Psalm 109 in Yalunka
1 Dawudaa bɛtina, bɛti baane kuntigin xa. Ala, n naxan tantunma, i nama lu dunduxi!
2 Amasɔtɔ muxu ɲaxine nun wuledene n mafalama. E wulene sama n xun ma.
3 E mɔn fala ɲaxine tima lan n ma. E n yɛngɛma na kiini fuu!
4 N tan e xanuxi, e tan n tɔɲɛgɛma. Koni n tan Ala maxandima.
5 E n ma fe faɲin saranma fe ɲaxin na, e n ma xanuntenyaan saran xɔnnantenyaan na.
6 E a falama n ma e naxa, “Gbalo feen xa sa a xun ma, muxuna nde yi a tɔɲɛgɛ.
7 A na makiti, a yi yalagi. A Ala maxandi xuine yi yatɛ hakɛn na.
8 Ala xa a siin ɲan mafurɛn, muxu gbɛtɛ yi a tiden tongo.
9 Ala xa a diine findi kiridine ra, a ɲaxanla yi findi kaɲa gilɛn na!
10 Ala xa a diine findi sigatine nun xandi tiine ra, e yi makuya e banxi xɔnne ra.
11 Ala xa a doli faan siga a yii seene birin na, xɔɲɛne yi a wali xɔnne birin tongo.
12 Ala xa muxe nama fa hinan a ra sɔnɔn, hanma muxe yi e yengi dɔxɔ a kiridine xɔn ma.
13 Ala xa a yixɛtɛne birin halagi, e xinle yi lɔ ayi habadan.
14 Alatala xa a xaxili lu a benbane hakɛne xɔn ma. Alatala nama a nga yulubine xafari mumɛ!
15 Alatala xa a yengi lu e hakɛne xɔn ma waxatin birin, koni Ala xa ɲinan xa ti e fe xɔn ma fefe!
16 Bayo xɛmɛni ito mi findixi hinanten na a yi yiigelitɔne nun tɔrɔ muxune ɲaxankatama, han a yi muxu sunuxin faxa.
17 Danga tiin yi rafan a ma, Ala xa ne raxɛtɛ a ma. A mi yi rafan a ma a xa duba muxe xa, Ala xa duban masiga a ra.
18 A yi rabilinxi a danga xuine ra alo a dugina. Ala xa a gbee dangana a li alo igena a fatin ma, e nun alo turena a xɔnne yi.
19 A dangane xa lu a fari alo a dugina a ma. E lu a ma waxatin birin alo a tagi xidina.”
20 Alatala xa n tɔɲɛgɛ muxune saran na kii nin e nun naxanye n mafalama.
21 Awa, Marigina Alatala, n mali i xili binyena fe ra. Amasɔtɔ i ya hinanna gbo, n xunba.
22 Yiigelitɔɔn nun tɔrɔ muxun nan n na, n niin sunuxi.
23 N tununmaan ni i ra alo nininna ɲinbanna ra. E n kedima alo suɲɛna.
24 N xinbi xudine bata tuyɛ ayi sun suxuni. N bata doyen, n xɔsi.
25 E na n to, e yi e xunni maxa, e n magele.
26 Alatala n ma Ala, n mali, i n nakisi i ya hinanni,
27 alogo e xa a kolon a i tan Alatala nan na ligaxi i sɛnbɛni.
28 E tan n dangama nɛn, i tan yi barakan sa n ma fe yi. E na keli n xili ma, e yagima nɛn, n tan, i ya walikɛɛn yi sɛwa.
29 Ala xa n tɔɲɛgɛ muxune yalagi. Ala xa yagin so e xunna alo dugina.
30 N nan n xuini tema nɛn, n na Alatala tantun han! N yi a matɔxɔ yamani.
31 Amasɔtɔ a keli nɛn a ti tɔrɔ muxun xɔn, a yi a rakisi a yalagi muxune ma.