Psalm 146 in Yalunka
1 Tantunna Ala xa! N xa Alatala tantun n niini fefe!
2 Fanni n na n nii ra, n na Alatala tantunma nɛn. Fanni n daxi, n na n ma Ala tantunma nɛn bɛtini.
3 Ɛ nama ɛ yigi sa mangane yi, adamadiine nan ne ra. Ɛ rakisi fɛrɛ yo mi ne xa.
4 E na faxa, e xɛtɛma nɛn bɛndɛni. E fe yitɔnxine birin kalama na lɔxɔn yɛtɛɛn nin.
5 Sɛwan na kanna xa, Yaxubaa Ala muxun naxan malima, naxan a yigin sama Alatala yi, a Ala.
6 A tan nan ariyanna nun dunuɲa daxi e nun e yi seene birin. A tinxinyaan luma nɛn han habadan.
7 A tan nan kiti kɛndɛn sama muxu ɲaxankataxine xa, a donseen so kamɛtɔne yii. Alatala nan kasorasane xunbama.
8 Alatala nan danxutɔne yɛɛne rabama ayi. A tan nan muxu mafelenxine rakelima. Tinxin muxune rafan Alatala ma.
9 Alatala nan xɔɲɛne kantanma. A kaɲa gilɛne nun kiridine mali. Koni a muxu ɲaxine fe yitɔnxine kalama nɛn.
10 Alatala nan habadan mangan na. Siyon, a tan nan i ya Ala ra habadan han habadan. Tantunna Ala xa!