Psalm 104 in Yalunka
1 N xa Alatala tantun n niin birin na! Alatala n ma Ala, i tan gbo de! I tan marabɛri baxi nɔrɔn nun gboon nan na.
2 A bata a yɛtɛ rabilin kɛnɛnna ra alo doma gbeena. A yi kore xɔnna yifulun alo sɛnkɛna.
3 A bata a banxin ti igene fari kore xɔnna ma, a yi kundane findi a masiga ti wontoron na, a sigan tiin foyen nin.
4 A foyen findi a xɛraan na, a tɛɛn findi a walikɛɛn na.
5 A bɔxɔn bɛtɛn sa ki faɲi. A mi yigisanɲɛ mumɛ.
6 I bata tilinna radin bɔxɔn ma alo domana, igene yi te han geyane xuntagi.
7 Koni e yi e gi i ya xɔlɔn bun, e yi e gi i ya galanna xuiin ma.
8 E yi godo lanbanne yi keli geyane ma, han i yiren naxan yitɔnxi e xa.
9 I yi naninna sa e mi danguɛ naxan na mumɛ, alogo e nama fa sa bɔxɔn xun ma.
10 I tigi igene ragima xude wunle xɔn dangu geya longonne ra.
11 Burunna subene birin fa e minma mɛnna nin, burunna sofanle fan yi fa min xɔnla ba na yi.
12 Xɔline e tɛɛne sama xude dɛɛn nin, e yi sɔnxɔɛ wudine kɔɛ ra.
13 A yi tulen nafa geyane fari keli kore, i kɛwanle yi bɔxɔni li.
14 A yi sɛxɛn namini xuruseene xa, e nun sansine muxune xa, alogo e xa balon sɔtɔ bɔxɔni,
15 e nun manpaan naxan e rasɛwama, e nun turen naxanye e fatin nayabuma ayi, e nun donseen naxanye e sɛnbɛ soma.
16 Hali Alatalaa wudi binle fan igen sɔtɔma e makoon naxan ma, Liban yamanan suman wudine Ala naxanye sixi.
17 Xɔlidine e tɛɛne sama mɛnna nin. Xɔli xungbene fan yi e tɛɛne sa na fɔfɔ binle yi.
18 Xɛnle fan luma geya matexine fari, fanye ra siine yi e luxun gɛmɛ yinle ra.
19 I bata kiken da waxatine yatɛ feen na. Sogena a godo waxatin kolon.
20 I dimin da alogo kɔɛɛn xa so, burunna subene birin e masiga tima waxatin naxan yi.
21 Yata sɛnbɛmane wurundunma e balon fendeni e e balon maxɔdinma Ala ma.
22 Sogen na te waxatin naxan yi, e mɔn yi xɛtɛ, e sa e sa e yinle ra.
23 Nayi, muxune yi mini, e siga e wanle ra han ɲinbanna ra.
24 Alatala, i kɛwanle gbo, I ne birin daxi fe kolonna nin. Bɔxɔn nafexi i ya dali seene nan na.
25 Fɔxɔ igen mato, a gbo. Niimaseen sifan birin a yi, a xurin nun a xungbena, naxanye mi nɔɛ yatɛ kɔnin.
26 Kunkine sigama a tan nan xun ma. E nun ige yi sube magaxuxine i naxan daxi alogo e xa sabaan so a yi.
27 E birin yengi i tan nan ma donse feen na, e makoon na bira a ma waxatin naxan yi.
28 I donseen soma e yii nɛn, e yi a don. I donseen so e yii han e yi wasa.
29 I na i xun xanbi so, e yigitɛgɛ. I na e niin ba, e yi faxa. E xɛtɛ bɛndɛni e kelixi dɛnaxan yi.
30 Koni i na niin bira e yi waxatin naxan yi, e da, seen birin yi findi a nɛnɛn na bɔxɔn fari.
31 Alatalaa binyen xa lu habadan! Alatala xa sɛwa a kɛwanle fe ra!
32 Ala na bɔxɔn mato, a xuruxurun. A na a yiin din geyane ra, e tutin yi mini.
33 Fanni n nan n nii ra, n bɛtin bama nɛn Alatala xa. N tantun bɛtin bama n ma Ala xa nɛn n siin birin yi.
34 N ma bɛtin xa a kɛnɛn. Amasɔtɔ n ma sɛwan kelima Alatala nin.
35 Ala xa yulubi kanne ɲan bɔxɔni. Ala xa muxu ɲaxine ratunu. N xa Alatala tantun n niin birin na! Tantunna Ala xa!