1 Peter 3 in Tsishingini

1 A̱ɗu waru a̱ma̱ci, i kuru ali a̱ ɗu, ununa ya̱a̱ kuru Za va Aguɓa ɗu. Na ali o ro a ꞌyuwan a̱ ushi ikakaꞌa, nden n saꞌani ma̱ a̱ma̱ci n le n ta zuwa le a̱ usu upasu na adanshi a na aa yuwan.

2 A ta yuwan ne, ne e ene nden n saꞌani n na n lobonoi na yaa yuwusan.

3 She i yuwan mpolo n na yoo oꞌwo ulobonu e esu a ama wan. I damaton aciya̱ɗu adama a̱ a̱bunda̱ a maɗava ma̱ a̱nji ko ili i na a yuwain na̱ zinariya ko adama e itana yi ikebe lo wan.

4 Ana yaa yuwan ne, i lyawa e reve ɗu adama o ulobonu u na u ri o okolo a̱ ɗu. Ulobonu u nda a̱ tsu tsura̱ yi ta̱ o okolo a na a tarai aciya̱yi ili i ro shi. A̱sula̱ a tara yi ta̱ ili i saꞌani yu usokowu yo okolo a na u ri n koto shi.

5 Ne ɗa a̱ma̱ci a akiza ɗe a̱ca̱pa̱ o oꞌwotoi aciyele ulobonu. A ca ta̱ A̱sula̱ okolo e le, reve waru a ca ali e le tsugbain.

6 Iroci, Saratu† yuwan ta̱ tsutoni na̱ vali va̱ yi Ibrahim, ana u ɗe niyi zagbain va̱ yi. A̱ɗu esheli a̱ yi a ɗa ni i yuwan ili i na i ri mejege babu wovon wi ili i na yaa cina ɗu.

7 Ne ɗa waru, a̱ɗu ali ni i ciga i ꞌyuwan i kuru ben na̱ a̱ma̱ci a̱ ɗu. I guza̱ le nu urevu a̱tsuma̱ a̱ nden n ɗu oɓolo. I cuwan i laꞌa le ta̱ ucira. I cuwan ele fo a̱ ushi ta̱ uneꞌe u saꞌani wa̱ A̱sula̱ za na a̱yi ɗa wuma. I yuwan ne adama ko ili i ta̱ i geshe avasa a̱ ɗu wan.

8 Gogo gba, i yuwan nden n na n lobonoi va̱ni ɗu, reve ili i na i farai na̱ za ro a̱tsuma̱ a̱ ɗu i tara yi gashi ya̱ꞌa̱ ɗu ɗa, a̱vu i cigalai ana muwun ma̱ a̱na̱wu. I roco ama isaꞌani agba i tara aciya̱ɗu ili i ro wan.

9 Na̱ vuma ro yuwaan ɗu iwuya, she i ka̱mbuwa̱ yi ni iwuya wan. Waru na̱ za ro isula ɗu, she i tsupa wan. Amma i zuwaa le abaꞌun. I yuwan ne adama a na A̱sula̱ e ɗe ɗu ta̱ tsa̱ra̱ i zuwaa ozo o ro abaꞌun. Ne ɗa A̱sula̱ aa zuwaa ɗu abaꞌun fo.

10 Adanshi a̱ A̱sula̱ a damma ta̱: “Na̱ vuma ciga wuma u ma̱za̱nga̱ na̱ rana saꞌani, nu u ciga u ꞌyuwan u geshe eelentsu a̱ yi a adanshi a vama, waru nu u ciga u ꞌyuwan u geshe una̱ wa̱ yi a adanshi e epen.

11 Nu u ciga u ꞌyuwan u lyawa mayan me iwuya, waru nu u ciga u ꞌyuwan u yuwan isaꞌani. Nu u ciga u ꞌyuwan u yuwan a̱tyo a na waa yuwan adama u yuwan nden n saꞌani na ama.

