Genesis 49 in Yalunka
1 Yaxuba yi a diine xili, a yi a fala e xa, a naxa, “Ɛ malan, n xa feene fala naxanye fama ligadeni ɛ xa waxati famatɔne yi.
2 Ɛ maso, ɛ tuli mati n na Yaxubaa diine. Ɛ tuli mati ɛ baba Isirayila ra.”
3 “Rubɛn, i tan, n ma dii singena, i tan nan n fangan na, naxan singe n sɛnbɛn mayitaxi. I xunnayeren dangu bodene ra i sɛnbɛn gbo.
4 I yɛ yifuxi alo fufana, i mi fisamantenyaan sɔtɔma bayo i bata i sa i baba a saden ma, i yi a xɔsi.”
5 “Simeyɔn nun Lewi ngaxakedenmaan nan e ra. E silanfanna nan e yɛngɛso seen na.
6 N xaxinla nama lu e maxadini, n miriyaan nama lu e malanni, bayo e bata muxune faxa e bɔɲɛ teeni, e bata turane fasane bolon e ɲaxuni.
7 N bata e xɔlɔn danga, bayo e yɛngɛn gidima. N bata e fitinaxin danga, bayo e yɛɛne yixara. N na e raxuyama ayi nɛn Yaxuba bɔnsɔnne yɛ, n mɔn yi e rayensen Isirayila yi.”
8 “Yuda, i xunyɛne i tan nan tantunma. I nɔɔn sɔtɔma nɛn i yaxune xun na. I babaa dii xɛmɛne e xinbi sinma nɛn i xa.
9 Yuda, yata sɛnbɛmaan nan i ra. N ma diina, i baloma suben nan na. I xinbine yidɔxɔma nɛn, i sa alo yatana, alo yata gilɛna, nde susuɛ i rakelɛ?
10 Manga dunganna mi bama Yuda yii. Muxu yo mi manga taxamasenna bama a yii. Han taxamaseri kanna fa waxatin naxan yi, siyane yi xuru a xa.
11 A a sofanla xidima manpa binla nan na, a a sofali diin xidima manpa bili faɲin yiin nan na. A a domaan xama wudi bogi igen nan na alo manpana, a a doma gbeen fan xama bogi se ige gbeela nan na alo wunla.
12 A yɛɛne fɔrɔ wudi bogi ige gbeela xa, A ɲinna fixa nɔnɔn xa.”
13 “Sabulon fama dɔxɔdeni baan nan dɛ. A bɔxɔn findima kunki yigiyaden nan na. A naninna Sidɔn dɛxɔnna nan na.”
14 “Isakari sɛnbɛn luxi nɛn alo sofanla, naxan a sama a goron bɛnbɛli firinna tagi.
15 A saxi bɔxɔn naxan ma, a na yire faɲiyaan to, a tungunni godoma nɛn goronna bun ma, a xuru konyiya wanla bun.”
16 “Dan, a a yamaan makitima nɛn, alo Isirayila bɔnsɔnna bonne.
17 Dan luma nɛn alo saɲina kiraan xɔn ma, alo kosona san ma kiraan dɛ. A yi soon santinban xin, soo ragiin yi bira a fari.
18 Alatala, n xaxili tixi i ya kisin na!”
19 “Gadi, yɛngɛsone a yɛngɛma nɛn, koni a tan nan e rabodonma ayi e san xanbi ra.”
20 “Aseri findima donse xɔri kanna nan na naxan kamalixi mangan dɛge seen na.”
21 “Nafatali luma nɛn alo xɛli gilɛn naxan a gima, a fala faɲine tima.”
22 “Yusufu luma nɛn alo wudi bogilana naxan tixi xuden dɛ. A yiine yibandunxi taan nabilinna yinna nan xun ma.
23 Xalimakuli wonle yi yɛngɛn gidi a ma xɔlɛni, e xalimakunle woli a ma xɔnnantenyani.
24 Koni a fan yi a xanla suxu ken, a yii rafan Yaxubaa Ala Sɛnbɛmaan barakani, Isirayila kantanmana, a kantan fanyena,
25 naxan findixi i fafe a Ala ra, naxan i ratangama, Ala Sɛnbɛ Kanna, naxan i barakama, naxan koren dubane fima i ma, naxan bɔxɔn dubane fima i ma, naxan dii bari dubane ragidima i ma.
26 I babaa dubane baraka dangu baraka feene ra naxanye sɔtɔma geya fonne xɛɛne ma, e dangu habadan geyane se faɲine ra. Ala xa na birin lu Yusufu xun ma, naxan findima a fafaxakedenne yɛɛratiin na.”
27 “Bunyamin luma nɛn alo kankona. Xɔtɔn yo xɔtɔn fɔ a subena nde suxu, a a don, ɲinbanna ra a a se suxine yitaxun.”
28 Isirayila bɔnsɔn fu nun firinne nan ne ra. E babaa duban nan na ra a naxan fala e xa. A duba birin xa, birin nun a duba.
29 Na xanbi, a yi a ɲungu a diine ma, a naxa, “N fa sigama nɛn laxira yi. N na faxa, ɛ n maluxun n baba yireni, gaburun naxan Eferon Xiti kaana xɛɛn ma,
30 Makipelaa xɛɛn faranna ra, Mamire fɛma, Kanan bɔxɔni. Iburahima na xɛɛn saraxi Eferon Xiti kaan nan ma alogo na xa findi a muxu maluxunden na.
31 Iburahima maluxunxi mɛnna nin, e nun a ɲaxanla Saran. Isiyaga fan maluxunxi mɛnni e nun a ɲaxanla Rebeka. N tan fan Leya maluxunxi mɛnni.
32 Na xɛɛn nun na faran yinla naxan na yi, e saraxi Xitine nan ma.”
33 Yaxuba to yelin yamarine fiyɛ a diine ma, a yi a sa saden ma. A yi faxa, a siga laxira yi.