Revelation 22 in Tacana

1 Da su beju ángel ja ema eid'e jaametiji ena nacuareda yahui bametana. Tueda ena da Diusu, Huisha Janana Nime detse sa aniude jenetia cuinanana.

2 Ejude dusete je ena satiana. Ena queque je eid'e jaametiji equi cuana netitaina. Pamapa badi jajaji putaina. Tuna sa eina cuana da eidue puji putaina pamapa ejude su aniji cristiano cuana esaisiame puji.

3 Tueda ejude su aimue ai madhada cuana yanita mahue. Diusu, Huisha Janana Nime detse dapia aniude bia su yaniti. Huisha Janana Nime sa emebajaji cuana ja tu emitsutsuatani.

4 Dapia huamahuama ebuchamatitayu. Tusa ebani mecuana sa emata su derejiji edusutita.

5 Dapia aimue apuda epuyu mahue. Tueda ejude su aniji cuana sa caitera, id'eti sa hueda tsada mahue epu, Diusu quitaita mecuana sa hueda epu putsu. Beju tu neje ecuatsasia epuenita huecuana.

6 Da su beju ángel ja ema uja atana: —Tueda pamapa mi derejiji mimi cuana da ene quita, butsepi jei ya puji. Cuaja Diusu ja mesa profeta chenu cuana butsepi quisametaidha batame, daja ema beitutana mi equisa puji. Da su dereque tueda ai quisa cuana Diusu sa emebajaji cuana ja cuaja ai cuana tipeida epu pashanapata puji. Ema da Juan. Uja Jesús ja ema atana:

7 —Tipeida ema epue. Quebata ye quirica su ai quisa cuana su jei epu su, tueda beidaji epu.

8 Yama quitaita bana, id'abana tueda ai cuana. Id'aba putsu, ema tururuana ema ai cuana bametana ángel butse su tu emitsutsua puji.

9 Da su ángel ja ema uja atana: —Be tururuji ema butse su, ema mu mi nime hue, daja huecha mique edue cuana nime hue Diusu sa emebajaji putsu. Pamapa ye quirica su derejiji yani cuana jei yatani cuana nime da ema. Be ema mitsutsuaji. Diusu bahui mitsutsua taji.

10 Daja hue ángel ja ema quisainiame atana uja: —Be ichasetaji ye quirica su ai quisa cuana, beju tueda ai quisa cuana epupe tiempo enariatiani putsu.

11 Da cama, cristiano madhada cuana ja daja hue ai madhada cuana yaderata. Daja huecha nimebutsepi cuana ja ai saida cuana yaderata. Daja hue Diusu peje su panimetucheaderatita huecuana.

12 Neicha Jesús ja ema atana uja: —Ema tipeida epue, cuaja tuna ai atana cuana batame, metse su hue echuje etia puji.

13 Ema da yapiruji, daja huecha yapeyuji. Yama da equene pamapa ai cuana apiruidha. Daja huecha yama pamapa ai cuana apeyume ya.

14 Pamapa nimebutsepi cuana beidaji eputa, tuneda bahui eid'e jaametiji equi sa ejaja cuana ediatayu putsu. Diusu sa ejude sa eteriji cuana je enubitayu huecuana.

15 Ejude etsequeini su jei puja mahue, mau, ai madhada aji, jamanuametiji, eimea mitsutsuaji, pamapa bid'umimi puji cuana yanitita.

16 Neicha Jesús ja ema atana uja: —Ema da Jesús. Yama quema ángel beituana pamapa ema peje su jei eputani dharejiji cuana peje su tueda quema ai quisa cuana paquisata huecuana puji. Ema da David chenu sa familia jenetia. Ema da huena atujai cuarecuare nime.

17 Espíritu Santo, Huisha Janana Nime sa ehuane epu detse da: —Mepueque —epuani. Pamapa tuatse id'abaji cuana di uja: —Mepueque —paputa. Quebata jaid'itija su, papue. Cha jaid'iti hue papu eid'e jaametiji yahui su.

18 Beju ema da Juan. Ye quirica su Jesús sa quisa id'abaji cuana yama jubida equisainia uja: Ahua quebata ja tusa quisa cuana eyapacata su, Diusu ja ye quirica su quisa epuani ai jamatseti cuana tu bia su eyapacatayu.

19 Daja huecha quebata ja tusa quisa cuana ejemita su, Diusu ja tueda padiata mahue yata eid'e jaametiji equi sa ejaja. Daja huecha ejude iyuda su panubi mahue yata. Daja Jesús ja ema quisatana yama edere puji. Pamapa mesa ai quisa cuana yama dereana ye quirica su.

20 Beju tuahueda ema tije mimi neje uja atana: —Ene putsu, ema tipeida epue. Daja papu. ¡Pueque, Echua Puji Jesucristo!

21 Ecuana sa Echua Puji Jesucristo ja pamapa mesa dharejiji cuana paibunebata. Daja papu.