Isaiah 37 in Yalunka

1 Manga Xesekiya to na mɛ, a yi a dugine yibɔ a ma, a kasa bɛnbɛli dugin nagodo a ma sununi, a siga Alatala Batu Banxini.

2 A yi Eliyakimi rasiga, mangana banxi kuntigina e nun Sebena, sɛbɛli tiina e nun saraxarali fonne, kasa bɛnbɛli dugin nagodoxi e ma sununi siga Nabi Esayi konni, Amɔsi a dii xɛmɛna.

3 E yi a fala nabiin xa, e naxa, “Xesekiya naxa iki: ‘Kɔntɔfinla nun tɔrɔn nun yagi lɔxɔn nan to ra nxu xa, diin bari waxatin bata a li, koni fanga mi a nga ra a yi a bari.

4 Alatala, i ya Ala bata Asiriya sofa kuntigina falane birin namɛ, naxan kari a rafaxi habadan Alatala konbideni. Xa Ala tin, Alatala, i ya Ala a ɲaxankatama nɛn a falane fe ra a naxanye tixi. Nayi, i tan Esayi xa Ala maxandi yama dɔnxɛna fe ra.’”

5 Manga Xesekiyaa xɛrane to siga Esayi fɛma,

6 Esayi yi a fala e xa, a naxa, “Ɛ ito nan falama ɛ kanna xa, ɛ naxa, ‘Alatala ito nan falaxi, a naxa: I falan naxanye mɛxi i nama gaxu ne fe ra, Asiriya mangana walikɛne n nayelefu falan naxanye tixi.

7 N xaxinla nde rasoma a yi nɛn, a na xibarun mɛ waxatin naxan yi, a xɛtɛma nɛn a yamanani. N yi sa a faxa silanfanna ra mɛnni.’”

8 Asiriya sofa kuntigin yi a mɛ a kanna bata yi keli Lakisi taani siga Libina yɛngɛdeni, a fa a li mɛnna nin.

9 Nayi, Asiriya mangan yi a mɛ a Misiran mangan Tirihaka, Kusi kaan fama a yɛngɛdeni. A na fe mɛxina, a yi xɛrane rasiga Xesekiya ma, a naxa,

10 “Ɛ sa ito fala Yuda mangan Xesekiya xa, ɛ naxa, ‘I laxi i ya Ala ra ɲaxi ra, i yengi a ma a nɔɛ nɛn n tan Asiriya mangani kalɛ Yerusalɛn yɛngɛdeni. I nama tin Ala yi i mayenden.

11 I bata a mɛ Asiriya mangane feen naxanye ligaxi yamanan bonne ra, e e raxɔrixi kii naxan yi. I yengi a ma a i xunbɛ nɛn na ma ba?

12 N benbane siyaan naxanye alane raxɔri, ne e xunba nɛn ba, Gosan nun Xarani nun Resefi yamanane, e nun Eden kaan naxanye Telasara taani?

13 Manga Xamata nun Manga Arapada nun Sefarawayimi taa mangana hanma Hena, hanma Iwa, ne mangane minɛn yi?’”

14 Xesekiya yi kɛdi sɛbɛxin nasuxu xɛrane yii, a yi a xaran. Na xanbi ra, a te Alatala Batu Banxini, a sa kɛdin sa Alatala yɛtagi.

15 Xesekiya yi Alatala maxandi, a naxa,

16 “Alatala Sɛnbɛn Birin Kanna, Isirayilaa Ala, naxan dɔxi maleka sawurane tagi! I tan Ala keden peen nan bɔxɔ xɔnna mangayane birin xun na, i tan nan bɔxɔn nun kuyen daxi.

17 Alatala, i tuli mati n na, i n xuiin namɛ. Alatala, i yɛɛne rabi, i n mato. I Sɛnakɛribi a falani itoe birin namɛ, a sofa kuntigin naxanye rafaxi habadan Ala konbideni.

18 Alatala, ɲɔndin na a ra! Asiriya Mangan bata siyane raxɔri, a yi e bɔxɔne kala.

19 E bata e alane woli tɛɛni, bayo Ala mi yi e ra nun mumɛ, muxune yii funfune nan yi e ra, wudine nun gɛmɛ masolixine nan tun yi e ra.

20 Iki, Alatala, nxɔ Ala! Nxu xunba Sɛnakɛribi yii, alogo bɔxɔ xɔnna yamanane birin xa a kolon a i tan keden peen nan Ala ra, Alatala!”

