Proverbs 22 in Susu
1 شِلِ قَنيِ قَن نَاقُلِ بّ، بِنيّ تِدٍ دَنفِ شّيمَ نُن فبٍتِ تِدٍ رَ.
2 بَننَ نُن سٍتَرٍ بِرِن لَن، بَرِ مَ عَلَتَلَ نَن عٍ بِرِن دَا.
3 شَشِلِمَ نَ قٍ شْرْشْي تٌ، عَ عَ يّتّ نَن نَتَنفَمَ عَ مَ. شَشِلِتَرٍ تَن نَ قٍ شْرْشْي تٌ، عَ سٌمَ عَ كُي نّ كٍرٍن نَ، عَ قَ حَشَنكَتّ سْتْ.
4 يّتّ مَفٌرٍ نَشَن فَاشُمَ عَلَتَلَ يَ رَ، عَ بَننَيَ، بِنيّ، نُن سِمَيَ سْتْمَ نّ.
5 تُنبٍيٍ نُن فَنتَنيِيٍ نَ تِنشِنتَرٍ شَ كِرَ شْن مَ، كْنْ مِشِ نَشَن مّينِمَ عَ يّتّ مَ، عَ عَ مَكُيَمَ نّ مّننِ رَ.
6 قٌنِكٍ مَتِنشِن كِرَ قَنيِ رَ، عَلَكٌ عَ نَشَ فبِلٍن نَ قْشْ رَ عَ مْ تّمُي.
7 بَننَ سٍتَرٍ يَمَرِ مَ نّ، دٌنِ تٌنفٌي قَن قِندِ دٌنِقَ شَ كٌنيِ رَ.
8 مِشِ حَاشِ تْورّ نَن سْتْمَ عَ سَرٍ رَ، عَ سّنبّ قَمَ نّ كَنَدٍ.
9 هِننّنتٍ بَرَكَمَ نّ، بَرِ مَ عَ تْورْ مِشِيٍ كِمَ عَ شَ دٌنسٍ رَ.
10 مِشِ مَيٌي كٍرِ، عَلَكٌ حْشْنسْسْي شَ حْن. نَ تّمُي فبّسّنشْننّيَ نُن كٌنبِيٍ دَنمَ نّ.
11 بْحّ شَ سّنِيّنيِ رَقَن مِشِ نَشَن مَ، وْيّن قَنيِيٍ نَن مِنِمَ نَ دّ عِ، عَ قَ قِندِ مَنفّ دّقَنبٌورٍ رَ.
12 عَلَتَلَ نْندِ نَن مَكَنتَمَ، كْنْ عَ يَنقَنتٍ شَ وْيّنيِ شُن نَكَنَمَ نّ.
13 مِشِ تُننَشْنْشِ نَن عَ قَلَمَ، «يّتّ شَاحّشِ نَ تَندٍ، ﭑ نَ مِنِ كّنّ مَ، عَ ﭑ قَشَمَ نّ.»
14 فَنتَنيِ نَن نَ لَنفٌي فِنّ شَ وْيّنيِ رَ. عَلَتَلَ شْنْشِ مِشِ نَشَن مَ، نَ سُشُمَ نَ فَنتَنيِ كُي.
15 شَشِلِتَرٍحَ نَشَن نَ دِ مّدِ بْحّ كُي، عَ بَمَ شُرُ لُشُسِنيِ نَن سَابُي رَ.
16 مِشِ نَشَن سٍتَرٍ تْورْ مَ فٍينِ ندٍ شَ قٍ رَ، نُن مِشِ نَشَن بَننَ كِمَ، نَ قِرِنيِ قِندِ مَ قُشَرِلَ نَن نَ.
17 عِ عِ تُلِ مَتِ لْننِلَيٍ شَ مَرَ سِ رَ، عِ بْحّ رَبِ ﭑ مَ مَسٍنيِيٍ بّ.
18 عَ لَن عِ شَ عٍ رَفَتَ عِ سٌندٌنيِ كُي، عٍ نَشَ مَكُيَ عِ دّ رَ.
19 ﭑ وَ مَ عِ رَ سِقٍ نّ تٌ لْشْي، عَلَكٌ عِ شَ عِ يّتّ تَشُ عَلَتَلَ رَ.
20 ﭑ بَرَ تَالِ تٌنفٌ سَشَن سّبّ عِ مَ، نَشٍيٍ قِندِشِ مَرَ سِ نُن لْننِ رَ عِ بّ،
21 عَلَكٌ عِ شَ نْندِ شْرِ يَتِ كٌلٌن، عِ قَن شَ سَ نَ عِبَ عِ شّيمَ بّ.
22 عِ نَشَ سٍتَرٍ رَهَلَكِ عِ شَ كْبِرِ سْتْ، عِ نَشَ تْورْ مِشِ تْوحّفّ،
23 بَرِ مَ عَلَتَلَ تَن عٍ شُن مَقَلَمَ نّ، عَ قَ تْورْ مِشِيٍ يَشُييٍ تْورْ.
24 عِ نَشَ بِرَ مِشِ بْحّ فبٍ قْشْ رَ، نَشَن شْنْشِ تّمُي بِرِن،
25 شَ نَ مُ عَ رَ عِ قَن دَرِ مَ نّ نَ مْولِ رَ، نَ قَ قِندِ فَنتَنيِ رَ عِ سُشُمَ نَشَن نَ.
26 عِ نَشَ لُ مِشِيٍ يَ مَ نَشٍيٍ تَانِمَ عٍ بٌورٍيٍ بّ، نَشٍيٍ سٍ دْشْمَ سّيكّ رَ مِشِيٍ بّ،
27 شَ نَ مُ عَ رَ عٍ عِ شَ سَدٍ رَ مِنِمَ نّ عِ بُن مَ، عَ قَ لِ كْبِرِ مُ نَ عِ يِ رَ عِ شَ عَ قِ.
28 عِ نَشَ عِ بَبَيٍ شَ نَانِنيِ مَتْنشُمَ سَشِ بَ عٍ يِرٍ دٍ.
29 وَلِكّ نَشَن قَتَ عَ شَ وَلِ رَ، مَنفّيٍ نَن هَيِ لُمَ عَ مَ. عَ مُ وَلِمَ سٍتَرٍيٍ بّ.