Jeremiah 34 in Susu

1 بَبِلْن مَنفّ نٍبُكَدَنسَرِ، عَ شَ سْورِيٍ نُن حَمَنّ بِرِن نَشٍيٍ نُ نَ عَ شَ يَامَرِ بُن مَ، عٍ تٌ فٍرٍ سٌ دَرِ سَلَمُ نُن عَ رَبِلِنيِ، عَلَتَلَ نَشَ يِ مَسٍنيِ تِ عَننَبِ يٍرٍ مِ بّ،

2 «عِسِرَيِلَ مَرِفِ عَلَتَلَ بَرَ عَ مَسٍن عِ بّ عِ شَ سِفَ سٍدٍكِيَ يِرٍ. عِ شَ عَ قَلَ عَ بّ، ‹يُدَيَ مَنفّ عَلَتَلَ شَ مَسٍنيِ نَن يَ؛ ﭑ يِ تَا سَمَ نّ بَبِلْن مَنفّ سَفٌي، عَ قَ عَ فَن تّ رَ.

3 عِ تَن مُ عِ بَمَ عَ يِ رَ. مِشِ عِ سُشُمَ نّ عَ حَاشِ رَ، عٍ عِ تِ بَبِلْن مَنفّ يَ عِ، وٌ قَ دّ مَسَرَ. نَ دَنفِ شَنبِ عَ عِ شَنِنمَ نّ بَبِلْن بْشِ مَ.

4 كْنْ يُدَيَ مَنفّ سٍدٍكِيَ، عِ تُلِ مَتِ عَلَتَلَ شَ مَسٍنيِ رَ. عَلَتَلَ بَرَ عَ مَسٍن عِ مُ قَشَمَ سَنتِدّفّمَ رَ.

5 عِ قَشَمَ بْحّسَ نَن كُي. عِ رَفَتَمَ نّ عَلْ عِ بٍنبَيٍ مَنفّيٍ نَشٍيٍ سِنفٍ قَشَ. سُرَيِ فَنمَ نّ عِ بّ، عٍ عِ حْنقٍ بِنيَ. ﭑ مَ مَسٍنيِ نَن نَ كِ.›»

6 عَننَبِ يٍرٍ مِ يِ مَسٍنيِ نَن تِ يُدَيَ مَنفّ سٍدٍكِيَ بّ دَرِ سَلَمُ.

7 بَبِلْن سْورِ فَلِ نُ نَ دَرِ سَلَمُ فٍرٍقٍ، نُن يُدَيَ تَا فبّتّيٍ، عَلْ لَكِسِ نُن عَسٍكَ نَشٍيٍ نُ قِندِشِ تَا سّنبّمَيٍ رَ يُدَيَ بْشِ مَ.

8 مَنفّ سٍدٍكِيَ تٌ سَاتّ تٌنفٌ دَرِ سَلَمُكَيٍ بّ عٍ شَ شْرّيَ قِ عٍ شَ كٌنيِيٍ مَ، عَلَتَلَ نَشَ يِ مَسٍنيِ تِ عَننَبِ يٍرٍ مِ بّ.

9 سٍدٍكِيَ نُ بَرَ عٍ يَمَرِ عٍ شَ عٍ شَ كٌنيِيٍ عٍبُرُ شْرّيَ، عَلَكٌ عٍبُرُ يٌ نَشَ لُ كٌنيِيَ كُي.

10 كُنتِفِ نُن حَمَ بِرِن نَشٍيٍ نُ بَرَ لَن نَ مَ، عٍ نَشَ يَامَرِ رَبَتُ، عٍ نَشَ عٍ شَ كٌنيِيٍ شْرّيَ.

11 كْنْ عَ دْنشْي رَ، عٍ نَشَ فبِلٍن نَ نَتّ مَ، عٍ مَن نَشَ عٍ شَ كٌنيِيٍ رَ سُشُ، عٍ نُ بَرَ نَشٍيٍ شْرّيَ.

