Isaiah 28 in Yalunka

1 Gbalon Samari taan xa, naxan maligaxi manga kɔmɔtin na naxan findixi Efirami yamanan dɔlɔ minne xunna kenla ra, naxanye nɔrɔn luxi alo se fugen yolonmatɔna, taan naxan mɛrɛmɛrɛ ɲingixin xun ma, dɔlɔn bata naxan muxuye kala.

2 A mato, Marigina walikɛ sɛnbɛmaan fama nɛn, alo balabalan kɛsɛne foye gbeeni alo tulen foye kala tiin naxan fama fufaan na a yi taan nagodo bɔxɔni a fangani.

3 Taan naxan luxi alo mangaya kɔmɔtina, naxan findixi Efirami dɔlɔ minne xunna kenla ra, na yibodonma nɛn.

4 Taan naxan nɔrɔn luxi alo fugen yolonmatɔna naxan tixi mɛrɛmɛrɛ ɲingixin xun ma, na luma nɛn alo xɔdɛ bogi singen naxan mɔma benun se xaba waxatin xa a li. Muxu yo na a to, na kanna a bama nɛn kedenna, a yi a don sa!

5 Na lɔxɔni, Alatala Sɛnbɛn Birin Kanna nan findima manga kɔmɔtin na a yamaan muxu dɔnxɛne xa naxanye na lu e nii ra, alo mangaya taxamaseri nɔrɔxina.

6 A xaxinla fima nɛn kitisane ma alogo e xa kiti kɛndɛn sa. A yi fangan fi muxune ma naxanye yaxune kedima taan so dɛɛn na.

7 Hali e saraxaraline nun e nabine tantanma dɔlɔn xɔn. Manpaan bata e xunna firifiri. Manpaan bata e ratantan. Dɔlɔn bata e xaxinli fu, manpaan yi e xunna firifiri. E nɛma fe toon tima alo xiyena, e tantanma, e nɛma kitin sɛ, e a feni fu.

8 E tabanle birin nafexi e baxunna ra, e yiren birin xɔsixi.

9 Na dɔlɔ minne maxɔdinna tima, e naxa, “Esayi ito waxi nde xaran feyi? A a falane yɛbama nde xa? Diidin naxanye baxi xiɲɛn na ba? Dii futen naxanye dɛɛn baxi badeni xiɲɛn na ba?

10 Bayo a naxa, ‘Tɔnne tɔnne fari, tɔnne tɔnne fari. Sɔnne sɔnne fari, sɔnne sɔnne fari. Ndee be, ndee na.’”

11 Awa, nayi, Ala fa falan tima yamani ito xa xɔɲɛne falane nun xui gbɛtɛne nan xɔn, e mi naxanye famuma.

12 Anu, a bata yi a fala e xa nun, a naxa, “Matabuden nan be ra, xa naxan xadanxi, na xa fa a matabu be. Bɔɲɛ xunbeli yiren nan be ra.” Koni e tondixi e tuli matiyɛ.

13 Nayi, Alatala falan tima e xa na kii nin yati, a naxa, “Tɔnne tɔnne fari, tɔnne tɔnne fari. Sɔnne sɔnne fari, sɔnne sɔnne fari. Ndee be, ndee na,” alogo e nɛma sigan tiyɛ, e xa bira e xanbiramaan na, e maxɔlɔ, e yi e suxu lutin na, e sa kasoon na.

14 Ɛ tan magele tiin naxanye Yerusalɛn yamaan xunna, ɛ tuli mati Alatalaa falan na!

15 Ɛ a falama, ɛ naxa, “Nxu bata layirin xidi nxu nun sayaan tagi, nxu bata lanna raso nxu nun laxira tagi. Xa gbalon fa, a mi nxu konna lima, amasɔtɔ nxu bata wulene findi nxu yigiyaden na, nxu yi mayifu falane findi nxu luxunden na.”

16 Nanara, Marigina Alatala ito nan falaxi, a naxa, “N bata gɛmɛna nde dɔxɔ Siyon taani alo banxin tongon gɛmɛ faɲi yɛbaxina. Naxan na dɛnkɛlɛya a ma, na mi yimaxɛ mumɛ!”

17 N kiti kɛndɛn nun tinxinyaan findima n ma banxin ti se tinxinxine nan na, koni balabalan kɛsɛne ɛ yigiyaden makɔma nɛn, ɛ wulene, igen yi sa ɛ luxunden xun ma.

18 Layirin naxan ɛ nun sayaan tagi, na yi kala. Lanna naxan ɛ nun laxira tagi, na mi fa luma na. Gbalon na fa waxatin naxan yi, a yi ɛ halagi.

19 A na fa waxati yo yi, a ɛ xalɛ a yii, bayo a danguma nɛn xɔtɔnna nun yanyin nun kɔɛɛn na. Gaxun nan tun a ra, a xuiin bunna na famu waxatin naxan yi.

20 Saden xurunma ayi nɛn saden na, bitinganna yi dungi ayi mafelenna ra.

21 Alatala mɔn kelima nɛn alo a liga kii naxan yi Perasimi geyaan fari. A bɔɲɛn tema nɛn alo a liga kii naxan yi Gabayon lanbanni, alogo a xa a wanle rakamali naxanye makabɛ, a kɛwali magaxuxine.

22 Awa iki, ɛ magelen dan. Xanamu, ɛ xidi yɔlɔnxɔnne mɔn gbɛtɛnma nɛn ɛ yi. Marigina Alatala Sɛnbɛn Birin Kanna na nan falaxi n xa, a bata a ragidi a xa yamanan birin halagi.

23 Ɛ tuli mati n xuiin na. Ɛ xaxili lu n ma falane xɔn.

24 Xɛɛ biin na wa sansiin si feni, a luun bɔxɔn biin nan tun fari waxatin birin yi ba? A luma a bɔxɔn nawalɛ nɛn ba, a buxa dan mi naxan na?

25 Koni a na yelin a bɔxɔni tɔnɲɛ waxatin naxan yi, a mi sabi dɛ daxine xan sima na xanbi ra ba? A mi sabi seene siyɛ ba e nun sorontonna? A mi maala nun fundenna wolɛ e xɛɛne yi ba, a sansi gbɛtɛye si xɛɛn dɛ?

26 A Ala nan na tagi raba kiin yitaxi a ra, a yi a xaran a liga kiin ma.

27 Sabidɛ daxine mi bodonma ɲingen xɛɛ ra bɔnbɔ seen na, muxu yo mi wontoron sanne radanguɛ sabi se xun xurine fari e bɔnbɔ seen na, koni ndee bɔnbɔma gbelemɛn nan na, muxune yi nde bodon.

28 Fɔ sansi kɛsɛne xa din nɛn e findi fuɲin na benun burun xa sɔtɔ. Nayi, muxun mi luma a bɔnbɛ han habadan. Hali e wontoron nun a bandun soone radangu a fari, na mi a kɛsɛne findɛ a fuɲin na.

29 Na feene fataxi Alatala Sɛnbɛn Birin Kanna nan na, kabanako kawandi tiin naxan ma fe kolonna gbo han!