Genesis 27 in Susu

1 عِسِيَفَ نُ بَرَ فّ قٌرِدٍ، عَ يَيٍ نُ بَرَ رَقْورْ. عَ مُ نْمَ سٍسٍ تٌدٍ قَ. عَ نَشَ عَ شَ دِ سِنفٍ عٍسَيُ شِلِ، «ﭑ مَ دِ!» عٍسَيُ نَشَ عَ رَتِن، «ﭑ تَن نَن يَ!»

2 عِسِيَفَ نَشَ عَ قَلَ عَ بّ، «عِ بَرَ عَ تٌ، ﭑ بَرَ فّ قٌرِدٍ. ﭑ مُ عَ كٌلٌن ﭑ قَشَمَ تّمُي نَشّ.

3 تَنبّ سَسٍ نُن شَلِ تٌنفٌ، عِ شَ سِفَ وُلَءِ سُبٍ قٍندٍ ﭑ بّ.

4 عِ شَ نَ سُبٍ حِن عَلْ عَ رَقَنشِ ﭑ مَ كِ نَشّ. عِ شَ قَ عَ رَ ﭑ شْن مَ، عَلَكٌ ﭑ شَ نْ دُبَدٍ عِ بّ بٍينُ ﭑ شَ قَشَ.»

5 نَ تّمُي رٍبٍكَ تِشِ عَ تُلِ مَتِشِ عِسِيَفَ رَ، عَ نَشَن قَلَشِ عٍسَيُ بّ. عٍسَيُ نَشَ سِفَ وُلَءِ سُبٍ بُندٍ عَ بَبَ بّ.

6 رٍبٍكَ نَشَ عَ قَلَ عَ شَ دِ يَشُبَ بّ، «ﭑ بَرَ عِ بَبَ شُي مّ عَ يِ وْيّنيِ قَلَمَ عٍسَيُ بّ،

7 ‹سَ سُبٍ بُن ﭑ بّ، عِ شَ عَ حِن عَ قَنيِ رَ، ﭑ شَ عَ دٌن. ﭑ نَ فّ نَ سُبٍ دٌندٍ، ﭑ دُبَمَ عِ بّ عَلَتَلَ يَ عِ بٍينُن ﭑ شَ قَشَ.›

8 يَكْسِ، ﭑ مَ دِ، عِ تُلِ مَتِ ﭑ نَ عَ قَنيِ رَ. ﭑ نَشَن قَلَمَ عِ بّ، عِ شَ عَ رَبَ.

9 سِفَ فْورّ، عِ شَ قَ سِ قَنيِ قِرِن نَ. ﭑ شَ عٍ حِن عَ قَنيِ رَ عَلْ عِ بَبَ وَ مَ عَ شْن مَ كِ نَشّ.

10 ﭑ نَ فّ نَ رَ، عِ شَ عَ شَنِن عِ بَبَ شْن مَ، عَلَكٌ عَ شَ دُبَ عِ بّ بٍينُن عَ شَ قَشَ.»

11 يَشُبَ نَشَ عَ نفَ رٍبٍكَ يَابِ، «عٍسَيُ قَتٍ مَشَبٍ كَنيِ نَن عَ رَ. ﭑ تَن قَتٍ مَشَبٍ مُ نَ ﭑ بّ.

12 ﭑ بَبَ نَ ﭑ مَسُشُ، عَ كٌلٌنمَ نّ عٍسَيُ شَ مُ عَ رَ، ﭑ قِندِ مَ وُلٍ قَلّ نَن نَ عَ تَن بّ. بٍينُن ﭑ شَ دُبَ سْتْ، ﭑ قَمَ دَنكّ نَن سْتْدٍ.»

13 عَ نفَ نَشَ عَ قَلَ، «عَدٍ، نَ دَنكّ شَ فبِلٍن ﭑ تَن نَن مَ، ﭑ مَ دِ. عِ نَشَن نَبَمَ، عِ تُلِ مَتِ ﭑ نَ. سِفَ، عِ سَ قَ نَ سِ قَنيِ قِرِنيِيٍ رَ.»

14 يَشُبَ نَشَ سِفَ، عَ نَشَ قَ سِ قَنيِ قِرِنيِيٍ رَ عَ نفَ شْن مَ. عَ نفَ نَشَ نَ دٌنسٍ يَءِلَن عَلْ عَ رَقَنشِ عِسِيَفَ مَ كِ نَشّ.

15 نَ شَنبِ، رٍبٍكَ نَشَ عَ شَ دِ سِنفٍ عٍسَيُ شَ دٌنمَ تٌنفٌ، دٌنمَ نَشَن قَن عَ شَ دُفِيٍ يَ مَ بَنشِ كُي. عَ نَشَ نَ رَفٌرٌ يَشُبَ مَ، عَ شَ دِ قِرِن ندٍ.

