Jeremiah 31 in Yalunka
1 Alatalaa falan ni ito ra, a naxa, “Na waxatini, n findima nɛn Isirayila xabilane birin ma Ala ra, e yi findi n ma yamaan na.”
2 Alatala ito nan falaxi, a naxa, “Yama dɔnxɛn naxanye luxi e nii ra yɛngɛn xanbini, ne n ma hinanna toma nɛn tonbonni, Isirayila yamaan yi matabun sɔtɔ.”
3 Alatala a yɛtɛ yita nɛn n na wulani, a naxa, “N bata ɛ xanu habadan! Nanara, n ma hinanna mi ɲanma ɛ xa.
4 Isirayila yama faɲina, n mɔn ɛ rasabatima nɛn, ɛ yamanan mɔn tima nɛn. Ɛ mɔn ɛ tanbanne maxama nɛn ɛ yi siga bodonlane fɔxɔ ra ɲaxaɲaxani.
5 Ɛ mɔn manpa bili nakɔne sima nɛn Samari geyane fari. Xɛɛ biine sansine sima nɛn, e yi e bogine sɔtɔ.
6 Bayo lɔxɔna nde fama, kantan tiine e xui raminima Efirami yamanan geyane ma waxatin naxan yi, e naxa, ‘Ɛ keli, en siga Siyon taani Alatala fɛma, en ma Ala.’”
7 Bayo Alatala ito nan falaxi, a naxa, “Ɛ xuini te sɛwani Yaxuba bɔnsɔnna fe ra, Ɛ ɲaxan e fe ra e tan naxanye siyane xun na! Ɛ xui ramini, ɛ yi Ala tantun, ɛ naxa, ‘Alatala, i ya yamaan nakisi, Isirayila muxu dɔnxɛne.’
8 N xɛtɛma nɛn e ra sa keli kɔmɛn fɔxɔn yamanani, n yi e malan sa keli bɔxɔn danne ra. Danxutɔne nun sankalatɔne e yɛ, ɲaxalan fudi kanne nun naxanye dii barini, e birin. Yama gbeen nan xɛtɛn be.
9 E fama nɛn wugɛ, e lu n maxandɛ, n yi ti e yɛɛ ra, siga xudene dɛ, kira yitɔnxin xɔn, e mi e sanna radinɲɛ dɛnaxan yi, bayo Isirayila yamaan fafe nan n na, Efirami bɔnsɔnna luxi nɛn alo n ma dii singena.”
10 Siyane, ɛ tuli mati Alatalaa falan na, ɛ sa a rali fɔ fɔxɔ ige tagi bɔxɔ makuyene yi! Ɛ naxa, “Naxan Isirayila yamaan naxuyaxi ayi, na e malanma nɛn. A e kantanma nɛn alo xuruse rabaan nun a xuruse kuruna.
11 Bayo, Alatala bata Yaxuba yixɛtɛne xɔrɔya, a yi e xunba muxune yii naxanye sɛnbɛn gbo e xa.
12 E fama nɛn, e xuini te ɲaxaɲaxani Siyon geyaan xuntagi. E sɛwama nɛn Alatalaa nɛmaan birin na, murutun nun manpa nɛnɛn nun turen nun yɛxɛɛne nun siine nun ɲingene. E nii yifanma e ma nɛn alo igen saxi nakɔɔn naxan ma, e mi fa yigitɛgɛ mumɛ!
13 Nayi, sungutunne sɛwama nɛn e bodondeni, e nun banxulanne nun fonne birin. N yi e sunun findi sɛwan na, n yi e madɛndɛn, n yi e rasɛwa e ɲaxankatan xanbini.
14 N yi saraxaraline ralugo sube turaxine ra n ma yamaan yi wasa n ma nɛmaan na,” Alatalaa falan nan na ra.
15 Alatala ito nan falaxi, a naxa, “Gbelegbele xuiin nun wuga xui gbeen tema Rama taani. Rakeli nan a diine wugama. A mi tinɲɛ a xa masabari amasɔtɔ e birin bata faxa.”
16 Alatala ito nan falaxi, a naxa, “Ɛ wuga xuiin nun ɛ yɛɛgen dan, bayo ɛ kɛwanle saren fima nɛn, ɛ diine fama nɛn sa keli yaxune konni.” Alatalaa falan nan na ra.
17 “Ɛ yigin sɔtɔma nɛn waxati famatɔne yi, bayo ɛ diine mɔn xɛtɛma nɛn e konni.” Alatalaa falan nan na ra.
18 N bata Efirami bɔnsɔnna wuga xuiin mɛ, e naxa, “Ala, i bata nxu xuru kari xɔdɛxɛni alo turaan naxan mi suxi, nxu yi xuru ki faɲi. I mɔn xa nxu raxɛtɛ, nxu xɛtɛma nɛn, bayo i tan nan Alatala ra, nxɔ Ala.
19 Nxu nxu xun xanbi so nɛn i yi, koni na xanbi ra, nxu yi nimisa. Nxu yelin xanbini xaxinla sɔtɛ, nxu yi xɔlɔ nxu yɛtɛ ma, nxu yagi, nxu yi nxu xun sin, bayo nxu bata kalan ti nxu dii ɲɔrɛ waxatini han!”
