Proverbs 14 in Susu
1 فِنّ لْننِلَ سّنبّ قِمَ نّ عَ شَ دٍنبَيَ مَ، كْنْ فِنّ لْننِتَرٍ عَ شَ دٍنبَيَ شُن نَكَنَمَ نّ.
2 مِشِ نَشَن عَ حّرّ مَ عَ تِنشِنشِ رَ، عَ فَاشُمَ نّ عَلَ يَ رَ، كْنْ نَشَن عَ حّرّ مَ تِنشِنتَرٍيَ رَ، نَ نَن يٌمَ عَلَ مَ.
3 يّتّ عِفبٌي شَ وْيّنيِ قِندِ مَ بْنبْي نَن نَ عَ بّ، لْننِلَ تَن شَ وْيّنيِ عَ مَكَنتَمَ نّ.
4 شَ نِنفٍ مُ بْشِ بُشَمَ، سَفَ مُ رَقٍمَ. نِنفٍ شَ وَلِ عَ نِيَمَ نّ مِشِ شَ بَلٌي فبٍفبٍ سْتْ.
5 سٍيدٍ قَنيِ مُ وُلٍ قَلَمَ، سٍيدٍ حَاشِ تَن وُلٍ نَن تُن قُنقُنمَ.
6 مِشِ مَيٍلٍ لْننِ قٍنمَ نّ، كْنْ عَ مُ عَ سْتْمَ. لْننِ كٌلٌنقٍ مُ شْرْشْ شَشِلِمَ بّ.
7 عِ شَ عِ مَكُيَ شَشِلِتَرٍيٍ رَ، بَرِ مَ عِ مُ لْننِ يٌ سْتْمَ عٍ رَ.
8 لْننِلَ عَ حْشْ سَمَ نّ عَ حّرّ كِ شْن مَ، لْننِتَرٍ تَن عَ يّتّ مَدَشُمَ نّ.
9 شَشِلِتَرٍ يٌمَ يُنُبِ تٌنفٌقٍ مَ، كْنْ تِنشِنتْي عَلَ شَ هِننّ نَن قٍنمَ.
10 مِشِ عَ يّتّ شَ تْورّ كٌلٌن عَ بْحّ كُي، عَ مُ عَ شَ سّيوّ مَسٍنمَ مِشِ فبّتّ بّ.
11 مِشِ حَاشِيٍ شَ دٍنبَيَ هَلَكِمَ نّ، تِنشِنتْييٍ تَن شَ دٍنبَيَ قَنمَ نّ.
12 مِشِ حْشْ عَ مَ عَ عَ حّرّ كِ قَن، عَ قَ لِ كْرّ عَ نَ فبَلٌي كِرَ نَن شْن مَ.
13 مِشِ نْمَ يٍلٍدٍ عَ دّ رَ، عَ تْورْشِ عَ بْحّ كُي. سّيوّ نْمَ مَقِندِدٍ تْورّ رَ.
14 مِشِ حَاشِ يٌ، مِشِ قَنيِ يٌ، عٍ بِرِن عٍ شَ وَلِ سَرٍ سْتْمَ نّ.
15 شَشِلِتَرٍ لَمَ نّ مِشِ بِرِن شَ مَسٍنيِ رَ، كْنْ شَشِلِمَ كِرَ مَتٌمَ نّ بٍينُ عَ شَ بِرَ نَ قْشْ رَ.
16 شَشِلِمَ فَاشُمَ نّ عَلَ يَ رَ، عَ قَ فبِلٍن قٍ حَاشِ قْشْ رَ، كْنْ شَشِلِتَرٍ تَن سٌمَ نّ نَ قٍ حَاشِ كُي مَقُرٍن.
17 مِشِ نَشَن بْحّ تٍمَ مَقُرٍن، عَ دَشُحَ نَن نَبَمَ. مِشِ مَدَشُي مُ رَقَن مِشِ يٌ مَ.
