Isaiah 38 in Yalunka
1 Na waxatini, saya furen yi Xesekiya suxu. Nabi Esayi, Amɔsi a diin yi fa a fɛma, a yi a fala a xa, a naxa, “Alatala ito nan falaxi, a naxa, ‘I ya feene yitɔn, amasɔtɔ i faxamatɔɔn ni i ra, i mi fa siimaya sɔtɔma.’”
2 Xesekiya yi a yɛɛ rafindi banxin kanken ma, a maxandini ito ti Alatala ma, a naxa,
3 “Alatala, n ma fe xa rabira i ma fa fala, n sigan ti nɛn i yɛtagi lannayaan nun bɔɲɛ faɲiyani, naxan fan i yɛɛ ra yi, n yi na liga!” Xesekiya yi wuga han.
4 Nayi, Alatala yi falan ti Esayi xa, a naxa,
5 “Siga, i sa a fala Xesekiya xa, i naxa, ‘I fafe Dawudaa Ala, Alatala ito nan falaxi, a naxa: N bata i ya maxandi xuiin mɛ, n bata i yɛɛgen to. N mɔn ɲɛɛ fu nun suulun sama nɛn i ya siimayaan fari.
6 N ni i tan nun i ya taan xunbama nɛn Asiriya mangan yii, n taani ito kantanma nɛn.’”
7 Esayi yi a fala a xa, a naxa, “Alatala taxamasenni ito nan yitama i ra, alogo i xa a kolon fa fala Alatala naxan falaxi, a na ligama nɛn, a naxa,
8 ‘N nininna raxɛtɛma nɛn xanbin na Axasi a banxin teden ma sanna yɛ fu.’” Nayi, nininna yi xɛtɛ xanbin na banxin teden ma sanna yɛ fu.
9 Yuda mangan Xesekiya bɛtini ito nan sɛbɛ, a to fura, a yi keli furen ma.
10 N yi a falama nɛn, n naxa, “N nɛɛn fa n ma siimayaan tagiin li tun, n sigama nɛn laxira so dɛɛne ra n yi bɔnɔ n ma siimayaan lɔxɔ dɔnxɛne yi!”
11 N mɔn yi a falama nɛn, n naxa, “N mi fa Alatala toma sɔnɔn niiramane tagi bɔxɔ xɔnna fari, Alatala! N mɔn mi fa muxu yo toma sɔnɔn muxune yɛ dunuɲa yi!
12 N fati bɛndɛna n niin yigiyadeni ito bata kala, a makuya n na a lu alo xuruse rabana bubuna. N bata n ma siimayaan mafilin alo gɛsɛ wurundunxina. N ma gɛsɛn bata bolon. Xɔtɔnna nun ɲinbanna tagi, i n naɲanma nɛn!
13 N bata n naxara han xɔtɔnni, koni alo yatana, a bata n xɔnne birin yixin. Yanyin nun kɔɛɛn na, i bata n naɲan.
14 N wuga xuiin mini nɛn alo tuntunna nɛma tuganɲɛ, n lu kutunɲɛ alo ganbana. N yɛɛne lu nɛn tixi kore tɔrɔni, n yi lu a falɛ, n naxa, ‘Marigina, n ɲaxankataxi, n mali!’”
15 N fa nanse falama? A bata falan ti n xa. A tan yɛtɛɛn nan feni ito ligaxi. N sigan tima nɛn yɛtɛ magodoni n ma siimayaan birin yi n niin sɔxɔlɛni ito a fe ra.
16 Marigina, siimayaan sɔtɔma i ya fanna nin, n mɔn n nii ra a tan nan xɔn. I bata n sɛnbɛ so, i yi n nakɛndɛya.
17 N ma tɔrɔyaan bata maxɛtɛ bɔɲɛ xunbenla ra. I tan nan n niin masigaxi sayaan na, n to rafanxi i ma, i yi i xun xanbi so n yulubine birin yi.
18 Laxira xa mi i tantunma. Sayaan xa mi i matɔxɔ bɛtin bama. Faxa muxune nɛma sama gaburun na, ne yengi mi fa i ya lannayaan ma.
19 Koni naxanye e nii ra, niiramane, ne nan i tantunma alo n tan to. Fafane i ya lannayana fe falama nɛn e diine xa.
20 Alatala bata n nakisi! Nayi, nxu nxɔ maxaseene xuiin naminima nɛn Alatala Batu Banxini nxu siin sogen dɔnxɛn birin yi.
21 Esayi bata yi a fala, a naxa, “Ɛ xɔdɛ bogi yidinxina nde tongo, ɛ a sa a furen dɛ, a yalanma nɛn.”
22 Xesekiya bata yi a fala, a naxa, “N na kolonma taxamasenna mundun xɔn fa fala a n sigama Alatala Batu Banxini?”