16 عَ نَشَ عَ شَ دِ بّلّشّيٍ نُن عَ كْنيِ مَسَلَشُنشِ مَشِرِ سِ كِرِ رَ.

17 عَ نَشَ سُبٍ نُن تَامِ سٌ عَ شَ دِ يَشُبَ يِ رَ، عَ نَشَن يَءِلَنشِ.

18 نَ تّمُي يَشُبَ نَشَ سِفَ عَ بَبَ يِرٍ، عَ عَ قَلَ عَ بّ، «ﭑ بَبَ، ﭑ تَن نَن يَ.» عَ بَبَ نَشَ عَ مَشْرِن، «ﭑ مَ دِ مُندُن لَنشِ عِ تَن مَ؟»

19 يَشُبَ نَشَ عَ بَبَ يَابِ، «عٍسَيُ نَن لَنشِ ﭑ مَ، عِ شَ دِ سِنفٍ. عِ نَشَن مَشْرِنشِ ﭑ مَ، ﭑ بَرَ قَ عَ رَ. يَندِ، كٍلِ، عِ دْشْ، عِ شَ ﭑ مَ سُبٍ يَءِلَنشِ دٌن. نَ تّمُي عِ شَ دُبَ ﭑ بّ.»

20 عِسِيَفَ نَشَ عَ قَلَ عَ شَ دِ بّ، «ﭑ مَ دِ، عِ يِ سُبٍ تٌشِ يِ عِكْرّشِ رَ دِ؟» يَشُبَ نَشَ عَ يَابِ، «عِ مَرِفِ عَلَتَلَ نَن يِ قِشِ ﭑ مَ سْونّيَ رَ.»

21 عِسِيَفَ نَشَ عَ قَلَ يَشُبَ بّ، «ﭑ مَ دِ، عِ مَسٌ ﭑ نَ، ﭑ شَ عِ مَسُشُ، عَلَكٌ ﭑ شَ لَ عَ رَ عَ ﭑ مَ دِ عٍسَيُ يَتِ نَن عِ رَ.»

22 يَشُبَ نَشَ عَ مَسٌ عَ بَبَ رَ. عِسِيَفَ نَشَ عَ قَتٍ مَسُشُ. عَ نَشَ عَ قَلَ، «عِ شُي مَنِيَ يَشُبَ شُي رَ، كْنْ عِ بّلّشّ تَن عٍسَيُ بّلّشّ نَ عَ رَ.»

23 عِسِيَفَ مُ نْ يَشُبَ كٌلٌندٍ، بَرِ مَ عَ بّلّشّيٍ نُ مَشِرِشِ شَبٍ رَ، عَلْ عَ تَارَ عٍسَيُ نَ كِ نَشّ. نَ كُي عِسِيَفَ نَشَ دُبَ يَشُبَ بّ.

24 عِسِيَفَ مَن نَشَ عَ مَشْرِن، «ﭑ مَ دِ عٍسَيُ يَتِ نَن عِ رَ؟» يَشُبَ نَشَ عَ يَابِ، «عِيٌ.»

25 عِسِيَفَ نَشَ عَ قَلَ، «قَ دٌنسٍ رَ، عِ نَشَن يَءِلَنشِ، ﭑ شَ عَ دٌن، ﭑ قَ دُبَ عِ بّ.» يَشُبَ نَشَ دٌنسٍ سٌ عَ بَبَ يِ رَ، عِسِيَفَ نَشَ عَ دٌن. يَشُبَ نَشَ وّنِ قَن سٌ عَ يِ رَ، عَ نَشَ نَ قَن مِن.

26 نَ تّمُي، عَ بَبَ عِسِيَفَ نَشَ عَ قَلَ عَ بّ، «ﭑ مَ دِ، عِ مَكْرّ ﭑ نَ، عِ شَ قِندِفِلِن ﭑ مَ.»

27 يَشُبَ نَشَ عَ مَسٌ عَ رَ، عَ نَشَ قِندِفِلِن عَ مَ. عِسِيَفَ نَشَ عَ شَ سٌسٍ شِرِ مّ. نَ دَنفِ شَنبِ، عَ نَشَ دُبَ عَ بّ. عَ نَشَ عَ مَسٍن، «عِيٌ، ﭑ مَ دِ شِرِ لُشِ نّ عَلْ عَلَتَلَ بَرَكّ سَشِ شّ نَشَن مَ.

28 عَلَ شَ شِنِ قِ عِ مَ نَشَن كٍلِمَ كٌورٍ مَ. عَلَ شَ بْشِ دَشَمُي قِ عِ مَ. عَلَ شَ بَرَكّ سَ عِ شَ شّ مَ. عَلَ شَ وّنِ فبٍفبٍ قِ عِ مَ.

