Genesis 30 in Susu

1 رَشٍلٍ تٌ بَرَ عَ تٌ، عَ مُ قَ دِ بَرِقٍ، عَ نَشَ عَ تَارَ تْونّ. عَ نَشَ عَ قَلَ يَشُبَ بّ، «دِ قِ ﭑ قَن مَ، شَ نَ مُ عَ رَ ﭑ قَشَمَ نّ.»

2 يَشُبَ نَشَ شْنْ عَ شَ وْيّنيِ مَ. عَ نَشَ عَ قَلَ عَ بّ، «عِ تَن عَ مَحْشُنشِ نّ عَ عَلَ نَ ﭑ تَن نَن نَ؟ عَلَ نَ عَ نِيَشِ عِ مُ دِ بَرِقٍ!»

3 رَشٍلٍ نَشَ عَ يَابِ، «ﭑ مَ كٌنيِ فِنّ بِلَ تٌنفٌ، عَلَكٌ عَ شَ دِ بَرِ ﭑ بّ. عَ شَ قِندِ ﭑ مَ سَابُي رَ دِ بَرِقٍ رَ.»

4 رَشٍلٍ نَشَ عَ شَ كٌنيِ فِنّ تٌنفٌ، عَ عَ سٌ عَ شَ شّمّ يَشُبَ يِ رَ. عٍ تٌ كَقُ،

5 بِلَ نَشَ تّيفّ، عَ نَشَ دِ شّمّ بَرِ يَشُبَ بّ.

6 رَشٍلٍ نَشَ عَ قَلَ، «عَلَ بَرَ ﭑ مَ كِيتِ سَ. عَ بَرَ ﭑ مَ وْيّنيِ مّ. نَ نَن عَ تٌشِ عَ دِ قِشِ ﭑ مَ.» عَ نَشَ نَ دِ شِلِ سَ دَنَ.

7 رَشٍلٍ شَ كٌنيِ فِنّ بِلَ مَن نَشَ تّيفّ. عَ نَشَ دِ شّمّ قِرِن ندٍ بَرِ يَشُبَ بّ.

8 رَشٍلٍ نَشَ عَ قَلَ، «عَلَ بَرَ ﭑ مَلِ كَتّ بِرِن نَ عَلَكٌ ﭑ شَ شُن نَكٍلِ سْتْ ﭑ تَارَ فِنّمَ شُن مَ.» عَ نَشَ عَ شَ دِ شِلِ سَ نَقَتَلِ.

9 لٍيَ تٌ بَرَ عَ كٌلٌن عَ مُ دِ بَرِ مَ قَ، عَ نَشَ عَ شَ كٌنيِ فِنّ سِلِثَ تٌنفٌ، عَ نَشَ عَ سٌ يَشُبَ يِ رَ عَ شَ قِندِ عَ شَ فِنّ رَ.

10 سِلِثَ نَشَ دِ شّمّ بَرِ يَشُبَ بّ.

11 لٍيَ نَشَ عَ قَلَ، «هّيرِ بَرَ قَ ﭑ مَ.» عَ نَشَ نَ دِ شِلِ سَ فَدِ.

12 سِلِثَ نَشَ دِ قِرِن ندٍ سْتْ يَشُبَ بّ.

13 لٍيَ نَشَ عَ قَلَ، «ﭑ بَرَ حّلّشِن. يَكْسِ، فِنّ بِرِن بَرَ عَ كٌلٌن ﭑ بَرَ هّيرِ فبٍفبٍ سْتْ.» عَ نَشَ عَ شِلِ سَ عَسٍرِ.

14 مّنفِ شَبَ تّمُي تٌ بَرَ عَ لِ، رُبٍن نَشَ سِفَ شّ مَ. عَ نَشَ بٌفِسٍ ندٍ لِ نَا، نَشَن شِلِ مَرَقَنيِ بٌفِسٍ. عَ نَشَ قَ عَ رَ عَ نفَ شْن. نَ نَن لَن رَشٍلٍ نَشَ عَ قَلَ لٍيَ بّ، «ﭑ بَرَ عِ مَشَندِ، عِ شَ عِ شَ دِ شَ مَرَقَنيِ بٌفِسٍ ندٍيٍ قِ ﭑ مَ.»

15 لٍيَ نَشَ عَ يَابِ، «عِ بَرَ ﭑ مَ شّمّ بَ ﭑ يِ رَ. نَ مُ عِ وَ سَشِ؟ عِ مَن وَشِ ﭑ مَ دِ شَ مَرَقَنيِ بٌفِسٍ نَن قَن تٌنفٌقٍ؟» رَشٍلٍ نَشَ عَ قَلَ، «تٌ كْي رَ، وٌ نُن يَشُبَ نَن قَمَ شِدٍ عِ شَ دِ شَ مَرَقَنيِ بٌفِسٍ حْشْي رَ.»