18 دَشُحَ قِندِ مَ نّ شَشِلِتَرٍ كّ رَ، شَشِلِمَيٍ تَن لْننِ نَن سْتْمَ.
19 مِشِ حَاشِيٍ قَمَ نّ عٍ شِنبِ سِندٍ تِنشِنتْييٍ بُن مَ، عٍ كَنتَرِ نَن قٍنمَ تِنشِنتْييٍ شْنيِ.
20 سٍتَرٍ رَحَاشُ بِرِن مَ، هَلِ عَ دْشْبٌورٍ، كْنْ بَننَ رَقَن مِشِ فبٍفبٍ مَ.
21 مِشِ نَشَن يٌمَ عَ نفَشَكٍرٍنيِ مَ، عَ بَرَ يُنُبِ سْتْ، كْنْ نَشَن كِنِكِنِ تْورْ مِشِ مَ، نَ بَرَ سّيوّ سْتْ.
22 مِشِ نَشٍيٍ قٍ حَاشِ مَحْشُنمَ، نٍيٍ بْنْمَ نّ. كْنْ نَشٍيٍ قٍ قَنيِ مَحْشُنمَ، نَ كَنيِيٍ مَرَقَنيِ نُن نْندِ نَن تٌمَ.
23 فٍينِ نَ وَلِ بِرِن كُي، كْنْ وْيّنيِ فبَنسَن قِندِ مَ سٍتَرٍحَ نَن نَ.
24 بَننَيَ نَن نَ لْننِلَ سَرٍ رَ، دَشُحَ نَن تُن لُمَ لْننِتَرٍ تَن يِ رَ.
25 سٍيدٍ نْندِ قَلّ مِشِ نِي رَتَنفَمَ نّ، كْنْ وُلٍ قَلّ مِشِ مَدَشُمَ تُن.
26 مِشِ نَشَن فَاشُ عَلَتَلَ يَ رَ، عَ تَن نُن عَ شَ دِيٍ لُمَ نّ كَنتَرِ كُي.
27 عَلَتَلَ شَ يَرَفَاشُي سِمَيَ قِمَ نّ مِشِ مَ، عَلَكٌ عٍ شَ رَتَنفَ فَنتَنيِ مَ نَشَن قِندِ مَ قَشّ رَ.
28 حَمَ شَ فبٌي قِندِ مَ مَنفّ شَ شُننَكٍلِ نَن نَ، كْنْ حَمَ شَ شُرُنيِ قِندِ مَ مَنفّ شَ شُننَفٌرٍ نَن نَ.
29 شَشِلِمَ بْحّ تٍ شْنْ، كْنْ شَشِلِتَرٍ عَ شَ دَشُحَ مَسٍنمَ نّ عَ شَ بْحّ تٍ سَابُي رَ.
30 بْحّسَ قِندِ مَ سِمَيَ نَن نَ، كْنْ مِلّ تَن قِندِ مَ قُرٍ نَن نَ.
31 نَشَن سٍتَرٍ تْورْ مَ، نَ بَرَ يٌ سٍتَرٍ دَا مَنفّ مَ، كْنْ نَشَن كِنِكِنِ سٍتَرٍ مَ، نَ بَرَ عَ دَا مَنفّ مَتْشْ.
32 مِشِ حَاشِ شَ حَاشُحَ عَ شُن نَكَنَمَ نّ، كْنْ تِنشِنتْي كَنتَرِ سْتْمَ نّ هَلِ قَشّ يَ عِ.
33 لْننِ نَ شَشِلِمَ بْحّ كُي، شَشِلِتَرٍ يَتِ نْمَ نَ تٌدٍ.
34 تِنشِنيِ بْشِ رَ سِفَمَ نّ يَرٍ، يُنُبِ تَن حَمَ رَيَافِمَ نّ.
35 وَلِكّ لْننِلَ رَقَن مَنفّ مَ، كْنْ عَ وَلِكّ يَافِتَرٍ تَن شْنمَ نّ.