Genesis 47 in Susu

1 يُسُقُ نَشَ سِفَ عَ سَ عَ قَلَ مِسِرَ مَنفّ بّ، «ﭑ بَبَ نُن ﭑ نفَشَكٍرٍنيِيٍ بَرَ قَ فٌسٍن كٍلِقٍ كَنَان بْشِ مَ. عٍ بَرَ قَ عٍ شَ شُرُ سٍيٍ نُن عٍ هَرِفٍ بِرِن نَ.»

2 عَ نَشَ عَ تَارَ سُولِ ندٍيٍ مَسٍن مِسِرَ مَنفّ بّ.

3 مِسِرَ مَنفّ نَشَ يُسُقُ تَارَيٍ مَشْرِن، «وٌ وَلِ مُندُن نَبَمَ؟» عٍ نَشَ مِسِرَ مَنفّ يَابِ، «مُشُ تَن عِ شَ كٌنيِيٍ قِندِشِ شُرُ سٍ دّ مَدٌنيِيٍ نَن نَ، عَلْ مُشُ بٍنبَيٍ نُ عَ رَبَمَ كِ نَشّ.»

4 عٍ مَن نَشَ عَ قَلَ مِسِرَ مَنفّ بّ، «مُشُ قَشِ نّ، مُشُ شَ لُ يِ بْشِ مَ سِندٍن، بَرِ مَ سّشّ مُ نَ مُشُ شْنيِ كْرّ شُرُ سٍيٍ نَشَن دٌنمَ. كَامّ بَرَ دِن كَنَان بْشِ رَ. مُشُ بَرَ عِ مَيَندِ عِ شَ مُشُ تَن عِ شَ كٌنيِيٍ سَفٌ سَ، مُشُ شَ لُ فٌسٍن بْشِ مَ.»

5 مِسِرَ مَنفّ نَشَ عَ قَلَ يُسُقُ بّ، «عِ بَبَ نُن عِ تَارَيٍ بَرَ قَ عِ قْشْ رَ.

6 مِسِرَ بْشِ نَ عِ سَفٌي. يِرٍ قَنيِ قٍن فٌسٍن مَبِرِ، عِ بَبَ نُن عِ نفَشَكٍرٍنيِيٍ لُمَ دّننَشّ. شَ عِ مِشِ مَتِنشِنشِيٍ كٌلٌن عٍ يَ مَ، عٍ سُفَندِ عٍ شَ قِندِ ﭑ مَ شُرُ سٍ دّ مَدٌنيِيٍ رَ.»

7 نَ دَنفِ شَنبِ، يُسُقُ نَشَ عَ بَبَ شَنِن مِسِرَ مَنفّ يِرٍ، عَ عَ مَسٍن عَ بّ. يَشُبَ نَشَ دُبَ مِسِرَ مَنفّ بّ.

8 مِسِرَ مَنفّ نَشَ يَشُبَ مَشْرِن، «عِ شَ سِمَيَ حّ يٍرِ عَ رَ يِ كِ؟»

9 يَشُبَ نَشَ مِسِرَ مَنفّ يَابِ، «ﭑ مَ سِمَيَ حّ كّمّ حّ تٌنفٌ سَشَن نَ عَ رَ يِ كِ. ﭑ سِمَيَ دُنكٍ نَشَسِشِ نَن سْتْشِ. عَ حَن مُ مَكْرّشِ ﭑ بٍنبَيٍ شَ سِمَيَ شَسَبِ رَ.»

10 يَشُبَ تٌ دُبَ مِسِرَ مَنفّ بّ، عَ نَشَ سِفَ.

11 يُسُقُ نَشَ بْشِ قَنيِ قِ عَ بَبَ نُن عَ تَارَيٍ مَ، عَلْ مِسِرَ مَنفّ عَ يَمَرِ كِ نَشّ. عٍ بْشِ نَشَن سْتْ عَ تَن نَن قَن مِسِرَ بْشِ بِرِن بّ. عَ شِلِ رَ مٍسٍسِ.

