Jeremiah 30 in Yalunka
1 Alatala yi falan ti Yeremi xa, a naxa,
2 “Alatala, Isirayilaa Ala ito nan falaxi, a naxa, ‘N falan naxanye tixi i xa, e birin sɛbɛ kɛdin kui.’
3 Alatalaa falan ni ito ra, a naxa, ‘Lɔxɔne fama, n Yuda nun Isirayila muxu suxine raxɛtɛma waxatin naxan yi, n fa e ra yamanani n naxan so e benbane yii, e yi dɔxɔ a yi,’ Alatala naxa na kiini.”
4 Alatala falani itoe nan ti lan Isirayila nun Yuda yamanane ma, a naxa,
5 “Alatala ito nan falaxi, a naxa, ‘En gbelegbele xuiin mɛma. Gaxun nan na ra, bɔɲɛ xunbeli mi fa na.
6 Ɛ maxɔdinna ti, xa xɛmɛn nɔɛ diin barɛ! Nanfera nayi, xɛmɛne birin e tagin suxi alo ɲaxanla nɛma dii barini? Nanfera birin yɛtagini tɔɲɔnxi?
7 Gbalo lɔxɔ gbeen nan a ra! A ɲɔxɔn mi na. Waxati xɔdɛxɛn nan na ra Yaxuba bɔnsɔnna xa, koni e xunna minima a yi nɛn, e kisi.’”
8 “Alatala Sɛnbɛn Birin Kanna falan ni ito ra, a naxa, ‘Na lɔxɔni, n goron tongo wudine kalama nɛn, a ba e kɔɛ ma, n yi e xidi lutine yibolon, n yi e ba xɔɲɛne konyiyaan bun.
9 E yi wali Alatala xa e Ala, e nun Dawuda yixɛtɛna, e mangana, n naxan fima e ma.’
10 Alatalaa falan ni ito ra, a naxa, ‘Ɛ tan Yaxuba yixɛtɛne, n ma walikɛne, ɛ nama gaxu, Isirayila kaane, ɛ nama kuisan! Bayo, n na ɛ rakisima nɛn, n yi sa ɛ ba yire makuyeni, n yi ɛ bɔnsɔnna ba yamanani e sa konyiyani dɛnaxan yi. Yaxuba bɔnsɔnna muxune mɔn xɛtɛma nɛn, e yi lu maraxaran nun bɔɲɛ xunbenli. E mi fa yimaxɛ sɔnɔn!
11 Bayo, n luma nɛn ɛ xɔn, alogo n xa ɛ rakisi. N siyane birin naxɔrɛ nɛn, n na ɛ raxuyaxi ayi naxanye yɛ, koni n mi ɛ tan naxɔrima. N na ɛ xuruma nɛn alo a lan kii naxan yi, bayo n mi ɛ yatɛma sɔntarene ra.’ Alatalaa falan nan na ra.”
12 “Alatala ito nan falaxi, a naxa, ‘Ɛ ɲaxankatan mi dandanɲɛ, ɛ furen magaxu.
13 Muxu yo mi ɛ xun mafalama, ɛ fure dɛɛn dandan muxu mi na, a seri mi ɛ tan yii.
14 Ɛ xɔyine birin bata ɲinan ɛ xɔn, e mi fa ɛ fenma sɔnɔn. Bayo, n bata ɛ ɲaxankata alo yaxuna, n yi ɛ hakɛ gbeene nun ɛ yulubi wuyaxine saran ɛ ra a ɲaxin na.
15 Nanfera ɛ wugama ɛ ɲaxankatan nun ɛ tɔrɔyaan bun naxan mi nɔɛ dandanɲɛ? N na ligaxi ɛ ra ɛ hakɛ gbeene nun ɛ yulubi wuyaxine nan ma fe ra.’”
16 “‘Koni naxan yo na wa ɛ raxɔri feni, na fan naxɔrima nɛn. Ɛ yaxune birin xalima nɛn konyiyani. Naxanye birin fuma ɛ yiiseene ma, muxune fuma ne fan yiiseene ma nɛn. Naxanye ɛ suxuma yɛngɛni, ne fan birin suxuma nɛn yɛngɛni.’
17 Alatalaa falan ni ito ra, a naxa, ‘Koni n mɔn ɛ rasabatima nɛn, n yi ɛ rakɛndɛya ɛ furene ma, bayo e a falama ɛ ma nɛn a yama ramɛxina, muxe mi a yengi dɔxi naxan xɔn, Siyon taana.’
18 Alatala ito nan falaxi, a naxa, ‘N mɔn Yaxuba bɔnsɔnne yigiyadene rasabatima nɛn, n kininkinin e dɔxɔdene ma. Taa xɔnna mɔn tima nɛn a funfuni. Manga banxin mɔn yi ti a yireni.
19 Bɛti xuiin nun sɛwa xuiin minima nɛn e tagi. N na e rawuyama ayi nɛn, e mi fa xurunɲɛ ayi mumɛ! N binyen fima nɛn e ma, e mi fa rayelefuɛ sɔnɔn.
20 E diine luma nɛn alo a fɔlɔni, e yamaan luma nɛn n yɛtagi. N yi e ɲaxankata muxune kɛwanle saran e ra.
21 E mangan minima e tan nin, e tan nde nan tima e yɛɛ ra. N yi na kanna maso n na, a yi a maso n na, bayo muxun mundun susɛ a masoɛ n na a yɛtɛ ra?’ Alatalaa falan nan na ra.
22 ‘Ɛ findima nɛn n ma yamaan na, n yi findi ɛ Ala ra.’”
23 Alatala gbalon soma nɛn muxu ɲaxine xun na alo foye kala tiina. A xɔlɔn ɲaxankatan yi fa e ma alo wuluwunla.
24 Alatalaa xɔlɔn mi xɛtɛma e fɔxɔ ra fɔ feene rakamali Ala naxanye birin nagidixi a bɔɲɛni. Ɛ xaxili sɔtɔma nɛn na feene xɔn waxati famatɔne yi.