Job 13 in Yalunka
1 Yuba mɔn yi a fala, a naxa, “A mato, n yɛɛn bata na birin to, n tunla bata na birin mɛ, n yi a famu.
2 Ɛ naxan kolon, n fan na kolon, ɛ mi dangu n na.
3 Koni, n tan waxi falan ti feni Ala Sɛnbɛ Kanna nan xa, n waxi n xa n mawuga Ala xa.
4 Koni ɛ tan wulen nan tun sama ɲɔndin yɛ ma, ɛ birin findixi dandan ti fuyanne nan na.
5 Xa ɛ yi ɛ dundɛ nun, na yi findɛ ɛ fekolonna ra nɛn.
6 Ɛ n ma mawugan namɛ, ɛ tuli mati n ma mawuga xuiin na.
7 Ala makoon luyɛ ɛ tinxintareyaan ma ba, ɛ wulene fala Ala mali feen na?
8 Ɛ waxi ɛ sa feni Ala nan fari n xili ma ba? Ɛ Ala nan xun mafalama ba?
9 A na ɛ miriyane yatɛ, na fanɲɛ ɛ ra ba? Ɛ nɔɛ a yanfɛ ba alo muxuna?
10 Ɲɔndin naxan na, ɛ na kitin sa yɛtagin ma hali wundoni, Ala falan tima nɛn ɛ xili ma.
11 Ɛ mi gaxuma a binyen yɛɛ ra ba? A magaxun mi ɛ suxɛ ba?
12 Ɛ sandane luxi nɛn alo xubena, ɛ xun mafala falane kalama nɛn alo bɛndɛna.”
13 “Ɛ dundu, ɛ n lu! N xa falan ti hali sese n sɔtɔ.
14 Nanfera n nan n fati bɛndɛn xinɲɛ n ɲinne ra, nanfera n tinɲɛ sayaan ma?
15 Xa Ala wa, a xa n faxa, n yengi mi fa sese ma koni n waxi n sigati kiin xɔnba feni a tan nan yɛtagi.
16 Na yɛtɛɛn findima n ma kisin nan na, bayo Ala kolontare yo mi tima a yɛtagi.
17 Ɛ tuli mati n ma falan na a faɲin na, n ma fe yɛ xaranna xa so ɛ tunla ma.
18 N bata n xun mafala feni tɔn, n na a kolon a ɲɔndina n tan nan xa.
19 Nde waxi n xun maxidi feni? Nayi, xa ɲɔndi mi n xa, n tinxi n yi n dundu, n faxa.”
20 “N ma Ala, fe firin gbansan masiga n na, nayi, n mi luxunɲɛ i ma:
21 I ya xɔlɔn masiga n na, i ya magaxun nama fa n suxu sɔnɔn.
22 Na xanbi ra, falan ti n xa, n ni i yabɛ, hanma n yi falan ti, i yi n yabi.
23 Yoli n hakɛne nun n yulubine yatɛn na? N ma murutɛ feene nun n ma yulubine yita n na.
24 Nanfera i yɛtagin luxunma n ma, i yi n yatɛ i yaxun na?
25 I n tan nan magaxuma ba, n tan naxan luxi alo ɲɔxɔndena foyen sigan naxan na? I n tan nan sagatanma ba, n tan naxan luxi alo malo dagi xarena?
26 I fe xɔlɛne sɛbɛma n xili ma, i n ma dii ɲɔrɛyaan hakɛn goronna dɔxɔ n xun ma.
27 I n sanne sama kutun na, i yɛɛn tixi n sigati kiin birin na, hali n san funfune, i e birin nakɔrɔsima.
28 Koni, adamadiine kunma alo wudi kalaxi, alo xiine dugin kala kii naxan yi.”