12 يُسُقُ نَشَ مّينِ عَ بَبَ، عَ تَارَيٍ، نُن عَ بَبَ شَ دٍنبَيَيٍ بِرِن مَ.

13 نَ تّمُي كَامّ نُ بَرَ سّنبّ سْتْ. دٌنسٍ مُ نُ تٌمَ كٍلِ مِسِرَ بْشِ مَ هَن كَنَان. كَامّ نَشَ حَمَ هَلَكِ.

14 كْبِرِ نَشَن بِرِن نُ نَ مِسِرَ نُن كَنَان بْشِ مَ، يُسُقُ نَشَ عَ مَسَرَ مّنفِ رَ. عَ نَشَ نَ كْبِرِ رَفَتَ مِسِرَ مَنفّ شَ بَنشِ كُي.

15 مِسِرَكَيٍ نُن كَنَانكَيٍ شَ كْبِرِ بِرِن تٌ حْن، مِسِرَكَيٍ نَشَ قَ يُسُقُ يِرٍ عٍ عَ قَلَ، «دٌنسٍ سٌ مُشُ يِ رَ! عَ لَنمَ مُشُ شَ قَشَ عِ يَ شْرِ؟ مُشُ شَ كْبِرِ بِرِن بَرَ حْن.»

16 يُسُقُ نَشَ عٍ يَابِ، «وٌ قَ وٌ شَ شُرُ سٍيٍ رَ، وٌن شَ عَ مَسَرَ دٌنسٍ رَ، بَرِ مَ كْبِرِ مُ نَ وٌ يِ رَ.»

17 عٍ نَشَ قَ عٍ شَ شُرُ سٍيٍ رَ يُسُقُ شْن مَ. عٍ شَ سٌي، سِيٍ، يّشّييٍ، نِنفٍيٍ، نُن سٌقَلٍيٍ، عٍ نٍيٍ بِرِن مَسَرَ يُسُقُ مَ دٌنسٍ رَ. عَ نَشَ دٌنسٍ تَشُن عٍ رَ عٍ شَ شُرُ سٍيٍ مَسَرّ رَ.

18 نَ حّ تٌ دَنفِ، عٍ نَشَ قَ عَ يِرٍ، عٍ عَ قَلَ عَ بّ، «مُشُ مُ نْمَ مُشُ نْشُندٍ مُشُ شَ مَنفّ مَ. كْبِرِ يٌ مُ نَ مُشُ يِ رَ. مُشُ شَ شُرُ سٍ قَن بِرِن نَ مُشُ شَ مَنفّ يِ رَ. مُشُ فُندِيٍ نُن مُشُ شَ بْشِيٍ فبَنسَن نَن لُشِ مُشُ يِ رَ دٌنسٍ سَرٍ رَ مُشُ شَ مَنفّ بّ.

19 عَ لَنمَ مُشُ شَ قَشَ عِ يَ شْرِ، مُشُ شَ بْشِيٍ شُن شَ رَكَنَ؟ مُشُ نُن مُشُ شَ بْشِيٍ مَسَرَ دٌنسٍ رَ، مُشُ شَ قِندِ مِسِرَ مَنفّ شَ كٌنيِيٍ رَ، مُشُ شَ بْشِيٍ قَن شَ قِندِ عَ فبٍ رَ. سَنسِ شْرِ سٌ مُشُ يِ رَ مُشُ نَشَن نَوَلِمَ، مُشُ شَ بَلٌ عَلَكٌ مُشُ نَشَ قَشَ، بْشِ قَن نَشَ رَبّحِن.»

20 نَ كُي يُسُقُ نَشَ مِسِرَكَيٍ شَ بْشِ بِرِن سَرَ مِسِرَ مَنفّ بّ. كَامّ شَ شْرْشْي نُ بَرَ عَ نِيَ عٍ شَ عٍ شَ بْشِ بِرِن مَتِ مِسِرَ مَنفّ مَ.

