Jeremiah 9 in Yalunka
1 Xa n yi yigiyaden sɔtɔ burunna ra nun, n yi n mɛma nɛn n ma yamaan na, n yi n masiga e ra! Bayo e birin yalunde, yanfanten ganla nan e ra.
2 Alatalaa falan nan na ra, a naxa, “E lɛnne yitɔnxi nɛn e xa wulen fala alo xanla xalimakunle wolima kii naxan yi. E mi nɔɔn sɔtɔn yamanani ɲɔndi falan xan xɔn, koni e fe ɲaxin nan tun nabama. E mi n kolon.
3 Birin xa a xɔyina fe liga a yeren ma. Muxu yo nama a yigi sa a ngaxakedenne yi, bayo muxune ngaxakedenne birin findixi yanfantenne nan na, muxune xɔyine birin yi findi nafigine ra.
4 E birin e bode mayendenma, muxe mi ɲɔndin falama. E bata e xaran wulen ma ki faɲi. E yi e yɛtɛ yixadan hakɛ ligadeni.
5 Yeremi, i dɔxi yanfantenne nan tagi. E tondixi n kolonɲɛ e yanfantenyaan nin.” Alatalaa falan nan na ra.
6 Nanara, Alatala Sɛnbɛn Birin Kanna naxa, “N na e rasariɲanma nɛn, alo xabun wuren naxulunma kii naxan yi n yi e kɛɲaan fɛsɛfɛsɛ, bayo n fa n ma yamaan suxɛ di?
7 E lɛnne maxɔlɔn tima alo faxa ti xalimakunla, e yanfa falane nan tun tima. E bɔɲɛ xunbeli falane tima e adamadi bodene xa, koni e luti ratixini tɔnma e bɔɲɛni.
8 N mi lan n xa e saran na fe sifane ra ba? N mi n gbeen ɲɔxɛ na yama sifan ma ba?” Alatalaa falan nan na ra.
9 N wugama nɛn, n gbelegbele sununi geyane fari. N na n mawugama xuruse rabade kalaxine nan ma fe ra, bayo e bata gan, muxu yo mi fa danguma e yi. Xuruseene wuga xuiin mi fa minima na yi sɔnɔn. Xɔline nun burunna subene birin bata e gi, e siga.
10 N Yerusalɛn taan luma nɛn alo gɛmɛ malanxine, kankone kurudena, n Yuda taane raxɔri, muxu yo mi lu e yii.
11 Xaxilimaan mundun feni itoe yɛɛ toɛ? Xa Alatala bata falan ti a xa, a xa na yɛba! Nanfera yamanan bata kala, a raxɔri alo burunna, muxu yo mi danguma dɛnaxan yi?
12 Alatala naxa, “Na feene ligaxi nɛn bayo e bata e mɛ n ma sariyan na, n naxan so e yii, bayo e mi e tuli matixi n xuiin na, e sigan ti a ma.
13 E biraxi e bɔɲɛ yi feene fɔxɔ ra e tengbesenyani, e nun Baali suxurene alo e fafane e xaranxi a ma kii naxan yi.”
14 Nanara, Alatala, Isirayilaa Ala Sɛnbɛn Birin Kanna ito nan falaxi, a naxa, “N dabarin nun ige xɔlɛn fima yamani ito ma nɛn e balon na.
15 N yi e raxuya ayi siyane yɛ, e nun e benbane mi naxanye kolon, n yɛngɛn bira e fɔxɔ ra han n yi e birin naxɔri.”
16 Alatala Sɛnbɛn Birin Kanna ito nan falaxi, a naxa, “Ɛ miri! Ɛ sa ɲaxalan wugalane fen, e xa fa! Ɲaxanla naxanye fatan gbelegbeledeni sununi, ɛ ne fen de!
17 E xa e mafura fɛ, e fa e wuga xuini te en ma fe ra, han en fan yi wuga, en yɛɛgen yi godo alo xude igena.
18 Bayo wuga xuiin minima Siyon taani, e naxa, ‘En bata halagi feu! Yagin bata gbo en ma! Fɔ en xa keli nɛn yamanani, bayo e bata en ma banxine rabira!’”
19 Nayi, ɲaxanle, ɛ tuli mati Alatalaa falan na, a naxan falama a dɛɛn na, ɛ yi na ramɛ! Ɛ ɛ dii tɛmɛne xaran wugan ma, ɛ bode xaran mawugan ma!
20 Bayo sayaan bata so en ma banxine foye sodene ra, siga han en ma banxi faɲine kui, en ma diidine yi faxa kirane xɔn, en ma foningene yi faxa yama malandene yi.
21 Yeremi, a fala iki, i naxa, “Alatalaa falan ni ito ra, fa fala ‘Binbine luma nɛn yiren birin yi alo ɲaman xɛɛn ma, alo malo xidine xɛɛn xun xɔn malo xaban fɔxɔ ra, koni e malan muxu mi na!’”
22 Alatala ito nan falaxi, a naxa, “Fe kolonne nama e kanba e fe kolonni. Sɛnbɛmaan nama a kanba a sɛnbɛni. Nafulu kanna nama a waso a nafulu kanyani.
23 Koni xa naxan a kanbama, na xa a kanba ito nin: fa fala, a bata n famu, a yi n kolon. A xa n kolon Alatala ra, naxan hinanna nun kiti kɛndɛn nun tinxinyaan nabama dunuɲa yi bayo na fe sifane nan nafan n ma.” Alatalaa falan nan na ra.
24 Alatalaa falan ni ito ra, a naxa, “Lɔxɔne fama, n muxune saranma e kɛwanle ra waxatin naxan yi, naxanye birin banxulanxi e fati bɛndɛn mabinni koni e mi tubixi e bɔɲɛni,
25 alo Misiran kaane nun Yuda kaane nun Edɔn kaane nun Amonine nun Moyaba kaane, naxanye birin dɔxi tonbonni, naxanye e xunne dɛxɔn bima. Amasɔtɔ Ala kolontarene nan siyani itoe ra. Isirayila yamaan birin fan luxi nɛn alo banxulantarene dɛnkɛlɛyaan mabinni.”