Job 40 in Yalunka
1 Alatala mɔn yi a fala Yuba xa, a naxa,
2 “I tan naxan Ala Sɛnbɛ Kanna yalagima, i mɔn luyɛ a matandɛ? I tan naxan Ala mafalama, i nɔɛ a yabɛ?”
3 Yuba yi Alatala yabi, a naxa,
4 “Sese mi n tan na. N nɔɛ i yabɛ nanse ra? Fɔ n na n yiin sa n dɛ ra, n yi n dundu.
5 N bata falan ti, n mi fa yabi tima. N bata a radangu ayi, n mi fa sese falama.”
6 Alatala yi Yuba yabi wuluwulu gbeeni, a naxa,
7 “Keli, i yitɔn alo xɛmɛ wɛkilɛxina, n xa i maxɔdin, i yi n yabi.
8 I waxi a fala feen nin ba fa fala a n mi kiti kɛndɛn sama? I waxi n yalagi feen nin ba, i yi yoon fi i yɛtɛ ma?
9 I sɛnbɛn gbo alo Ala ba? I xuiin findɛ kuye sarinna ra ba alo Ala gbeena?”
10 “I yɛtɛ maxidi binyen nun gboon na, i yi i maxidi nɔrɔn nun xunnayerenna ra.
11 I ya xɔlɔn nasiga muxune ma, i wasodene birin nagodo sanɲa yi kedenni.
12 I wasodene birin nagodo sanɲa yi kedenni yati, i ɲaxudene birin halagi e dɛnaxanye yi,
13 i yi ne birin maluxun, i yi e balan gaburun kui.
14 Nayi, xa i yi na liga nun, n tan yɛtɛɛn yi i matɔxɔma nɛn, bayo i yɛtɛ sɛnbɛn yi i rakisima nɛn.”
15 “Malinna mato, sube magaxuxina. N tan nan a daxi alo n ni i daxi kii naxan yi. A sɛxɛn donma alo ɲingena.
16 A sɛnbɛna a tagin nin. A sɛnbɛna a fudi ma fasane nin.
17 A xunla xɔdɔxɔ alo sumanna, a danba subene fasane yibalanxi ken!
18 A xɔnne fan luxi alo sulana, a ɲɛnsɛn xɔnne luxi alo wurena.”
19 “A findixi Alaa dalise fisamantenna nan na. N tan, a da mangan nan keden nɔɔn sɔtɔma a ma silanfanna ra.
20 A balon sɔtɔma geyane fari, burunna subene birin dɛnaxan yi.
21 A sama wudine nan bun, a yi a luxun dara yi gbalane bun,
22 a matabuma wudine nininna nan na, wudin naxanye xuden dɛ, ne yi a rabilin.
23 Xa igen gbo ayi, a mi gaxuma, hali Yurudɛn baa igen fa han a dɛ, a luma nɛn xaxili sani.
24 Xa a yɛɛne rabixi, nde nɔɛ a suxɛ? Nde nɔɛ a suxɛ, a wuren bira a ɲɔɛni?
25 I ige yi sube ɲaxin suxɛ kɔnna ra ba? I a suxɛ a lɛnna ma ba i ya lutin na?
26 I gbalan sɔtɛ a ɲɔɛɛn kui ba, i yi a gbɛgbɛn sɔxɔn wuren na?
27 I mirixi a ma a kankanɲɛ i mafanna ma ba, a fala faɲine ti i xa?
28 A layirin xidɛ ɛ tagi ba, a findɛ i ya konyin na habadan?
29 I sabaan soɛ a ra ba alo xɔlina? I lutin xidɛ a sanna ra ba, i yi a so i ya dii tɛmɛne yii?
30 Yɛxɛ suxune a matiyɛ lɔxɔni ba, e a yitaxunɲɛ yulane ra?
31 I nɔɛ a kidin kalɛ xalimakunle ra ba? I nɔɛ a xunna sɔxɔnɲɛ kulundene ra ba?
32 Nayi, hali i yiin din a ra a yɛngɛ xinla ma sanɲa ma keden pe, i mi fa na ɲɔxɔn ligama sɔnɔn.”