Job 36 in Yalunka

1 Elihu mɔn yi siga falan ma, a naxa,

2 “I mɔn xa tin ndedi, n xa i xaran, amasɔtɔ fala gbegbe mɔn n xɔn n naxan falɛ i xa Ala fe ra.

3 N nan n ma kolonna fenma yire makuyen nin, n yi yoon fi Ala ma naxan n daxi.

4 Wule mi n ma falane ra mumɛ. N tan naxan be i yɛtagi, n ma fekolonna kamalixi.”

5 “Ala sɛnbɛn gbo yati, a mi muxu yo rawolima ayi. A sɛnbɛn gbo a xaxilimayaan xɔn.

6 A mi ɲaxudene luma e nii ra. A kiti kɛndɛn sama yiigelitɔne xa.

7 A mi a xun xanbi soma tinxin muxune yi, koni a e fe yitema nɛn, a yi e dɔxɔ manga gbɛdɛne yi habadan.

8 Xa e xidixi yɔlɔnxɔnne ra, xa e tɔrɔni,

9 Ala e kɛwanle nan makɛnɛnma e xa na kiini, e nun e murutɛ feene e naxanye ligaxi wasoni.

10 A yi e xaran, a e xa e tuli mati e xuru falane ra, a yi e yamari, a e xa xɛtɛ e hakɛn fɔxɔ ra.

11 Xa e tuli mati, e yi a yamarin suxu, e siimayaan danguma hɛrin nin, e yi e dunuɲa yi gidin ɲan sɛwani.

12 Xa e mi a ramɛ, e faxama nɛn yɛngɛni, e halagi e fe kolontareyani.”

13 “Ala kolontarene nan xɔlɔn namarama, e mi Ala maxandima malina fe ra hali a na e ratɔrɔn.

14 E faxama e foningeyaan nin, e siimayaan yi raɲan yagin ma yalundene tagi.

15 Koni, Ala tɔrɔ muxune rakisima e tɔrɔn nan xɔn, a yi e rakolon ɲaxankatan xɔn.

16 A i tan fan bama nɛn tɔrɔni, a yi dɔxɔde rafulunxin fi i ma, a yi i ya tabanla rafe donse faɲine ra.”

17 “Koni iki, kitin naxan nagidixi fe ɲaxi rabane xili ma, na bata i sɔtɔ, Ala to a kiti kɛndɛn sa i xili ma, a yi i yalagi.

18 Nayi, xɔlɔn nama i radin i yi fe kobin liga, i nama xɛtɛ Ala fɔxɔ ra bayo na saren gbo.

19 I ya nafunle i bɛ tɔrɔni ba? Hali i sɛnbɛ gbeen mi nɔɛ i maliyɛ iki.

20 A xɔli nama i suxu kɔɛɛn xa so, alogo i xa muxune ba e konne yi.

21 A liga i yeren ma! I nama fa hakɛn liga sɔnɔn, i bata yi gbalon sɔtɔ na fe ra.

22 I xa a kolon a Alaa binyen gbo a sɛnbɛni. Nde nɔɛ xaranna tiyɛ alo a tan?

23 Nde kiraan yitaxi a ra? Nde nɔɛ a falɛ, a naxa, ‘I bata tinxintareyaan liga?’”

24 “I nama ɲinan Alaa wanle matɔxɔn ma, muxune birin naxanye fe falama e bɛtine yi,

25 adamadiine birin nɔɛ naxanye toɛ, e yi e mato wulani.

26 Ala gbo yati, en mi a gboon danna kolon, a siimayaan dan mi na.

27 A na igen nate wuyenni kore, a yi na findi tulen na mɛnni.

28 Na tulen yi keli kundane yi, a godo adamadiine ma.

29 Nde nɔɛ kundaan nafala kiin kolonɲɛ, e nun galanna godon kii naxan yi keli kore?

30 A mato, a kuyen ɲin masɔxɔnna raminima a rabilinni, a fɔxɔ igen nafema han dimin yi so a tilinna ma.

31 A yamaan makitima na tulen nan xɔn, a donse gbegbe fi e ma.

32 A galanna tongoma a yii firinne nan na, a yi a ragodo a na wa dɛnaxan xɔn.

33 A kuye sarinna a fa feen nan mayitama, hali xuruseene a fa feen kolon.”