Proverbs 4 in Yalunka

1 N ma diine, ɛ n tan fafana maxuru falane ramɛ. Ɛ liga ɛ yeren ma alogo ɛ xa xaxilimayaan kolonna sɔtɔ.

2 N yi n ma fe kolon kɛndɛn so ɛ yii. Ɛ nama n ma xaranna woli ayi.

3 N yi n baba konni waxatin naxan yi, n nga n nafan nɛn han alo dii kedenna.

4 N baba yi n xaranma ikiini, a naxa, “N ma falane ramɛ ki faɲi, i n ma yamarine suxu, alogo i xa kisi.

5 Fekolonna nun xaxilimayaan fen, i nama ɲinan n ma falane xɔn. I nama ne sese xɔn beɲin.

6 I nama fekolonna rabeɲin, a i kantanma nɛn, a xa rafan i ma, a i ratangama nɛn.

7 Fekolonna fɔlɔn findixi xaxili fenna nan na. Hali i sɔtɔ seene birin fi, alogo i xa xaxilimayaan sɔtɔ.

8 Fekolonna ramara, a i findima nɛn muxu gbeen na, i yii firinna dɔxɔ a bun, a binyen fima i ma nɛn.

9 A luma nɛn alo i xunna na maxidi hinanna ra, alo manga kɔmɔti mayilenxin na so i xun na.”

10 I tuli mati n ma diina, i tin n ma falan ma, i ɲɛɛ wuyaxi sɔtɔma nɛn i ya siimayaan na.

11 N bata i xaran fe kolonna kiraan ma, n na i matinxinma sigati ki tinxinxin ma.

12 Nayi, i sanna mi raxidɛ siga tideni, i mi birɛ i gideni.

13 I xurun naxan sɔtɔxi, na ramara, kankan a ma amasɔtɔ i ya siimayaan binla na a ra.

14 I nama ti muxu ɲaxine kiraan xɔn, i nama bira fe ɲaxi rabane fɔxɔ ra.

15 I masiga e kiraan na. I nama dangu a xɔn. A matanga, i dangu yire gbɛtɛ.

16 Muxu ɲaxin mi nɔɛ xiyɛ, xa a mi fe ɲaxin liga. Xixɔnla a gima e ma nɛn, xa e munma muxun nabira.

17 Amasɔtɔ e baloma fe ɲaxin nan na, gbalon nafan e ma alo e na dɔlɔn min.

18 Tinxin muxune sigati kiin fixa alo kuye yi yalanna subaxani, kɛnɛnna naxan sigan minɛ han yanyin yi dɛfe.

19 Koni muxu ɲaxine sigati kiin findixi dimin nan na. E mi na seen toma naxan e rabirɛ.

20 N ma diina, n ma falane fe liga i yeren ma i yi i tuli mati n xuiin na.

21 I nama ɲinan e xɔn, koni e ramara i bɔɲɛni.

22 Naxanye birin e sɔtɔma e siimayaan nun kɛndɛyaan nan fima ne ma.

23 I bɔɲɛn suxu dangu seen birin na, amasɔtɔ siimayaan binla nan na ra.

24 I dɛɛn natanga wulen ma, i dɛɛn nama yanfa falane ti.

25 I yɛɛn xa lu tixi i yɛɛ ra, i matoon ti tinxinni i yɛtagi.

26 I dangu kirani tɔn, a yɛlan, i xa siga kira kɛndɛne nan tun xɔn.

27 I nama kiraan fata yiifanna ma hanma kɔmɛnna ma. I masiga fe ɲaxin na.