16 يَشُبَ تٌ سٌ نُنمَرٍ رَ كٍلِقٍ شّ مَ، لٍيَ نَشَ عَ رَلَن. عَ نَشَ عَ قَلَ عَ بّ، «عِ شِمَ ﭑ تَن نَن شْن مَ تٌ كْي رَ. ﭑ بَرَ تٌ كْي سَرٍ قِ ﭑ مَ دِ شَ مَرَقَنيِ بٌفِسٍ رَ.» ءَ تَن نُن يَشُبَ نَشَ كَقُ نَ كْي رَ.

17 عَلَ نَشَ لٍيَ شَ مَشَندِ تٌنفٌ، عَ نَشَ تّيفّ. نَ نَشَ قِندِ عَ شَ دِ سُولِ ندٍ رَ يَشُبَ بّ.

18 عَ نَشَ عَ قَلَ، «عَلَ بَرَ ﭑ سَرٍ قِ ﭑ مَ كٌنيِ فِنّ سٌقٍ رَ ﭑ مَ شّمّ يِ.» عَ نَشَ عَ شَ دِ شِلِ سَ عِسَكَرِ.

19 لٍيَ مَن نَشَ تّيفّ دِ سٍننِ ندٍ مَ. عَ نَشَ نَ دِ بَرِ يَشُبَ بّ.

20 لٍيَ نَشَ عَ قَلَ، «عَلَ بَرَ ﭑ كِ. يِ بِيَاسِ ﭑ مَ شّمّ ﭑ بِنيَمَ نّ، بَرِ مَ ﭑ بَرَ دِ سٍننِ بَرِ عَ بّ.» عَ نَشَ نَ دِ شِلِ سَ سَبُلٌن.

21 نَ شَنبِ عَ مَن نَشَ دِ فِنّ بَرِ. عَ نَشَ عَ شِلِ سَ دِنَ.

22 نَ تّمُي عَلَ نَشَ عَ حّنفِ رَ سِفَ رَشٍلٍ شَ قٍ شْن. عَ نَشَ عَ شَ كْنتْقِلِ مّ، عَ عَ قِندِ دِ بَرِ رَ.

23 رَشٍلٍ نَشَ تّيفّ، عَ نَشَ دِ بَرِ. عَ نَشَ عَ قَلَ، «عَلَ بَرَ ﭑ نَمِنِ ﭑ مَ يَافِ كُي.»

24 عَ نَشَ نَ دِ شِلِ سَ يُسُقُ. نَ شِلِ يَتِ نَن قِندِشِ عَ شَ مَشَندِ رَ، قَ عَ قَلَقٍ، «عَلَتَلَ مَن شَ دِ شّمّ فبّتّ قَن قِ ﭑ مَ.»

25 رَشٍلٍ تٌ يُسُقُ بَرِ، يَشُبَ نَشَ عَ قَلَ لَبَن بّ، «عَ لُ ﭑ شَ فبِلٍن ﭑ مَ بْشِ مَ.

26 عَ لُ ﭑ شَ ﭑ مَ فِنّيٍ شَنِن عَ نُن ﭑ مَ دِيٍ، ﭑ وَلِشِ عِ بّ نَشٍيٍ شَ قٍ رَ. عِ عَ كٌلٌن ﭑ وَلِ نَشَن شَسَبِ رَبَشِ عِ بّ.»

27 لَبَن نَشَ عَ قَلَ عَ بّ، «يَندِ، شَ ﭑ نَقَن عِ مَ، عِ شَ دِحّ، عِ شَ لُ بٍ. ﭑ بَرَ عَ كٌلٌن سٍمَتٌي سَابُي رَ، عَلَتَلَ بَرَكّ سَشِ ﭑ مَ عِ تَن نَن شَ قٍ رَ.

28 عَ قَلَ ﭑ بّ عِ وَ مَ وَلِ سَرٍ نَشَن شْن. ﭑ نَ قِمَ نّ عِ مَ.»

29 يَشُبَ نَشَ عَ قَلَ عَ بّ، «عِ تَن يّتّ يَتِ عَ كٌلٌن ﭑ وَلِشِ عِ بّ كِ نَشّ هَن عِ شَ فْورّ بَرَ قِندِ عَ رَ. نَ سَابُي كٍلِشِ ﭑ تَن نَن مَ.

30 دٌندٌرٌنتِ نَن نُ نَ عِ يِ رَ بٍينُ ﭑ شَ قَ، عَ فبٍفبٍ بَرَ سَ عَ شُن مَ. عَلَتَلَ بَرَ بَرَكّ سَ عِ شَ قٍ كَبِ ﭑ نَشَ سٌ عِ شْنيِ. يَكْسِ، عِ مُ عَ لُمَ ﭑ شَ وَلِ ندٍ رَبَ ﭑ مَ دٍنبَيَ قَن بّ؟»

31 لَبَن نَشَ عَ مَشْرِن، «عَ لَن ﭑ شَ يٍرِ قِ عِ مَ؟» يَشُبَ نَشَ عَ يَابِ، «عِ نَشَ سٍسٍ قِ ﭑ مَ. شَ عِ بَرَ تِن قٍ رَ ﭑ نَشَن قَلَشِ عِ بّ عِ شَ عَ رَبَ، ﭑ قَن بَرَ تِن ﭑ حّنفِ سَقٍ رَ عِ شَ فْورّ شْن مَ.