12 Esu a̱ A̱sulazuva a̱ ta̱ ka̱lyuwusa̱ aza a na aa yuwusan isaꞌani, waru atsuvu a̱ yi a̱ tu ukpa̱tuꞌu na aa yuwusan avasa. Amma A̱sulazuva a tsu tawa ta̱ aza a na aa yuwusan iwuya esu.”

13 Zane ɗa ri lo aa yuwaan ɗu iwuya, ni i ri ufoɓu na yaa yuwaan le isaꞌani? Agba ko na aa ca ɗu a̱tsuma̱lima̱ adama o uyuwusan wi isaꞌani, she yu uwwa wovon wan, waru she u damaton ɗu wan. A̱sula̱ a ta ca ɗu iliyinkapa adama e isaꞌani i na yaa yuwusan.

15 Ana yaa damaton aciya̱ɗu, i yuwaan Zamawawa a̱ga̱nda̱ ana Zagbain. I ciga i ꞌyuwan i da̱na̱ ufoɓu u na yaa cuɗuwa za na ece nɗu, i damma ili i na i zuwai i ri nu uzuwu wo okolo.

16 Agba ni i ciga i ꞌyuwan i yuwan ne ben na̱ tsutoni. I lyawa asuvu a̱ ɗu a̱ da̱na̱ cece. Reve na ama a yuwan adanshi a vama a aci a̱ ɗu, a ta uwwa wono, ne e ene nden n saꞌani n na yaa yuwusan adama a na yoo tono Zamawawa.

17 Lyawa i yuwan isaꞌani reve i sowo a̱tsuma̱lima̱, na̱ A̱sula̱ a ciga ɗu i yuwan ne. Ni i sowo awuya adama e isaꞌani, u ta laꞌaa ɗu a na yoo sowo awuya adama e iwuya.

18 Zamawawa sowo ta̱ a̱tsuma̱lima̱ a mantsa ma na u kuwa̱i adama a̱ nusu tsu, agba u buwa a̱ da̱shi shi. U nusan shi ko keꞌen, amma u kuwa̱ ta̱ adama a̱ a̱za̱ o unusu adama u ta̱wa̱to tsu uba̱ta̱ wa̱ A̱sula̱. Lipu va̱ yi kuwa̱ ta̱, agba a̱ ka̱mba̱to yi ta̱ wuma a̱tsuma̱ a̱ Ruhu.

19 Reve u ꞌya̱wa̱ nu ucira u Ruhuꞌu u yuwaan a̱kwa̱kwa̱ a na a̱ ri wunlu o uꞌwa wa ali alajiya.

20 A̱kwa̱kwa̱ a ama a nda a ꞌyuwan ta̱ a yuwaan A̱sula̱ tsutoni diga a mantsa ma na Nuhu† yuwain wantsun. Agba A̱sula̱ a̱ shi ta̱ a yuwan ankuri ne ele. Ama kunla̱ ɗa a uwai a wantsuꞌun reve A̱sula̱ a wawa le a̱ mini ma gbain.

21 Mini ma gbaiꞌin iroci yu urumbusu u na waa wawusa ɗu ɗa gogo. Agba urumbusu adama a̱ wuza̱ꞌu wa̱ a̱shinda̱ a ɗa shi. U to rocosu uvadalasa uba̱ta̱ wa̱ A̱sula̱ na asuvu e cece, adama a na a̱ ꞌya̱sa̱in Yesu Zamawawa a̱tsuma̱ a̱ a̱kwa̱kwa̱.

22 Gogo Zamawawa ta̱ zuva, uba̱ta̱ u na u ri nden o ukere usaꞌani wa̱ A̱sula̱. Nlingata ma̱ A̱sula̱ suru oɓolo na̱ cuꞌun vo otoni a̱ lima̱ suru na a ciga a ꞌyuwan a yuwaan yi tsutoni.