Isaiah 40 in Yalunka

1 Ɛ Ala naxa, “Ɛ n ma yamaan madɛndɛn, ɛ a madɛndɛn!

2 Ɛ Yerusalɛn kaane ralimaniya, ɛ a rali e ma, a e ɲaxankata wanle bata ɲan. A e bata mafelu e hakɛn na, e bata yelin e yulubine saranna sɔtɛ Alatala yii han dɔxɔ firin!”

3 Muxuna nde xuiin minima, a naxa, “Ɛ kirani tɔn Alatala yɛɛ ra tonbonni, ɛ kira tinxinxin nafala en ma Ala xa burunna ra!

4 Ɛ folone birin naxutu, ɛ geyane nun yire matexine birin wuru. Yire tintinxine yi matinxin, gɛmɛ yirene yi findi lantane ra.

5 Nayi, Alatalaa binyen minima nɛn kɛnɛnni, daala birin yi a to!” Alatala dɛ xuiin nan na ra.

6 Muxuna nde a falama, a naxa, “I xui ramini!” N yi a fala, n naxa, “N xa nanse fala?” A naxa, “Adamadiine birin luxi nɛn alo sɛxɛna e binyen birin yi lu alo se fugena.

7 Alatala dɛ foyen na dangu sɛxɛne fari, e xarama nɛn, e fugene yi yolon. Yamaan luxi nɛn alo sɛxɛna yati!

8 Sɛxɛne xarama nɛn, e fugene yi yolon, koni en ma Alaa falan luma nɛn habadan.”

9 Ɛ tan Siyon kaan naxanye sa xibaru faɲin xɛrayani bama, ɛ te geya matexin fari, ɛ xuini te han, ɛ tan Yerusalɛn kaan naxanye sa xibaru faɲin xɛrayani bama. Ɛ xuini te, ɛ nama gaxu. Ɛ a fala Yuda yamanan taane xa, ɛ naxa, “Ɛ Ala ni i ra!”

10 A mato, Marigina Alatala fama fangani. A mangayaan nabama a sɛnbɛni. A fama a yama xunbaxin na, a naxan sɔtɔxi a kɔntɔnna ra.

11 A a yamaan masuxuma alo xuruse rabana. A yɛxɛɛ diine tongoma nɛn a yii, a yi e xali a yii kanke, a ti e ngane yɛɛ ra a fanni.

12 Nde fɔxɔ igene saxi a yiin kui, a yi e maliga, a kore xɔnna danne maliga a yiin na? Nde bɔxɔn bɛndɛn yatɛxi deben kui, a geyane yiliga sikeela ra, a yire matexine binyan yatɛn kolon ligaseen xɔn?

13 Nde Alatala miriyane kolon? Nde nɔɛ findɛ a kawandi muxun na, a yi a rakɔta?

14 Ala nde maxɔdinxi a maxadi feen na, alogo a xa xaxinla sɔtɔ? Nde a xaranxi kiti kɛndɛ saan ma? Nde a xaranxi fekolonna ma? Nde xaxilimayaan kiraan yitaxi a ra?

15 Siyane luxi nɛn alo igen dindinna palanna kui. E mi yatɛxi se ra alo gbangbanna na sa sikeela fari. Fɔxɔ ige tagi bɔxɔne yelefu alo gbangbanna naxan tema.

16 Liban yamanan subene birin xurun saraxan na naxan yi daxa nun a ba Ala xa, a wudine mi wuya naxanye findɛ saraxa gan tɛɛn yegene ra.

17 Sese mi siyane ra a yɛɛ ra yi! Ala ne yatɛxi fufafuun nan na. A yigenla fisa e xa!

18 Ɛ waxi Ala sa feni nde ma? Ɛ sawuran mundun yitɛ e nun naxan maliga?

19 Xabun nan sawuran nafalama suxuren na, xɛma wanla yi xɛmaan sa a ma, a yi kɔɛ bira yɔlɔnxɔn wure gbeti daxine rafala.

20 Yiigelitɔɔn naxan mi nɔɛ na sɔtɛ a gbee ala xa, na kanna wudi xɔdɛxɛn nan sugandima, a yi xabu kesuxin fen, na yi suxuren nafala a xa naxan mi kalama.

21 Ɛ mi a kolon ba? Ɛ mi a mɛxi ba? A mi ralixi ɛ ma ba, xabu a fɔlɔni? Bɔxɔn bɛtɛn saxi kii naxan yi, ɛ munma na famu ba?

22 A tan nan dɔxi bɔxɔ xɔri digilinxin xun ma, muxune fan luxi a yɛɛ ra yi nɛn alo suɲɛne. A kore xɔnni fulunma alo dugi yelefuxina xunna soon na, alo gagena a dɔxɔden na.

23 A tan nan kuntigine sɛnbɛn kalama, e lu fuyan, a yi bɔxɔ xɔnna kitisane lu fuu.

24 E luxi nɛn alo sansina. E nɛɛn fa si tun, e na woli xɛɛn ma tun, salen yɛtɛ mi e binle ma singen, Alaa foyen yi fa e ma, e xara, wuluwunla yi e xali alo se dagina.

25 Ala sariɲanxin naxa, “Ɛ n misalima nde ma, nxu nun naxan lan?”

26 Ɛ yɛɛne rate kore, ɛ a mato! Nde na seene daxi? Nde e ganla dɛfexin naminima, a yi e birin xili e xinla ra? Fata a fanga gbeen nun a sɛnbɛ magaxuxin na, keden peen mi dasama.

27 Yaxuba bɔnsɔnna, nanfera ɛ a falama, Isirayila yixɛtɛne, nanfera ɛ a falama, ɛ naxa, “Nxɔ kiraan bata luxun Alatala ma, nxɔ Ala mi fa nxu xun mafala kitin sama?”

28 I mi a kolon ba? I mi a mɛxi ba? Alatala nan habadan Ala ra, naxan bɔxɔn danne birin daxi. A mi xadanma, a mi taganma. A xaxilimayaan mi nɔɛ fɛsɛfɛsɛ!

29 A fangan fima muxu xadanxine ma, a muxu taganxine sɛnbɛn xun masa.

30 Banxulanne yɛtɛɛn xadanma, e tagan, foningene yi bira xadanni.

31 Koni naxanye xaxili tixi Alatala ra, ne mɔn sɛnbɛn sɔtɔma nɛn. E tuganma nɛn alo singbinna, e yi e gi, e mi xadan, e lu sigan tiyɛ, e mi tagan.