21 يُسُقُ مِسِرَ حَمَ بِرِن قِندِ كٌنيِيٍ رَ نَ كِ نّ.

22 كْنْ سّرّشّدُبّيٍ تَن مُ عٍ فبٍ بْشِيٍ سَرَ، بَرِ مَ مِسِرَ مَنفّ نُ هِننّمَ عٍ رَ دٌنسٍ قٍ رَ.

23 يُسُقُ نَشَ عَ قَلَ حَمَ بّ، «ﭑ بَرَ وٌ سَرَ تٌ عَ نُن وٌ شَ بْشِيٍ مِسِرَ مَنفّ بّ. سَنسِ نَن يِ كِ، وٌ شَ بْشِيٍ رَوَلِ.

24 عَ شَبَ تّمُي، وٌ عَ دْشْ سُولِ ندٍ سٌمَ مِسِرَ مَنفّ نَن يِ رَ. دْشْ نَانِ نَشٍيٍ لُمَ، نَ قِندِ مَ سَنسِ نُن بَلٌي نَن نَ، وٌ تَن، وٌ شَ دِيٍ، عَ نُن وٌ شَ مِشِ بِرِن بّ.»

25 عٍ نَشَ عَ قَلَ، «عِ بَرَ مُشُ رَكِسِ! مُشُ بَرَ مُشُ شَ مَنفّ شَ قٍ قَنيِ تٌ عَ نَشَن نَبَشِ مُشُ بّ. مُشُ قِندِ مَ مِسِرَ مَنفّ شَ كٌنيِيٍ نَن نَ.»

26 يُسُقُ نَشَ نَ قِندِ سّرِيّ رَ. هَن تٌ مِسِرَ بْشِ دَشَمُي دْشْ سُولِ ندٍ بِرِن قِندِ مِسِرَ مَنفّ نَن فبٍ رَ. سّرّشّدُبّيٍ شَ بْشِيٍ نَن فبَنسَن مُ قِندِشِ مِسِرَ مَنفّ فبٍ رَ.

27 عِسِرَيِلَكَيٍ نَشَ سَبَتِ فٌسٍن مِسِرَ بْشِ مَ. نَ بْشِ نَشَ قِندِ عٍ فبٍ رَ. عٍ بْنسْي نَشَ فبٌ يّ.

28 يَشُبَ حّ قُ نُن سٌلٌقٍرٍ نَن نَبَ مِسِرَ بْشِ مَ. عَ شَ سِمَيَ نَشَ حّ كّمّ حّ تٌنفٌ نَانِ نُن سٌلٌقٍرٍ لِ.

29 عِسِرَيِلَ شَ سِمَيَ تٌ نُ قَ حْنقٍ، عَ نَشَ عَ شَ دِ يُسُقُ شِلِ، عَ عَ قَلَ عَ بّ، «نَ كُي، عِ شَ عِ بّلّشّ دْشْ ﭑ تَبٍ بُنيِ رَ، عِ قَ عِ كَلِ ﭑ بّ قَ عَ قَلَقٍ رَ، عِ مُ ﭑ نَفَتَمَ يِ مِسِرَ بْشِ مَ، عِ شَ مّينِ ﭑ مَ تِنشِنيِ كُي، عِ هِننّ ﭑ نَ.

30 ﭑ نَ لَاشِرَ تّمُي نَشّ، عِ شَ ﭑ نَمِنِ مِسِرَ، عِ سَ ﭑ نَفَتَ ﭑ بٍنبَيٍ شَ فَبُرِ يِرٍ.» يُسُقُ نَشَ عَ يَابِ، «عِ نَشَن قَلَشِ ﭑ بّ، ﭑ نَ رَبَمَ نّ.»

31 يَشُبَ نَشَ عَ قَلَ، «عِ رَكَلِ ﭑ بّ.» يُسُقُ نَشَ عَ كَلِ عَ بّ. نَ تّمُي يَشُبَ نَشَ عَ قٍلٍن عَ شَ سَدٍ شُنيِ رَ.