21 Nayi, Esayi, Amɔsi a dii xɛmɛn yi xɛraan nasiga a faladeni Xesekiya xa, a naxa, “Isirayilaa Ala, Alatala ito nan falaxi, a naxa: N bata i ya maxandi xuiin mɛ i naxan tixi n ma Sɛnakɛribi a fe yi, Asiriya mangana.

22 Alatala falani ito nan tixi Sɛnakɛribi xili ma, a naxa, ‘Siyon taa faɲin bata i raɲaxu, a i magelema. Yerusalɛn kaane e xunna fitifitima i xanbi ra.

23 I nde konbixi i a rayelefu? I xuini texi nde xili ma? I bata i yɛɛne rate kore Isirayilaa Ala Sariɲanxin xili ma!

24 Fata i ya xɛrane ra, n tan Marigina, i bata n konbi. I yi a fala, i naxa, “N ma wontoro wuyaxine xɔn, n bata te geyane xuntagi, Liban yamanan danne ra. N na a wudi kuyene sɛgɛma nɛn, e nun a suman wudi faɲi faɲine. N sa a xuntagin naɲanna li e nun a fɔtɔn faɲina.

25 N bata xɔɲinne ge yamana gbɛtɛne yi, n yi e igen min. N Misiran baa igene birin xɔrima nɛn n na siga a xili ma waxatin naxan yi.”

26 Koni, i tan Sɛnakɛribi, i mi a kolon a n feni itoe yɛlanxi nɛn to mi na ra? N yi e yitɔn xabu waxati danguxine. Iki, n bata yamarin fi, a rakamali, i xa taa makantanxine lu kalaxi alo gɛmɛ malanxine.

27 E muxune sɛnbɛ mi na, e gaxuxi, e yagixi. E bata lu alo xɛɛ ma sɛxɛne alo se sonle, alo sɛxɛn fanyen ma naxan xarama benun a xa gbo.

28 Koni, n na a kolon, i na dɔxɔ, i na mini, i na so, i na xɔlɔ n xili ma.

29 I bata xɔlɔ n xili ma, n yi i konbi ti xuiin mɛ. Nanara, n nan n ma wuren birama nɛn i ɲɔɛni n yi n ma karafen bira i dɛ kidine yi. I faxi kiraan naxan xɔn n yi i raxɛtɛ na xɔn.’

30 Ala ito nan falaxi i tan Xesekiya xa, a naxa, ‘Ito xa findi taxamasenna ra i xa: Bogiseen naxanye solixi e yɛtɛ ma, ɛ bata ne don ɲɛɛni ito ra, na nan mɔn ligama ɲɛɛ famatɔni, koni ɲɛɛ saxandeni, ɛ seen sima nɛn, ɛ yi a xaba, ɛ yi manpa binle si, ɛ yi e bogine don.

31 Yuda bɔnsɔnna muxu dɔnxɛn naxanye na lu, ne mɔn e salenne raminima nɛn alo wudina, e bogi.

32 A dɔnxɛne minima nɛn Yerusalɛn yi, a dɔnxɛne luma nɛn e nii ra Siyon geyane yi. Alatala Sɛnbɛn Birin Kanna na nan ligama a xanuntenyani.’”

33 Nanara, Alatala ito nan falaxi Asiriya Mangan ma iki, a naxa, “A mi soɛ taani ito yi mumɛ! A mi xalimakuli wolɛ be yi. A mi makantan wure lefa tima a xa. A mi gbingbin natema a xili ma.”

34 Alatalaa falan ni ito ra. A naxa, “A faxi kiraan naxan xɔn a xɛtɛma nɛn na xɔn. A mi soɛ taani ito yi mumɛ.

35 N taani ito makantanma nɛn, n yi a rakisi, n tan ma fe ra e nun Dawuda a fe ra, n ma walikɛna.”

36 Na xanbi ra, Alatalaa malekan yi mini, a muxu wuli kɛmɛ tonge solomasɛxɛ wuli suulun faxa Asiriya kaane ganli. Yamaan to keli xɔtɔnni, e yi e binbine to.

37 Nayi, Asiriya mangan Sɛnakɛribi yi a ganla rakeli, a xɛtɛ Niniwa yi.

38 Lɔxɔna nde, Sɛnakɛribi yi xinbi sinxi a ala Nisiroki batu banxini a batudeni, a dii xɛmɛne Adarameleki nun Sareseri yi a faxa silanfanna ra, e yi e gi siga Ararati yamanani. A dii Esaraxadon yi dɔxɔ a ɲɔxɔni.