32 ﭑ سِفَمَ تٌ، ﭑ شَ عِ شَ شُرُ سٍ بِرِن مَتٌ. يّشّي نُن سِ مَكَتُنشِ بِرِن تِ سّيتِ كٍرٍن، عَ نُن نَشٍيٍ بِرِن نَقْورْشِ. ﭑ مَسُندِ قِندِ مَ نٍيٍ نَن نَ.

33 ﭑ مَ تِنشِنيِ قَمَ مَكّنّندٍ عِ قَمَ شُرُ سٍ مَتٌدٍ تّمُي نَشّ. سِ نَشٍيٍ بِرِن مُ مَكَتُنشِ نُن يّشّي يْرّ بِرِن نَشٍيٍ مُ قْورْ، نٍيٍ بَرَ قِندِ مُحّ رَ ﭑ مَبِرِ.»

34 لَبَن نَشَ عَ قَلَ، «ﭑ بَرَ تِن نَ رَ. عِ نَشَن قَلَشِ نَ كِ، وٌن بَرَ لَن نَ مَ.»

35 نَ لْشْي لَبَن نَشَ سِ شّمّيٍ نُن فِنّيٍ مَيٍفٍتِ، سَرِنيِ سَشِ نَشٍيٍ مَ عَ نُن نَشٍيٍ مَكَتُنشِ. عَ مَن نَشَ يّشّي رَقْورْشِ مَيٍفٍتِ. عَ نَشَ نَ شُرُ سٍ بِرِن سٌ عَ شَ دِيٍ يِ رَ.

36 نَ شَنبِ عَ نَشَ نٍيٍ شَنِن يِرٍ شِ سَشَن حّرّ رَبَمَ دّننَشّ كِرَ شْن عٍ نُن يَشُبَ تَفِ. يَشُبَ نُ قَ لَبَن شَ شُرُ سٍ دْنشْييٍ دّ مَدٌن.

37 نَ تّمُي يَشُبَ نَشَ وُرِ بِلِ مْولِ سَشَن سَلٌنيِ شِندٍ فِرَ. عَ نَشَ عٍ كٌبٌلٍيٍ بَ عٍ مَ يِرٍ ندٍ عَلَكٌ سَرِنيِ قِيشّ شَ مَكّنّن.

38 عَ نَشَ عٍ سَ شُرُ سٍيٍ يٍ مِندٍ عَلَكٌ شُرُ سٍ شَ عٍ يَيٍ تِ عٍ رَ عٍ يٍ مِنمَ تّمُي نَشّ. شُرُ سٍيٍ نَ سِفَ يٍ مِندٍ، شُرُ سٍ شّمّيٍ شَ تٍ شُرُ سٍ فِنّيٍ مَ سَلٌنيِيٍ يَ عِ.

39 نَ نَن عَ تٌشِ، نَ شُرُ سٍيٍ نَشَ دِيٍ بَرِ، سَرِنيِيٍ نُن كَتُنيِيٍ نَ عٍ مَ.

40 يَشُبَ نَشَ نَ شُرُ سٍ يْرّيٍ سَ عٍ شَتِ مَ، كْنْ بٌورٍيٍ تِ لَبَن شَ شُرُ سٍيٍ يَ رَ سَرِنيِ نَ نَشٍيٍ مَ، عَ نُن نَشٍيٍ مَقْورْشِ. نَ كِ عَ فْورّ قِرِن نَن يَءِلَنشِ. عَ مُ تِن عَ فبٍ شَ لُ لَبَن شَ شُرُ سٍيٍ يَ مَ.

41 شُرُ سٍ سّنبّمَيٍ نُ تٍمَ فِنّمَيٍ مَ تّمُي نَشّ، يَشُبَ نَشَ نَ سَلٌنيِ مْولِ سَ شُرُ سٍ يٍ مِندٍ عَلَكٌ عٍ شَ تٍ فِنّيٍ مَ سَلٌنيِيٍ يَ عِ.

42 يَشُبَ مُ نُ نَ وَلِ رَبَمَ شُرُ سٍ شُرِيٍ رَ. نَ نَن عَ نِيَشِ شُرُ سٍ شُرِيٍ نَشَ قِندِ لَبَن فبٍ رَ، عَ سّنبّمَيٍ نَشَ قِندِ يَشُبَ فبٍ رَ.

43 نَ كُي يَشُبَ بَرَ قِندِ بَننَمِشِ بٍلٍبٍلٍ رَ. شُرُ سٍيٍ، كٌنيِيٍ، حْشْمّيٍ، نُن سٌقَلٍ فبٍفبٍ بَرَ لُ عَ يِ رَ.