Luke 9 in Tacana

1 Jesús ja mesa piada tunca beta ejaitiana discípulo cuana dhitametana. Huaratiatana huecuana pamapa ai einid'u madhada cuana cristiano cuana peje jenetia ejusiacuina puji, tsapiapiati nedaji cuana esaisiame puji.

2 Beitutana huecuana Diusu ecuatsasiati jepuiti quisa paputita puji, cristiano cuana esaisiame puji.

3 Uja Jesús ja cuatsasiatana huecuana: —Be eituneji, shitara, ai dia taji, chipilu cuana medusutiji. Beju equita su cama bahui ejud'uji medusutique.

4 Quebata ejude su cuinati putsu, piada ete su hue meanitique. Tueda ete su hue meanique ejude jenetia ecuinana teje.

5 Quepia micuana batsuja mahue yatani huecuana su, mecuinanaque tueda ejude jenetia. Cuinana putsu, metaraque tueda ejude sa med'i micuana sa pulucu jenetia Diusu tuna neje eduininiani pashanapata huecuana puji.

6 Da su beju cuinanatana huecuana. Pamapa ejude su putitana huecuana. Diusu sa quisa saida quisaquisa putana huecuana. Nedaji cuana saisiametana huecuana.

7 Echua puji Herodes Antipas bahue puana pamapa ai Jesús ja atana cuana. Tueda japitsapitsatiana, cristiano cuana ja Jesús jepuiti tsapiapiati quisatana huecuana putsu. Piada piada cuana, “Tueda da Juan Bautista id'eyujiji”, putana.

8 Pia cuana, “Diusu sa quisaquisa puji Elías chenu beju bataji puitia”, putana. Pia cuana, “Pia Diusu sa profeta chenu beju id'eitiba”, putana. Da putsu, Herodes Antipas ebia su japitsapitsatiana. Cuaja shanapa taji mahue batana.

9 Da su tueda puana: —Yama quitaita Juan chuarijiameana. ¿Aidhe jia da ye deja pamapa ai nimetiuda cuana yatani? Beju Herodes ja Jesús baja atana.

10 Apóstol cuana Jesús peje su jasiapatibana su, tuna pamapa ai atana cuana Jesús quisatana huecuana. Da su Jesús ja dusutana huecuana Betsaida ejude etsahua su cristiano cuana mue ani su, tuna neje bahui ubu hora chidi yani puji.

11 Beju ejude aniji cristiano cuana bahue pu putsu, Jesús peje su putitana huecuana. Da su Jesús ja batsutana huecuana. Diusu ecuatsasiati jepuiti quisapirutana huecuana. Nedaji cuana di saisiametana.

12 Beju tsinecua edhememehu su apóstol cuana ja Jesús uja atana: —Beituque ye cristiano cuana ejude cuana naja je tuna sa ai dia taji cuana pachacutita huecuana puji, beju upia mu mue ai biame ani putsu.

13 Jesús ja uja atana huecuana: —Micuaneda hue memihuaque huecuana. Da su Jesús jeutsutana huecuana uja: —Beju pishica pan chidi cuana, beta se chidi detse bahui ecuanaju sa yani. ¿Ahua mique tsada ecuanaju jana ebajati ye cristiano dueji cuana sa puji?

14 Beju pishica mil pucue deja cuana anitaina. Jesús ja discípulo cuana cuatsasiatana: —Cristiano cuana meaniutemeque dujiduji pishica tunca cama.

15 Beju daja atana huecuana.

16 Pamapa cristiano cuana aniutetana su, Jesús ja pan cuana, se detse di inatana. Buepa huabata jachamati putsu, diusulupai Tata Diusu atana. Pan cuana, se detse ped'uped'ua putsu, discípulo cuana menajatiatana cristiano cuana paberereatiata huecuana puji. Discípulo cuana ja cristiano cuana eberereatiatani cama, pan, se ped'u cuana jajucuatitana.

17 Beju pamapa cristiano cuana diadiatana tupu. Pan cuana, se detse beju puchu puana. Eped'u cuana chudutana huecuana. Piada tunca beta ejaitiana d'iti cuana sejeatana huecuana puchu cuana neje.

18 Pia tsine Jesús discípulo cuana neje bahui aniana. Pia cristiano cuana beju aimue ani putana. Jesús da discípulo cuana chuadera tu mehua Diusu neje jamitsutiana. Jamitsupeti putsu, discípulo cuana peje su janariatiana. Uja quisabatana huecuana: —¿Cuaja ni da cristiano cuana ema jepuiti eputani?

