nun kitisaan naxanye birin bɔxɔn ma,

12 banxulanne nun sungutunne, xɛmɛ fonne nun dii ɲɔrɛne,

13 ɛ birin xa Alatala xinla tantun! A xili keden peen nan binyaxi. A tan nan nɔɔn nabama bɔxɔn nun koren xun na.

14 A bata a tɔgɔndiya muxune sɛnbɛ so. Isirayila muxune rafan a ma han! Tantunna Alatala xa!