Proverbs 29 in Yalunka
1 Muxun naxan tondin maxadi xuine suxɛ, na halagima nɛn mafurɛn, a mi yɛlanɲɛ.
2 Xa tinxin muxune wuya, yamaan sɛwama nɛn. Xa muxu ɲaxine nɔɔn sɔtɔ, yamaan wugama nɛn.
3 Fe kolonna rafan muxun naxan ma na a baba rasɛwama nɛn. Koni naxan biraxi yalundene fɔxɔ ra, na bɔnɔma nɛn a sɔtɔ seene yi.
4 Mangana a yamanan nasabatima kiti kɛndɛn nan xɔn, koni naxan dimi yi seene rasuxuma mayifuni, na a kalama nɛn.
5 Naxan na a adamadi boden matɔxɔ wuleni, na lutin nan natima a sanna bun.
6 Muxu ɲaxina matandine findixi luti ratixin nan na a xa, koni tinxin muxuna a sɛwa xuini tema nɛn.
7 Tinxin muxun sɛnbɛtarene xun mayɛngɛ kitine kolon. Koni muxu ɲaxin mi na xaxinla sɔtɔma.
8 Magele tiine taani maxama nɛn, koni fekolonne xɔlɔn nan naxunbelima.
9 Fekolonna nun xaxilitaren na so kitini, xa a xɔlɔ hanma xa a gele, a mi xaxili sa sɔtɔma.
10 Sɔntaren mi rafan faxa tiin ma, koni muxu faɲine sɔntaren niin nakantanma nɛn.
11 Xaxilitarena kui feene birin falama nɛn, koni fekolonna tan e ramarama nɛn.
12 Mangan na a tuli mati wule falane ra, a kuntigine birin findima muxu ɲaxine nan na.
13 Yiigelitɔɔn nun ɲaxankata tiin naralan fe kedenna ma, Alatala nan e firinna birin yɛɛne rabima.
14 Mangan naxan sɛnbɛtarene makitin lannayani, na mangayaan luma sabatɛ nɛn han habadan.
15 Bosaan nun maxadi falane nan fe kolonna fima diin ma koni diin naxan luxi a yɛtɛ ma, na a nga rayagima nɛn.
16 Muxu ɲaxine na wuya ayi, hakɛn nan gboma ayi. Koni tinxin muxune ne biraden toma nɛn.
17 I na i ya diin xuru, a bɔɲɛ xunbenla fima i ma nɛn, a nii yifanna fi i ma.
18 Xa Alaa fe mi makɛnɛn yamaan xa, e mi fa danma fe yo ra. Sɛwan na kanna xa naxan na sariyan suxu!
19 Konyin mi maxadima falane gbansanna ra, bayo hali a mɛ, a mi a suxɛ.
20 I na muxun to naxan falan tima benun a xa a miri, yigin xaxilitaren ma dangu na kanna ra.
21 Naxan na fan a walikɛɛn na ɲaxi ra a dii ɲɔrɛyani, dɔnxɛn na a sa findima finsiriwanla nan na.
22 Bɔɲɛ gbee kanna yɛngɛn nan nakelima. Xɔlɔden hakɛne nan nagboma ayi.
23 Muxuna a wasona a biran yagin nin. Koni muxu xuruxin binyen nan sɔtɔma.
24 Muɲaden na a seene yitaxun e nun muxun naxan na, na niin mi rafan a ma. Na kanna rakɔlɔma nɛn dangan xɔn ma, koni a mi a fe mayitɛ.
25 Adamadiin yɛɛragaxun findixi luti ratixin nan na, koni naxan na a yigi sa Alatala yi, na ratangama nɛn.
26 Muxu wuyaxi kiraan fenma siga mangan fɛma. Koni muxun kiti kɛndɛn sɔtɔma Alatala nan yii.
27 Tinxintarene raɲaxu tinxin muxune ma, muxu faɲine raɲaxu muxu ɲaxine ma.