19 Da su jeutsutana huecuana uja: —Piada piada mida pa Juan Bautista chenu id'eyujiji eputani. Pia cuana mida pa Elías chenu id'eyujiji eputani. Pia cuana di mida pa pia Diusu sa profeta eputani.

20 Da su Jesús ja quisabatana huecuana: —¿Aidhe ni da ema micuaneda epibatiani? Beju Pedro ja jeutsutana: —Mida da Cristo, Diusu sa Jabeituti Deja.

21 Da su beju Jesús ja discípulo cuana jubida cuatsasiatana: —Be aidhe biame mequisaji aidhe ema.

22 Ema da Diusu sa Jabeituti Deja biame, ebia su sufri pu taji. Beju judío cuana sa ehuidusuji, sacerdote, huaraji aida, jacuatsasiati ebuetsuaji cuana ja ema jusiadera putsu, emanuameta huecuana. Quimisha tsine ejaitiana su, ema eid'eyu manujiji cuana duju jenetia.

23 Da su Jesús ja mesa discípulo cuana uja atana: —Quebata ja ema tije aja su, pamapa muesumu neje ema tije paata. Ema pamapa mesa ai cuana quitaita ebia su tsada pabata.

24 Tusa manu teje ema tije paata, manuameja paata huecuana biame.

25 ¿Ai puji saida ni da etse sa pamapa mundo sa chipilu cuana paani pu cua, cuati castigo su etse eputi biame?

26 Quebata da cristiano cuana butse su ema jepuiti, quema quisa cuana jepuiti di ebidhu su, ya di tu jepuiti ebidhu, ema esiapati su. Da su ema Echua Puji Huaraji Aida epu. Quema Tata Diusu sa gloria neje, pamapa tusa ángel cuana neje ema esiapati.

27 Ene putsu, yama micuana equisainia, hue enetita piada piada cuana aimue emanuta tsuhu mahue Diusu ecuatsasiati ebayu teje.

28 Ocho tsine beju jaitianana su, Jesús murucu aida bia su tsuatiana Diusu neje emitsuti puji. Pedro, Jacobo, Juan cuana ja buquetana.

29 Dapia Jesús Diusu neje emitsutiani cama, tuna butse su jabupiatiana. Mesa ejud'uji cuarecuare pasapasa puana.

30 Da su Elías, Moisés chenu detse bataji puana eid'e batana huecuana. Jesús neje quisaquisa epuani batana huecuana.

31 Cuaja Jesús sufri pu putsu, emanu Jerusalén ejude su Jesús neje jaquisatiana tse. Hueda cuarecuare ja biababutana huecuana.

32 Beju Pedro, Jacobo, Juan cuana ebia su tahuija putana biame, id'etaniana huecuana, tueda quimisha deja sa hueda ba putsu.

33 Moisés, Elías detse beju eputiyupiba epuani su, Pedro ja Jesús atana: —Echua Puji, saida ecuaneda upia pamapa su meanija. Quimisha epahuaneti cuana ecuanaju paaiti, ahua mique tsada su. Piada miqueda puji, piada Moisés sa puji, piada Elías sa puji ecuanaju paaiti. Pedro beju mue jashanapati cuaja emimiani, ebia su iyuame pu putsu.

34 Daja Pedro emimiani cama, judu ja beju dunutana huecuana. Da su beju Pedro, Jacobo, Juan cuana ebia su iyuame putana.

35 Judu duju jenetia Tata Diusu ja atana huecuana uja: —Ye da quema ibuneda Ebacua. Tueda bahui meid'abaenique.

36 Tata Diusu mimipeana su, beju Jesús tu mehua batana huecuana. Moisés, Elías detse aimue beju batana huecuana. Da su cuatsa mahue anitana huecuana. Mue aidhe biame quisatana huecuana mahue tuna batana ai cuana.

37 Pia huenati murucu aida jenetia butetana huecuana. Ebutesa su, jucuada cristiano cuana ja Jesús tsutitana.

38 Piada deja ja cristiano cuana duju su Jesús jubida uja atana: —Echua Puji, chamaque quema piada quita ebacua.

39 Einid'u madhada ja tueda ina putsu, etsiatsiametani jubida. Tseitsi nime edajajametani. Equedi bahui purapura mesa ecuatsa su epuani. Tueda einid'u madhada ja quema ebacua emadhatani. Mesiaja mahue yatani.

40 Beju yama mique discípulo cuana bajaitia einid'u madhada pajemicuinata huecuana puji. Cuaja jemicuina taji mahue bataitia huecuana.

41 Da su Jesús ja anititana discípulo cuana d'ayapirutana uja: —¡Ai! ¿Jucuaja su jia micuaneda jei puja mahue? ¿Que tupu teje jia quema micuana neje ani taji? ¿Que tupu teje jia quema micuana etuchea taji? Meduseque edeahue mimi bue mahue.

