Proverbs 5 in Yalunka

1 N ma diina, n ma fe kolonna fe liga i yeren ma, i tuli mati n ma xaxilimaya falane ra

2 alogo i xa feene yɛ fen, i lu falan tiyɛ fe kolonni.

3 Yalunden ɲaxanla fala xuiin ɲaxun nɛn alo kumina, a fala xuine masalaxun alo turen fatin ma.

4 Koni dɔnxɛn na, se xɔlɛn nan na ɲaxanla ra alo mɛnla, a maxɔlɔn tima nɛn alo silanfan dɛ firin kanna.

5 A sigati kiin sa tixi sayaan nan ma, a tinxinxi gaburun nan na.

6 A mi tima siimayaan kiraan xɔn, a bata tantanna kiraan tongo, anu a mi a kolon.

7 N ma diina, nayi n xuiin namɛ, i nama n fala xuine rawoli ayi.

8 Siga kiraan xɔn naxan makuya na ɲaxalan sifan na i nama i maso a banxin dɛɛn na

9 alogo i nama i ya binyen nadangu muxu gbɛtɛne ma, kininkinintaren yi i ya siimayaan kala

10 muxune yi lugo i ya nafunla ra, i ya wanla tɔnɔn yi lu muxu gbɛtɛ xa.

11 Dɔnxɛn na, i fatin na xunna kala, i fasa, i lu kutunɲɛ,

12 i a falama nɛn, i naxa, “A mi yi rafan n ma nun muxun xa n xuru, naxan na yi n sɔnna fala, na yi raɲaxuma n bɔɲɛn ma nɛn han!

13 N mi yi n karamɔxɔne falane ramɛma, n mi yi n tuli matima e xaranna ra.

14 Iki, n bata fa raɲan a ɲaxin na mafurɛn yamaan birin yɛtagi.”

15 Igen min naxan namaraxi i konni naxan minima i yɛtɛ gbee xɔɲinna ra.

16 I nama lu i gbee tigi igen naxuyɛ ayi taa yi kirane xɔn a din yamaan malandene ra.

17 A xa findi i kedenna gbeen na! Ɛ nun muxu gbɛtɛye nama a taxun i mi naxanye kolon.

18 Ala xa barakan sa i ya tigina fe yi, i yi sɛwa na ɲaxanla xɔn i naxan dɔxɔ i ya foningeya waxatini

19 naxan nayabu alo xɛnla, a fan alo bolena. I wasa so a tan nin waxatin birin. A marafanna nama ba i rasɛwɛ mumɛ!

20 N ma diina, nanfera gbɛtɛ a ɲaxanla xɔnla i suxuma? Nanfera i marafanna fenma ɲaxalan gbɛtɛ ra i mi naxan kolon?

21 Amasɔtɔ Alatala muxun birin sigati kiin toma, a kɛwanle birin nakɔrɔsima.

22 Muxu ɲaxin kɛwali ɲaxine nan a suxuma a yulubine yi a xidi alo lutina.

23 Naxan mi nɔɛ a yɛtɛ xurɛ, na a yɛtɛ faxama nɛn. A daxuya gbeena a ralɔma ayi nɛn.