Job 10 in Yalunka
1 Yuba mɔn yi a fala, a naxa, “N ma siimayaan bata raɲaxu n ma, n mi fa n ma mawugane danma sɔnɔn, n na n ma sɔxɔlɛn falama nɛn.
2 N na a falama nɛn Ala xa, n naxa: I nama n yalagi, a yita n na nanfera i xɔlɔxi n ma.
3 Ɲaxankatan findɛ fe faɲin na i tan xa ba? I yɛtɛ wali xɔnna rawolɛ ayi ba? I yi muxu ɲaxine feene rasabati?
4 I toon tima i muxu yɛɛne nan na ba, i toon tima nɛn alo adamadiine ba?
5 I ya siimayaan luxi nɛn alo adamadiine gbeen ba? I ya lɔxɔne luxi nɛn alo muxune gbeen ba?
6 Nanfera i yi n hakɛne fenma, i yi n yulubine xɔnfen?
7 Anu, i a kolon a muxu ɲaxi mi n na, muxu yo mɔn mi nɔɛ n nakisɛ i yii.
8 I tan nan n daxi, i yiine yi n nafala, koni iki, i waxi n naxɔri feni.
9 N ma fe xa rabira i ma, a i n nafalaxi nɛn alo bɛndɛ yi sena, i mɔn waxi n naxɛtɛ feen nin bɛndɛni ba?
10 I n nafala nɛn nga fatini, alo nɔnɔn naxan findin fɛnɛn na.
11 I yi fati bɛndɛn nun fati kidin sa n ma, i yi n nafala xɔnne nun fasane ra.
12 I mɔn yi siimayaan fi n ma, i hinan n na, i yi n niin nakantan.
13 Koni, i yi wundo feni ito luxunxi i bɔɲɛni, n na i ya miriyani ito kolon,
14 fa fala xa n yulubin liga, i nɔɛ n toɛ nɛn, i mɔn mi diɲɛ n hakɛn ma.
15 Xa muxu ɲaxin nan n na nun, gbalona n xa! Hali n tinxin, n mi nɔɛ n xunna rakelɛ, n tan naxan nafexi yagin nun tɔrɔn na.
16 Xa n nan n xunna rakeli, i n kedima nɛn alo yatana, i mɔn yi i ya kabanako feene ragodo n xili ma han!
17 I mɔn i ya gbalone rakelima n xili ma, i ya xɔlɔn xun masama n xili ma, i ya ganle biraxi e bode fɔxɔ ra n yɛngɛ xinla ma.”
18 “Nanfera i naminixi nga kuini? Hali n yi faxa nun, muxu yo mi n to,
19 n lu alo n mi da, n ba nga kuini, n sa maluxun gaburun na.
20 N ma lɔxɔne mi fa wuya sɔnɔn, nayi, a lu, n xa sɛwa ndedi,
21 benun n xa siga yamanani xɛtɛ mi dɛnaxan yi, dɛnaxan nafexi dimin nun sayaan nininna ra,
22 yamana yifɔrɛna alo dimina, sayaan nininna nun kalan dɛnaxan yi, kɛnɛnna luxi dɛnaxan yi alo dimina.”