Isaiah 30 in Yalunka
1 Alatalaa falan ni ito ra, a naxa, “Gbalona ɛ tan dii murutɛxine xa! Ɛ feene yitɔnma naxanye mi kelixi n tan ma. Ɛ layirine xidima naxanye mi fataxi n ma Nii Sariɲanxin na. Ɛ yulubine sama e bode fari.
2 Ɛ sigama Misiran yamanani, koni ɛ mi n maxɔdinma. A xɔnla ɛ ma Misiran mangan xa ɛ kantan, ɛ yi yigiyaden fen Misiran sɛnbɛn bun alo nininna!
3 Koni Misiran Mangana makantanna findima ɛ xa yagin nan na. Ɛ yigiyaden naxan fenma Misiran kaane fɛma na yi ɛ yigin kala.
4 Kuntigine bata sa Soyan taan li, xɛrane bata Xanɛsi taan li.
5 Koni e birin nayagima nɛn bayo na yamanan tɔnɔ yo mi e ma. Misiran kaane mi ɛ malima, e mi munanfan yo fima ɛ ma. E yagin nun yarabin nan tun nalima ɛ ma.”
6 Waliyiya falana subene xili ma Negewi tonbonni: E xɛrane danguma gbalo yiren nun tɔrɔ yiren nin yata xɛmɛne nun yata gilɛne dɛnaxan yi, e nun fɔdɔgɔne nun saɲi ɲaxin naxanye tuganma. E nafunle maxalima sofanle nan fari e nun e sɔtɔ seene ɲɔgɔmɛne fari, sanbane nan ne ra na yamanan xa naxan tɔnɔ mi na.
7 E sigama Misiran yi naxan ma maliin findima fe fuun na, sese mi a ra! Nanara, n na a xili bama Ninginanga Narixina.
8 Marigin yi a fala Esayi xa, a naxa, “Iki, feni itoe sɛbɛ kɛdina nde kui Yerusalɛn kaane yɛtagi e nun walaxan fari alogo a xa lu na waxati famatɔne yi habadan han habadan.”
9 Yama murutɛxin nan ito ra, diidi wule falane, diidin naxanye tondima Alatala sariyan namɛ.
10 E a falama fe toone xa, e naxa, “Ɛ nama fa fe toon ti sɔnɔn!” E a falama nabine xa, e naxa, “Ɛ nama ɲɔndin makɛnɛn nxu xa! Ɛ fe faɲin nan ma fe fala nxu xa. Ɛ nxu rafan feene fala nxu xa, hali a findi wulen na.
11 Ɛ keli kira faɲin xɔn, ɛ a beɲin. Ɛ ba Isirayilaa Ala Sariɲanxina fe yɛbɛ nxu xa!”
12 Nanara, Isirayilaa Ala Sariɲanxina ito nan falaxi, a naxa, “Ɛ to ɛ mɛma n ma falane ra ɛ yi ɛ yigi sa ɛ muxu ɲaxankata feene nun ɛ muxu mayanfa feene yi,
13 nayi, na hakɛn luma ɛ xa nɛn alo taan makantan yin matexin na bɔ fɔlɔ! Mɛnna na tintin, a birama nɛn sa!
14 A yibɔma nɛn a xunxurin na alo fɛɲɛ goronna, a yensenɲɛ ayi kininkinintareyani, hali a dungi xungbena a mi toɛ a dungine yɛ naxan findɛ tɛɛ kɔ seen na hanma ige sɛgɛ sena.”
15 Marigina Alatala Isirayilaa Ala Sariɲanxin naxa, “Ɛ na ɛ xun xɛtɛ n ma, ɛ raxara, ɛ kisin sɔtɔma na nin. Ɛ na ɛ sabari, ɛ yigi sa n yi, ɛ sɛnbɛn sɔtɔma na nin.” Koni na xɔli mi ɛ ma.
16 Ɛ a falama, ɛ naxa, “Nxu nxu gima nɛn soone fari!” Nayi, ɛ ɛ gima nɛn yati! Ɛ naxa, “Nxu nxu gima nɛn soo xulumɛne fari!” Nanara, ɛ sagatan muxune fan xulunma ayi nɛn kati!
17 Ɛ muxu wuli kedenna e gima nɛn ɛ yaxun muxu kedenna bun, yaxun muxu suulun pe na e kɔnkɔ ɛ ma, ɛ birin ɛ gima nɛn. Naxanye na lu ɛ tagi, ne luma nɛn kedenyani alo taxamaseri dugin wudi kuyen ɲɔɛ ra geyaan xuntagi.
