Judges 5 in Yalunka
1 Na lɔxɔni, Debora nun Baraka, Abinowan ma dii xɛmɛn yi bɛtin ba e bode xɔn, e naxa,
2 “Sofane yitɔnxi yɛngɛ so xinla ma Isirayila yi, yamaan tinxi e xa siga yɛngɛni, tantunna xa fi Alatala ma!
3 Ɛ tan mangane! Ɛ tan kuntigine, ɛ tuli mati! N bɛtin bama nɛn, n bɛtin bama nɛn Alatala xa. N na Alatala tantunma nɛn bɛtini, Isirayilaa Ala.
4 Alatala, i to keli Seyiri yi, i to keli Edɔn yamanani, bɔxɔn yi xuruxurun, kundaan yi findi igen na, tule gbeen yi fa.
5 Geyane yi xuruxurun Alatala yɛtagi, Sinayi geyana Alatala yɛtagi, Isirayilaa Ala.
6 Anataa dii xɛmɛn Samagara waxatini, Yayeli waxatini, kira gbeene bata yi rabeɲin, sigatine yi sigama kiradine nan xɔn.
7 Taane bata yi rabeɲin Isirayila yi. E yi kalaxi han n tan Debora fa waxatin naxan yi, n yi fa findi Isirayila kaane nga ra.
8 E bata yi ala gbɛtɛne sugandi. Nayi, yɛngɛn yi keli e taane yi, koni, yɛ masansan wure lefana hanma tanban mi yi toɛ muxu kedenna yii muxu wuli tonge naaninna yɛ Isirayila yi.”
9 “N bɔɲɛna Isirayila sofa kuntigine fɔxɔ ra, e nun muxun naxanye tinxi e xa siga yɛngɛni. Tantunna Alatala xa!
10 Ɛ tan naxanye ɛ masiga tima sofali fixɛne fari, ɛ tan naxanye dɔxi dagine ma, ɛ tan naxanye sigan tima kirane xɔn, ɛ tuli mati
11 ige maxanle xuiin na ige ramaradene yi. E Alatalaa tinxinyana fe falama, a wali faɲine Isirayila kuntigine xa! Nayi, Alatalaa yamaan bata sa dɔxɔ taane so dɛɛne ra.
12 E yi a fala, e naxa, ‘Xulun, xulun! Debora, xulun! Xulun, xulun! I bɛtin ba! Xulun! Baraka, xulun! Abinowan ma dii xɛmɛna, i sa fa i ya kasorasane ra!’
13 Nayi, naxanye lu e nii ra, ne yi siga kuntigine fɔxɔ ra, Alatalaa yamaan yi e malan n fɛma, siga sofa kɛndɛne xili ma.
14 Efirami bɔnsɔnna muxuna ndee yi fa naxanye Amalɛkine nɔ. Bunyamin bɔnsɔnna muxune fan yi biraxi i fɔxɔ ra. Kuntigine yi keli Makiri yi siga yɛngɛni. Sofa kuntigine yi fa sa keli Sabulon bɔnsɔnni.
15 Isakari kuntigine yi bira Debora fɔxɔ ra, Isakari bɔnsɔnna muxune yi biraxi Baraka nan fɔxɔ ra, e godo lanbanni mafurɛn! Koni, matandi gbeen yi lu Rubɛn bɔnsɔnni.
16 Nanfera i luxi sansanne kui i lu xuruseene wuga xuiin namɛ? Matandi gbeen yi lu Rubɛn bɔnsɔnni.
17 Galadi kaane yi lu Yurudɛn baan kidi ma! Nanfera Dan kaane luxi kunkine dɛxɔn? Aseri kaane yi lu dɔxi baan dɛ, e lu dɔxi kunki tideni so dɛɛne ra.
18 Sabulon bɔnsɔnna muxune tan yi tin sayaan ma yɛngɛni, Nafatali bɔnsɔnna muxune fan na kiini xɛɛne ma.”
19 “Mangane fa nɛn, e yi yɛngɛn so. Nayi, Kanan mangane yi yɛngɛn so Taanaki yi, Megido tigine dɛxɔn, koni, e mi gbeti yo tongo, e mi sese sɔtɔ yɛngɛni.
20 Sarene yi yɛngɛn so kore xɔnna ma, e yi Sisera yɛngɛ e funfuni.
21 Kison baa igen yi en yaxune xali, Kison baa igen naxan yi minima xabu a fɔlɔni. I wɛkilɛ! En siga yɛngɛni!
22 Nayi, soone torone xuiin yi mini, e danguma e giyɛ, e tuganma alo soo sɛnbɛmane.
23 Alatalaa malekana nde yi a fala, a naxa, ‘Dangan Meroso taan xa, ɛ a muxune danga, bayo e mi fa walixi Alatalaa fe ra, e mi fa Alatalaa sofa kɛndɛne malixi.’
24 Duban Yayeli xa dangu ɲaxanle birin na Xeberi a ɲaxanla, Keni kaana! Dubana a xa ɲaxanle tagi naxanye dɔxi bubune kui!
25 Sisera bata igen maxɔdin, a yi nɔnɔn so a yii! A yi fɛnɛn so a yii igelengen faɲin kui.
26 A yi wudi ralemunxin suxu a kɔmɛnna ra, a yi a gbangban dɛɛramaan na a yiifanna ra, a yi Sisera garin, a yi a xunna sɔxɔn, a yi a xunni koren, a yi a yibɔ.
27 A yi bira a san bun, a yi bira, a lu saxi a bun, a yi bira a san bun, a salaxun dɛnaxan yi a bira, a lu mɛnna nin a faxa.”
28 “Sisera nga yi a yɛɛn namini banxin foye soden na, a yi a fala, a naxa, ‘Nanfera, a yɛngɛ so wontoron bata bu, a mi fama? Nanfera a wontorone bata madiganɲɛ ayi?’
29 A kuntigi ɲaxalan xaxilimane yi a yabi ito ra hali a tan fan yɛtɛɛn yi naxan mirixi, e naxa,
30 ‘Sofane seene nan tongoxi yɛngɛni, yanyina nde e ne nan taxunma, sofa keden, sungutun keden hanma firin. E dugi kɛndɛne nan tongoxi Sisera xa, dugi faɲi sɔxɔnxine, kɔɛ mafilin faɲi sɔxɔnxine Sisera xa.’”
31 “Alatala, a yi lan nun, i yaxune birin xa faxa alo Sisera faxaxi kii naxan yi. Koni, i rafan naxanye ma ne xa lu alo sogen na te sɛnbɛni.” Yamanan yi lu bɔɲɛ xunbenli ɲɛɛ tonge naanin.