Job 38 in Yalunka

1 Nayi, Alatala yi Yuba yabi wuluwulu gbeeni, a naxa,

2 “Nde i tan na naxan n ma fe ragidixine yidimima a xaxilitareya falane xɔn?

3 Keli, i yitɔn alo xɛmɛ wɛkilɛxina, n xa i maxɔdin, i yi n yabi.”

4 “I yi minɛn yi n to yi bɔxɔn bɛtɛn sama? A yɛba n xa, xa i ɲɔndin kolon.

5 Nde dunuɲa danne sa, i na kolon ba? Nde lutini bandun a yi a maliga?

6 Bɔxɔ xɔnna bɛtɛn saxi nanse fari? Nde a tongon gɛmɛn dɔxi,

7 xɔtɔn ma sarene to yi bɛtine bama, Alaa malekane to yi gbelegbelema sɛwani?”

8 “Nde fɔxɔ igen balanxi alogo a xa a raxara a dɔxɔdeni, a to yi minima a dadeni?

9 N yi kundaan findi a dugin na, n yi kunda fɔrɛn findi a mafilin dugin na,

10 n nan n ma sariyan sa a ma, n yi a danne sa, n to yi dɛɛne nun balan seene sama a ma.

11 N yi a fala fɔxɔ igen xa, n naxa, ‘I fama nɛn han be, i nama dangu be ra. I mɔrɔn gbeene danma be nin yati.’”

12 “I bata yamarin fi xɔtɔnna ma i ya siimayani ba, hali sanɲa ma keden pe? I bata a miniden yita subaxan na ba,

13 alogo a xa bɔxɔn suxu a danne ma, a yi a yimaxa, a yi ɲaxudene kedi?

14 Sogen na te, a yi bɔxɔni yalan, a yigbɛ alo yii fɔxɔn bɛndɛni, a kɛnɛnna yi so dunuɲa xun na alo dugina.

15 Koni, ɲaxudene kumama nɛn e waxatin na, e sɛnbɛn yi kala.”

16 “I bata siga ba han fɔxɔ igen xunna? I bata i masiga ti fɔxɔ igen tilinna ma?

17 Laxira so dɛɛne yita nɛn i ra ba? I sayaan so dɛɛne to nɛn ba?”

18 “I bɔxɔna gboon yatɛn kolon ba? A fala n xa, xa i na feene birin kolon.

19 I kɛnɛnna dɔxɔden kolon? I a kolon dimin konna dɛnaxan yi?

20 I nɔɛ e bɛ e yirene yi? I e konna kiraan bayen kolon?

21 I lan i yi a kolon, to mi i tan naxan da.”

22 “I bata siga han ige xundin namaran dɛnaxan yi ba? I bata balabalan kɛsɛne ramaradene to ba?

23 N ne dɔxi gbalon waxatine nan yɛɛ ra, e nun sɔnxɔ nun yɛngɛ lɔxɔne.

24 I a kolon ba kɛnɛnna minin kiraan naxan xɔn? I a kolon ba sogetede foyen kelima dɛnaxan yi?”

25 “Nde kiraan nabaxi tule igen xa? Nde kiraan yitaxi kuye sarinna ra?

26 Nde tulen nafama bɔxɔn fari muxu yo mi dɛnaxan yi, e nun tonbonni muxe mi dɔxi dɛnaxan yi?

27 Nde igen nafama yire xarene ma, alogo sɛxɛn xa sabati?”

28 “Tulen fafe na ba? Nde xiila barixi?

29 Ige xundina nga na ba? Nde xunbenla barixi?

30 Igen xɔdɔxɔma alo gɛmɛna, ige xundin yi sa fufaan xun ma.”

31 “Nde nɔɛ sare kuru Dii Tɛmɛ Soloferene yɔlɔnxɔnna tugunɲɛ? I tan nɔɛ sare kuru Donsona lutin fulunɲɛ ba?

32 I nɔɛ sare kurune raminɛ e waxatini ba, i yi sare kuru Kanko Gbeen nun a diine rasiga ti?

33 I a kolon ba yanban seene koreni sigama sariyan naxanye ma? I tan nan yanban seene sɛnbɛn nawalima bɔxɔn ma ba?”

34 “I xuiin tɛ han kundane ma kore xɔnna ma ba, i yi e yamari a tulen xa fa i ma?

35 I tan nan kuye sarinne rasigama ba, e yi a fala i xa, e naxa, ‘Nxu tan ni i ra?’

36 Nde fekolonna saxi muxun bɔɲɛni? Nde xaxilimayaan fixi a ma?

37 Nde nɔɛ kundaan yatɛ a xaxilimayaan xɔn? Nde nɔɛ ige sa seene xun sinɲɛ kore,

38 gbangbanna yi findi boron na, bɔxɔn kobelene yi dɔxɔ e bode ra?”

39 “I tan nan donseen soma yata gilɛn yii ba? I tan nan kamɛn bama yata sɛnbɛmane ma ba,

40 e nɛma sa e yinla kui, hanma e nɛma luxunxi subene yɛɛ ra?

41 Nde donseen soma xaxaan yii, a diine na e xuini te Ala ma, a na siga na xun xɔn donse fendeni?”