20 Ala naxa, “Efirami bɔnsɔnna mi findixi n nafan diin xan na ba, n diin naxan nafisama bonne xa? Bayo n nɛma falane tiyɛ a ma, a fe rabirama n ma. Nanara, n bɔɲɛn bata kala a fe ra, a kininkininna yi n suxu han!” Alatalaa falan nan na ra.
21 Ɛ taxamasenne ti kiraan xɔn, ɛ wudine bitin kiraan dɛ alogo muxune nama kira gbeen fata e lan e xa bira naxan fɔxɔ ra. Isirayila yama faɲina, ɛ mɔn xa xɛtɛ, ɛ xɛtɛ ɛ taane yi.
22 N ma dii murutɛxine, ɛ luma na xun xɔn sigani han waxatin mundun yi? Bayo Alatala fe nɛnɛn naminima nɛn bɔxɔ xɔnna fari, ɲaxanla fama nɛn xɛmɛn fendeni.
23 Alatala Sɛnbɛn Birin Kanna, Isirayilaa Ala ito nan falaxi, a naxa, “N na xɛtɛ e muxu suxine ra waxatin naxan yi, a mɔn falama nɛn Yuda yamanan nun a taane yi, e naxa, ‘Alatala xa barakan sa tinxin yirena fe yi geya sariɲanxina.’
24 Xɛɛ biine nun xuruse rabane dɔxɔma nɛn Yuda yamanani e nun a taane birin.
25 Bayo n muxu xadanxine nii yifanma e ma nɛn, n yi muxu nii kalaxine ralugo.”
26 Na waxati yɛtɛni, n yi xulun, n yi a kolon a n ma xixɔnla yi ɲaxun han!
27 Alatalaa falan ni ito ra, a naxa, “Lɔxɔne fama, n mɔn muxune nun xuruseene rasabatima nɛn Isirayila nun Yuda yamanane yi, e wuya ayi alo muxun na sansiin xuya xɛɛn ma.
28 Benun to, n na n yɛɛn ti nɛn e ra alogo n xa e xunna kala, n yi e tala, n yi e halagi, n yi e raxɔri, n yi gbalon nafa e ma. Koni iki, n mɔn n yengi dɔxɔma nɛn e xɔn alogo n xa e yamanan ti, n yi e si,” Alatalaa falan nan na ra.
29 A mi fa falama na lɔxɔni fa fala, Fafane bata ɲaxundan xindene don, koni e diine nan ɲinye ramuluxun.
30 Koni birin faxama a yɛtɛ hakɛn nan ma fe ra. Muxu yo ɲaxundan xindene don, na kanna yɛtɛɛn nan ɲinye ramuluxunma.
31 Alatalaa falan ni ito ra, a naxa, “Na lɔxɔne fama, n layiri nɛnɛn xidima nxu nun Isirayila nun Yuda yamane tagi waxatin naxan yi.
32 A mi ligama alo n layirin naxan xidi nxu nun e benbane tagi, n to e yii rasuxu n yi e ramini Misiran yamanani. Bayo e n ma layirin kala nɛn hali n to findi e kanna ra,” Alatalaa falan nan na ra.
33 “Koni layirin ni i ra, n naxan xidima nxu nun Isirayila yamaan tagi.” Alatalaa falan ni ito ra, a naxa, “Na waxatin na dangu, n na n ma sariyane sama nɛn e xaxinli, n yi e sɛbɛ e bɔɲɛni. N findima nɛn e Ala ra, e yi findi n ma yamaan na.
34 Muxu yo mi fa a boden maxaranma, muxu yo mi a falɛ a ngaxakedenna xa, a naxa, ‘I xa Alatala kolon,’ bayo e birin n kolonma nɛn, keli muxudin ma han muxu gbeena. Bayo n diɲama nɛn e hakɛne ma n yi e yulubine xafari.” Alatalaa falan nan na ra.
35 Alatala ito nan falaxi, a tan naxan sogen da alogo a xa kɛnɛnna fi yanyin na, e nun kiken nun sarene kɔɛɛn na, naxan fɔxɔ igeni maxama, a mɔrɔnne yi xuxu, naxan xili Alatala Sɛnbɛn Birin Kanna, na naxa,
36 “Fanni dunuɲa da kiin sariyani itoe n yɛtagi, Isirayila yixɛtɛne fan yatɛma nɛn siyaan na n yɛɛ ra yi.” Alatalaa falan nan na ra.
37 Alatala ito nan falaxi, a naxa, “Xa kore xɔnna nɔɛ maligɛ, xa bɔxɔ xɔnna bunne nɔɛ kolonɲɛ, nayi, n fan n mɛma nɛn Isirayila bɔnsɔnna ra e kɛwanle fe ra,” Alatalaa falan nan na ra.
38 Alatalaa falan ni ito ra, a naxa, “Lɔxɔne fama, taani ito mɔn tima Alatala xa waxatin naxan yi, keli Xananɛli Sangansoon ma han sa dɔxɔ Songen Ma Dɛɛn na.
39 Taan dan nɛnɛn fɔlɔma mɛnna nin siga tinxinni han Garɛbi geyana, sa dangu Gowa binni.
40 Binbine nun xubene bɔxɔnma lanbanna naxan yi e nun gbingbinna naxanye sigama han Kedirɔn xudeni siga han taan so dɛɛn tongonna so dɛɛn naxan xili Soone Dɛna, sogeteden binni, mɛnne birin nasariɲanma nɛn Alatala xa. Yire yo mi fa kalɛ na hanma a raxɔri.”