18 Anu, Alatala ɛ mamɛma alogo a xa hinan ɛ ra, a kelima nɛn a yi a kininkininna yita ɛ ra. Ala naxan kiti kɛndɛn sama, na nan Alatala ra. Sɛwan na kanne xa naxanye e xaxili tima a ra.
19 Ɛ tan Siyon kaane, ɛ tan naxanye dɔxi Yerusalɛn yi, ɛ mi fa wugama sɔnɔn! Ɛ na ɛ xui ramini a ma, a hinanma ɛ ra nɛn han! A na ɛ xuiin mɛ tun, a ɛ yabima nɛn.
20 Marigin tɔrɔyaan nun mayigbɛtɛnna ragidi nɛn ɛ ma ɛ donseen nun ɛ min igen na. Koni ɛ karamɔxɔ mi fa a luxunma ɛ ma, ɛ a toma nɛn ɛ yɛɛn na.
21 I na siga yiifanna ma hanma kɔmɛnna, i fala xuiin mɛma nɛn i xanbi ra, a naxa, “Kiraan ni ito ra, siga a xɔn!”
22 Ɛ suxure gbeti daxine nun a xɛma daxine yatɛma nɛn se haramuxine ra, e woli ayi alo ɲamana, i yi a fala e ma, i naxa, “Xɔsina.”
23 Nayi, Ala tulen nafama nɛn i ya sansi sixine ma, bɔxɔn yi balo faɲi gbeen fi i ma. Na lɔxɔni, i ya xuruseene sa e dɛ madonma nɛn xuruse rabade gbeene yi.
24 Ɲingene nun sofanla naxanye xɛɛn bima, ne yi balo ɲaxumɛn don fɔxɔn saxi naxan yi naxan sama e bun se kɔ seen nun sansi yife seen na.
25 Faxa gbeen tima lɔxɔn naxan yi, taan makantan sangansone na bira waxatin naxan yi, folone nun xudene rafema nɛn geya gbeene nun yire matexine birin yi.
26 Kiken dɛgɛma nɛn alo sogena na lɔxɔni, sogen dɛgɛn yi gbo ayi dɔxɔ solofere dangu a ki fonna ra. Na lɔxɔni, Alatala a muxune maxɔlɔdene dandanma nɛn, a yi e fure dɛɛne yiyalan, a tan yɛtɛɛn naxanye maxɔlɔ.
27 A mato, Alatala sɛnbɛn fama sa keli wulani, a fama xɔlɔ gbeen nun ɲaxankatan nan na, a fitinaxin yi falan ti alo tɛɛn naxan halagin tima.
28 A nii raxinla luxi nɛn alo baan na walanɲɛ ayi naxan bɔxɔnma a ma a te han muxun kɔɛɛn bun. Nayi, a siyane yimaxama nɛn a halagi ti segedenna ra. A yi karafen bira xɔɲɛ yamane dɛni, naxan e rasigama yireni dɛnaxan xɔli mi e ma.
29 Ɛ tan Yerusalɛn kaane, ɛ bɛtin bama nɛn alo sali lɔxɔn kɔɛna. Ɛ bɔɲɛn sɛwama nɛn alo muxune nɛma sigɛ xulen xuini Alatalaa geyaan fari, Isirayila kantan fanyena Ala.
30 Alatala a xui gbeen naminima nɛn a yi a sɛnbɛ gbeen makɛnɛn. A yi a xɔlɔ gbeen nagodo alo halagi ti tɛɛ gbeena, tule ige gbeen nun galanna nun balabalan kɛsɛne yi godo.
31 Asiriya kaane na Alatala xuiin mɛ, e xuruxurunma nɛn gaxuni a bosaan bun ma.
32 Alatala ne xuruma bosaan yɛɛn naxanye birin na, ne ligama tanbanna nun bɔlɔn xuiin nin, a nɛma e yɛngɛma a sɛnbɛni.
33 Tɛɛni tɔnxi xabu to mi na ra! A yitɔnxi mangan xili yi yili gbee tilinxin na, yege gbeen nun tɛɛ gbeen naxan na. Alatala nii raxinla nan minima alo dole tɛɛn xudena, a na tɛɛn nadɛgɛ.