Proverbs 16 in Yalunka
1 Adamadiin feene natama a bɔɲɛni nɛn, koni Alatala nan feene ragidima.
2 Muxuna kirane birin sariɲan a yɛtɛ yɛɛ ra yi, koni Alatala nan muxun kui feene fɛsɛfɛsɛma.
3 I ya wanle taxu Alatala ra, alogo e xa sɔnɔya.
4 Bunna Alatala kɛwanle birin na, hali muxu ɲaxina, a daxi gbalo lɔxɔn nan yɛɛ ra.
5 Muxu wasoxine raɲaxu Alatala ma, a e fe ɲaxin saranma e ra nɛn yati.
6 Muxun hakɛn mafeluma hinanna nun lannayaan nan xɔn. Muxuna a masigama fe ɲaxin na Alatala yɛɛragaxun nin.
7 Xa muxun sigati kiin nafan Alatala ma, a lanna rasoɛ hali e nun a yaxune tagi.
8 A lan ndedi yi lu i yii tinxinni, benun tɔnɔ gbeena tinxintareyani.
9 Muxuna a siga kiraan natama a bɔɲɛni nɛn, koni Alatala nan a sanna tidene ragidima.
10 Mangana Alaa falane nan tima, a mi kitin sɛ tinxintareyani.
11 Sikeli tinxinxine birin fataxi Alatala nan na. A tan nan wali xɔri ligaseene birin na.
12 Kɛwali ɲaxine mi rafan mangane ma, bayo tinxinna nan e mangayaan sɛnbɛ soma.
13 Tinxin muxuna falan nafan mangane ma, ɲɔndi falan nafan e ma.
14 Mangana xɔlɔn faxan nan tima, koni xaxilimaan fatan a raxunbelɛ.
15 Mangan na sɛwa, siimayaan na a ra, a fanna luxi nɛn alo kundaan naxan fama tulen na.
16 Fe kolonna sɔtɔn tɔnɔn gbo dangu xɛmaan na pon! Xaxilimayaan sɔtɔn fisa gbetin xa ki faɲi!
17 Muxu faɲine kiraan mi sigama fe ɲaxin mabinni. Naxan na a yengi dɔxɔ a sigati kiin xɔn, na a niin nakantanma nɛn.
18 Kalan fama wason nan xɔn. Naxan na a yɛtɛ yite, na fe godomatɔɔn nan na ra.
19 A fisa i lu magodoni yiigelitɔne yɛ, benun ɛ nun wasodene xa se muɲaxine yitaxun.
20 Naxan na a miri ki faɲi, na hɛrin sɔtɔma nɛn. Sɛwan na kanna xa naxan na a yigi sa Alatala yi.
21 Fekolonna naxanye bɔɲɛ yi a falama nɛn ne ma a xaxilimane, fala faɲin xaxinla nan xun masama.
22 Siimayaan binla nan xaxilimayaan na xaxilimane xa. Xaxilitareyaan nan xaxilitarene ɲaxankatan na.
23 Fe kolonne bɔɲɛn nan fala faɲin naminima e dɛ, xaxilimaya falane nan e dɛ.
24 Fala faɲine findixi kumin nan na, e ɲaxun muxun niini e soma han muxun xɔnne alo senna.
25 Kirana nde tinxin adamadiin yɛɛ ra yi, koni a raɲanma sayaan nan ma.
26 Walikɛɛn kuiin nan a rawɛkilɛma wanla ma, kamɛn yi a karahan a xa lu walɛ.
27 Fuyantenna fe ɲaxini tɔnma, a dɛɛn muxune ganma alo halagi ti tɛɛna.
28 Muxu ɲaxin matandi feene nan nakelima, nafigin fan xɔyimane yitaxunma nɛn.
29 Gbalotɔna a adamadi boden nakunfama nɛn, a yi a ti kira ɲaxin xɔn.
30 Naxan a yɛɛn magirama, na fe ɲaxini tɔnma. Naxan a dɛ kidin xinma, na bata yelin fe ɲaxin ligɛ.
31 Xunsɛxɛ fixɛne luxi nɛn alo mangaya kɔmɔti binyena, naxan sɔtɔma tinxinyaan kiraan xɔn.
32 Muxu diɲaxin fisa yɛngɛ so sɛnbɛmaan xa. A fisa muxun xa a yɛtɛ suxu, benun a xa taana nde suxu.
33 Masɛnsɛn ti seene bama adamadina yiibaan nin, koni Alatala nan a feene birin nagidima.