Isaiah 63 in Yalunka
1 Nde ito ra naxan fama sa keli Edɔn yamanani, naxan keli Bosara taani, dugi gbeela ragodoxi a ma, a maxidixi dugi mayilenxini, a sigan tima xunna kenli, a sɛnbɛn binyeni? Ala naxa, “N tan na a ra, naxan falan tima tinxinni naxan muxune rakisima a sɛnbɛni.”
2 Nanfera i ya dugine gbeeli alo naxanye manpa bogine yibodonma manpa ige badeni?
3 Ala naxa, “N kedenna nan yi manpa bogine yibodonma manpa ige badeni siyane muxu yo mi yi n fɛma. Nayi, n yi e yidin n ma xɔlɔni, n fitinaxin yi e yibodon, e wunla yi xuya n ma dugine ra, e yi gbeeli.
4 Bayo gbeeɲɔxɔ lɔxɔna fe yi n bɔɲɛni. N ma yamaan xunba ɲɛɛn bata a li.
5 N muxune fen nɛn, koni muxu yo mi fa n mali! N kabɛ na feen ma, fa fala muxu yo mi fa n sɛnbɛ so. Nayi, n yɛtɛɛn yiin nan marakisini tɔn, n ma xɔlɔn yi findi n sɛnbɛn na.
6 N yi yamanane yibodon n ma xɔlɔni, n fitinaxin yi e halagi, n yi e wunla xuya bɔxɔn ma.”
7 N na Alatala hinan wanle rabirama nɛn muxune ma, a lan a xa tantun naxanye fe ra, Alatala feen naxanye birin ligaxi en xa, a fanna Isirayila yamaan xa naxan gbo, a naxan birin ligaxi a kininkininna nun a hinan gbeeni.
8 Bayo, a bata yi a fala, a naxa, “N ma yamaan nan e ra yati, n ma diin naxanye mi n yanfɛ!” A yi findi e rakisimaan na.
9 E tɔrɔne birin yi a fan tɔrɔ, malekan naxan a yɛtagi, na yi e rakisi. A yɛtɛɛn yi e xunba a xanuntenyaan nun a kininkininni. A tan nan e tongo, a e mali waxati danguxine birin yi.
10 Koni e murutɛ nɛn, e yi a Nii Sariɲanxin nafɔrɔ a ma. A yi findi e yaxun na, a tan yɛtɛɛn yi e yɛngɛ.
11 Nayi, waxati danguxine fe yi rabira a yamaan ma, Musaa waxatina, e yi a fala, e naxa, “Ala minɛn naxan e ragidi baani, e nun a yamaan yɛɛratine? A minɛn, naxan yi a Nii Sariɲanxin nagodoma e tagi?
12 Naxan a yii sɛnbɛmaan makɛnɛn Musa xa, a yi lu a xɔn, a yi igeni taxun e yɛtagi, alogo a xinla xa lu habadan.
13 Nde yi tixi e yɛɛ ra dangu tilinna xɔnna ma? E mi e sanna radin alo soon nɛma a giyɛ tonbonni.
14 Alatalaa Nii Sariɲanxin yi e xali matabuni alo xuruseen naxan godoma lanbanni. I tixi i ya yamaan yɛɛ ra na kii nin i yi xili binyen sɔtɔ.”
15 Ala, i yɛɛ masa nxu ma keli kore, i nxu mato, sa keli i dɔxɔde sariɲanxi nɔrɔxini. I ya xanuntenya gbeen nun i sɛnbɛ gbeen minɛn? Nxu mi fa i ya marafanna nun i ya kininkininna toma.
16 Anu, i tan nan nxu fafe ra! Hali xa nxu benba Iburahima mi nxu kolon, xa nxu benba Isirayila fan mi nxu kolon, i tan Alatala, i tan nan nxu fafe ra, i xili nɛn, Nxu Xunbamana xabu to mi na ra.
17 Nanfera Alatala, i nxu makuyama i ya kiraan na, i nxu bɔɲɛni xɔdɔxɔ alogo nxu nama gaxu i yɛɛ ra? I mɔn xa fa i ya walikɛne fe ra, i kɛɛ bɔnsɔnna fe ra.
18 Yamanan findixi nɛn i ya yama sariɲanxin gbeen na waxatidi tun, nxu yaxune yi i ya yire sariɲanxini bodon.
19 Xabu waxati xunkuye nxu luxi nɛn alo i mi yi muxun naxanye kari ra, e nun i xinla mi falama naxanye xun ma. Xa i yi kuyeni bɔɛ nun, xa i yi godɛ nun, geyane yi yimaxama i bun ma nɛn.