12 نَ تّمُي عَلَتَلَ نَشَ يِ مَسٍنيِ تِ عَننَبِ يٍرٍ مِ بّ،

13 «عِسِرَيِلَ مَرِفِ عَلَتَلَ بَرَ عَ مَسٍن، ‹ﭑ نَشَ سَاتّ تٌنفٌ وٌ بَبَيٍ بّ ﭑ عٍ رَ مِنِ كٌنيِيَ كُي تّمُي نَشّ مِسِرَ بْشِ مَ. ﭑ نُ بَرَ عَ مَسٍن عٍ بّ،

14 حّ سٌلٌقٍرٍ يٌ حّ سٌلٌقٍرٍ وٌ شَ وٌ نفَشَكٍرٍنيِ عٍبُرُ شْرّيَ نَشَن نُ بَرَ عَ يّتّ قِندِ كٌنيِ رَ وٌ بّ. عَ نْمَ وَلِدٍ عِ بّ حّ سٍننِ بُن مَ، كْنْ عَ سٌلٌقٍرٍ ندٍ وٌ شَ عَ رَفبِلٍن عَ شْنيِ. كْنْ وٌ بَبَيٍ مُ ﭑ شُي سُشُ، عٍ مُ عٍ تُلِ مَتِ ﭑ نَ.

15 تٌ وٌ تَن بَرَ ﭑ مَ يَامَرِ رَبَتُ عَ سّرِيّ كِ مَ، وٌ بَرَ وٌ شَ كٌنيِيٍ شْرّيَ. نَ كُي وٌ بَرَ سَاتّ تٌنفٌ ﭑ بّ ﭑ مَ بَنشِ كُي ﭑ شِلِ مَتْشْمَ دّننَشّ.

16 كْنْ وٌ مَن بَرَ فبِلٍن نَ نَتّ قْشْ رَ، وٌ قَ وٌ شَ كٌنيِيٍ مَكَنكَن عَلَكٌ عٍ مَن شَ لُ وٌ شَ يَامَرِ بُن مَ. نَ كُي وٌ بَرَ يٌ ﭑ شِلِ مَ.›»

17 نَ نَن عَ رَ عَلَتَلَ بَرَ عَ مَسٍن وٌ بّ، «وٌ مُ ﭑ شُي رَبَتُ شْرّيَ قِقٍ رَ وٌ شَ كٌنيِيٍ مَ. عَلَتَلَ شَ مَسٍنيِ نَن يَ؛ ﭑ قَن بَرَ نَتّ تٌنفٌ وٌ شَ لُ سَنتِدّفّمَ، قُرٍ حَاشِ، نُن كَامّ سَفٌي عَلَكٌ سِ بِرِن نَشٍيٍ نَ دُنِحَ شَ وٌ شَ حَشَنكَتّ تٌ.

18 مِشِ نَشٍيٍ بَرَ ﭑ مَ سَاتّ كَنَ، عٍ مُ عَ رَبَشِ عَ سّرِيّ كِ مَ، ﭑ عٍ لُمَ نّ عَلْ نَ نِنفٍ عٍ نَشَن عِشَبَ عَ تَفِ، عٍ قَ دَنفِ عَ شُنتُنيِ قِرِنيِ تَفِ.

19 يُدَيَ كُنتِفِيٍ، دَرِ سَلَمُ كُنتِفِيٍ، مَنفّ شَ مِشِيٍ، سّرّشّدُبّيٍ، نُن حَمَ بِرِن نَشٍيٍ بَرَ دَنفِ نِنفٍ شُنتُنيِيٍ تَفِ سَاتّ شِرِقٍ رَ،

20 ﭑ عٍ سَمَ نّ عٍ يَشُييٍ سَفٌ نَشٍيٍ وَ مَ عٍ قَشَقٍ، عٍ بِنبِيٍ قَ قِندِ شْنِيٍ نُن سُبٍيٍ شَ دٌنسٍ رَ.

21 ﭑ يُدَيَ مَنفّ سٍدٍكِيَ نُن عَ شَ كُنتِفِيٍ سَمَ نّ عٍ يَشُييٍ سَفٌ، نَشٍيٍ وَ مَ عٍ قَشَقٍ. ﭑ عٍ لُمَ نّ بَبِلْن مَنفّ شَ سْورِيٍ يِ رَ، نَشٍيٍ حَن بَرَ كٍلِ وٌ شُن مَ.

22 عَلَتَلَ شَ مَسٍنيِ نَن يَ؛ ﭑ يَامَرِ قِمَ نّ عَلَكٌ عٍ مَن شَ قَ يِ تَا شِلِ مَ، عٍ شَ عَ فٍرٍ، عٍ عَ سُشُ، عٍ عَ فَن تّ رَ. ﭑ يُدَيَ شَ تَايٍ قِندِ مَ نّ فبَلٌي يِرٍ رَ، مِشِ يٌ مُ لُ نَا.»