42 Edeahue janariatiana su, einid'u madhada ja dajajametana. Jubida edeahue riariametana. Da su Jesús ja einid'u madhada d'ayatana su, beju saisibana edeahue. Jesús ja deja tusa ebacua saida menajatiataibana.

43 Beju pamapa batana cristiano cuana ebia su nimetiunetitana, Diusu ebia su tucheda, aida batana huecuana putsu.

44 Beju cristiano cuana enimetiutani cama, Jesús ja mesa discípulo cuana quisapirutana: —Meid'abaenique ema. Be mesetaji. Ema da Diusu sa Jabeituti Deja. Ema emenajatiata huecuana deja madhada cuana peje su pamanuameta huecuana puji.

45 Beju discípulo cuana ja Jesús sa quisa aimue shanapatana mahue, tuseda tsada mahue putsu. Iyuame putana huecuana tu equisaba puji cuaja mesa quisa epuani.

46 Da su beju discípulo cuana jacuicuinapirutitana. ¿Quebata jia tuna duju su ebia su aida? jacuicuinatitana huecuana.

47 Beju Jesús jashanapatiana daja yacuicuinatitani huecuana. Da su yanana chidi inachidi putsu, tu naja su ichatana.

48 Discípulo cuana uja atana: —Ye yanana da ema peje su jei eputani nimemitsida cuana nime. Quebata ja saida ebatsuta huecuana su, tuahueda ema ebatsutani pu cua nime. Daja huecha quebata ja ema ebatsuta su, tuahueda quema Tata Diusu ebatsutani pu cua nime, Diusu ja ema beitutana putsu. Quebata micuana duju su nimemitsida epuani su, tueda da ebia su aida micuana duju su epu.

49 Da su beju Juan ja Jesús uja atana: —Echua Puji, pia deja ja einid'u madhada cuana cristiano cuana peje jenetia ejusiacuinatani ecuanaju bana. Beju ecuanaju tueda, “Be daja aji”, ana, aimue tueda ecuanaju neje epuniunetiani mahue putsu.

50 Da su beju Jesús ja Juan uja atana: —Be tueda deja memenahueji. Quebata deja ecuana neje madhada hue epuani mahue, tueda da ecuana sa eshanapa beju.

51 Jesús cielo su eputi tiempo beju enariatiani putsu, janimetucheatiana Jerusalén ejude su eputi puji.

52 Equene tu hui su pia discípulo cuana beitutana. Piada ejude su Samaria yahua su cuinatitana huecuana tahui jude ete ebasetati puji.

53 Beju samaritano cristiano cuana ja dapia ejude su aimue Jesús batsuja atana mahue, tueda Jerusalén ejude su epuhu shanapatana huecuana putsu.

54 Da su Jesús sa discípulo Jacobo, Juan detse ja daja id'aba putsu, Jesús uja atana tse: —Echua Puji biahua tiempo Diusu sa profeta Elías chenu ja cristiano madhada cuana cuati neje taitanamepetaidha. Beju jiahue, ¿a mique tsada ecuanaju Diusu ebaja cuati pabeituta puji, tueda samaritano cristiano cuana etaitanamepe puji?

55 Beju Jesús sa tsada mahua putsu, discípulo detse jubida d'ayatana, daja quisabatana tse su.

56 Da su pia ejude su putitana huecuana etahui puji.

57 Beju edid'i su tuna eputahu cama, piada deja ja Jesús nariatana. Uja tuahueda atana: —Echua Puji, mi yama tije aja quepia mi epuhu su.

58 Da su Jesús ja atana deja: —Cuacuacuacua cuana sa rara yanita. D'ia cuana sa esaji yanita. Beju quema mu ai mahue quepia echua epahuati puji.

59 Da su beju neicha Jesús ja pia deja atana uja: —Tije ema aque. Tuahueda Jesús atana uja: —Echua Puji, quema tata papa putsu chu, mi yama tije ya.

60 Da su Jesús ja atana: —Diusu shanapaji mahue cuana ja hue tuna sa manujiji cuana papapata. Miada mu puti putsu, Diusu ecuatsasiati epusiu ai quisa cuana cristiano cuana quisatique.

61 Beju pia deja ja macha Jesús uja atana: —Echua Puji, yama mi tije aja. Equene tsuhu d'eji tiaque ema quema ete su eputi puji, quema familia cuana neje emitsutitiyu puji.

62 Da su Jesús ja tueda uja atana: —Ahua quebata ema tije yapirutani biame, jasiapatija epu su, tueda saida mahue Diusu emebaja puji.