1 Kings 4 in Yalunka

1 Manga Sulemani nan yi mangan na Isirayila birin xun na.

2 Kuntigin naxanye yi a wanla ra, ne ni itoe ra: Asari, Sadɔki a dii xɛmɛna, saraxaraliin nan yi na ra.

3 Elixorefi nun Axiya, Sisaa diine, sɛbɛlitine nan yi ne ra, Yosafati, Axiludu a dii xɛmɛna, mangana yenla nan yi na ra,

4 Bɛnaya, Yehoyadaa diina, sofa kuntigin nan yi na ra, Sadɔki nun Abiyatari, saraxaraline nan yi ne ra,

5 Asari, Natan ma diina, yamana kanne kuntigin nan yi na ra, Sabudu, Natan ma diina, saraxaraliin nan yi na ra e nun mangan kawandi muxuna,

6 Axisari, manga banxin walikɛne kuntigin nan yi na ra, Abadaa dii xɛmɛna Adoniran, karahan wanle kuntigin nan yi na ra.

7 Yamana kan fu nun firin nan yi Isirayila xunna, naxanye yi lan e balon fen manga Sulemani nun a denbayaan birin xa. E birin yi na ligama nɛn kike keden ɲɛɛn bun ma.

8 E xinle ni itoe ra: Xuru a diin nan yi Efirami geya yiren xun na.

9 Dekeri a diin nan yi Makasa nun Salabimi nun Beti-Semɛsi nun Elon e nun Beti-Xanan taane xun na.

10 Xesede a diin nan yi Arubɔti taan xun na, e nun Soko nun Xeferi yamanan birin.

11 Abinadabo a diin nan yi Dɔrɔ geya yamanan birin xun na. Sulemani a dii tɛmɛn Tafata nan yi a ɲaxanla ra.

12 Axiludu a diin Baana nan yi Taanaki nun Megido taane xun na, e nun Beti-Seyan birin dɛnaxan Saratan fɛma Yɛsɛreli bun ma, keli Beti-Seyan yi han Abeli-Mehola nun Yokemen.

13 Gebere a diin nan yi Ramoti taan xun na Galadi yamanani. Manase a diin Yayiri a taadine yi a yii Galadi yamanani, e nun Arigobi yamanani Basan geyaan fari mɛnna bɔxɔn fan mɔn yi a yii, taa tonge sennin nabilinxin yinne ra naxanye dɛ yi balanxi sulan na.

14 Axinadaba, Yido a dii xɛmɛn nan yi Maxanayin yamanan xun na.

15 Aximaasi nan yi Nafatali yamanan xun na. A tan fan Sulemani a dii tɛmɛna nde nan tongo a ɲaxanla ra naxan xili Basamati.

16 Baana, Xusayi a dii xɛmɛn nan yi Aseri yamanan xun na e nun Beyaloti taana.

17 Yosafati, Paruyaa dii xɛmɛn nan yi Isakari yamanan xun na.

18 Simeyi, Elaa dii xɛmɛn nan yi Bunyamin yamanan xun na.

19 Gebere, Yuri a dii xɛmɛn nan yi Galadi bɔxɔn xun na, e nun Amori manga Sixɔn nun Basan manga Ogo, ne yamanane. Yamana kan keden nan yi Yuda yamanan xun na.

20 Yuda nun Isirayila muxune yi wuya han, e yi luxi alo baan ɲɛmɛnsinna. E e dɛgema, e min, e sɛwa.