29 عَلَ شَ حَمَ بِرِن لُ عِ سَفٌي. عَلَ شَ سِ بِرِن مَفٌرٌ عِ بّ. عِ شَ قِندِ عِ نفَشَكٍرٍنيِيٍ شَ يَرٍرَتِ رَ. عٍ بِرِن شَ عٍ مَفٌرٌ عِ بّ. مِشِ يٌ نَ عِ دَنكَ، نَ دَنكّ شَ فبِلٍن عَ كَنيِ مَ. مِشِ يٌ نَ دُبَ عِ بّ، عَلَ شَ بَرَكّ سَ نَ كَنيِ مَ.»

30 عِسِيَفَ تٌ بَرَ فّ دُبَدٍ عَ بّ، يَشُبَ نَشَ مِنِ. عَ مُ بُ، يَشُبَ تَارَ عٍسَيُ قَن نَشَ سٌ كٍلِقٍ سُبٍ قٍندٍ.

31 عَ قَن نَشَ نَ سُبٍ يَءِلَن عَ قَنيِ رَ عَلْ عَ بَبَ وَ مَ عَ شْن مَ كِ نَشّ. عَ تٌ قَ عَ رَ عَ بَبَ شْن، عَ نَشَ عَ قَلَ عَ بَبَ بّ، «ﭑ بَبَ، كٍلِ، عِ شَ دْشْ، عِ سُبٍ دٌن ﭑ نَشَن يَءِلَنشِ عِ بّ عَلَكٌ عِ شَ دُبَ ﭑ بّ.»

32 عَ بَبَ عِسِيَفَ نَشَ عَ مَشْرِن، «ندٍ نَ عِ تَن نَ؟» عٍسَيُ نَشَ عَ يَابِ، «عٍسَيُ نَن نَ ﭑ نَ، عِ شَ دِ سِنفٍ.»

33 نَ قٍ نَشَ عِسِيَفَ عِقُ عَ قَنيِ رَ. عَ قَتٍ بِرِن نَشَ سّرّن عَ مَ. عَ نَشَ عَ قَلَ عَ بّ، «كْنْ ندٍ تَن قَشِ سُبٍ يَءِلَنشِ رَ ﭑ بّ، ﭑ نَشَن دٌنشِ يَكْسِ بٍينُن عِ تَن شَ سٌ بٍ يِ كِ؟ ﭑ بَرَ دُبَ نَ كَنيِ بّ. عَ تَن نَن قَمَ بَرَكّ سْتْدٍ.»

34 عٍسَيُ تٌ عَ بَبَ شَ مَسٍنيِ مّ، عَ بْحّ نَشَ مِنِ، عَ نَشَ سْنشْي فبٍفبٍ رَتٍ. عَ نَشَ عَ بَبَ مَيَندِ، «ﭑ بَبَ، دُبَ ﭑ قَن بّ.»

35 عِسِيَفَ نَشَ عَ يَابِ، «عِ شُنيَ بَرَ ﭑ مَدَشُ. ﭑ بَرَ فّ دُبَدٍ عَ تَن نَن بّ.»

36 عٍسَيُ نَشَ عَ قَلَ، «عَ شِلِ يَتِ نَ عَ شُن مَ، يَشُبَ، ‹مِشِ مَيَنقّ›. عَ سَنمَيَ قِرِن نَن يَ عَ ﭑ مَيَنقَمَ. عَ بَرَ ﭑ مَ قٌرِحَ تِدٍ تٌنفٌ. يَكْسِ عَ بَرَ ﭑ مَ دُبّ قَن سْتْ.» عٍسَيُ مَن نَشَ عَ مَشْرِن، «دُبّ يٌ مُ نَ عِ يِ رَ سْنْن، عِ لَن عِ شَ نَشَن نَبَ ﭑ تَن بّ؟»

37 عِسِيَفَ نَشَ عَ مَسٍن عٍسَيُ بّ، «ﭑ بَرَ عَ تَن قِندِ عِ شُنيِ رَ، ﭑ مَن بَرَ عَ نفَشَكٍرٍنيِ بِرِن سٌ عَ يِ رَ عٍ شَ لُ عَ بُن مَ. ﭑ بَرَ بَرَكّ فبٍفبٍ قِ عَ مَ، عَ نُن وّنِ قَنيِ. ﭑ مَ دِ، ﭑ نْمَ مُنسٍ رَبَدٍ عِ تَن بّ؟»

38 عٍسَيُ نَشَ عَ قَلَ عَ بَبَ بّ، «دُبّ كٍرٍن ثٍتِ نَن نَ عِ يِ رَ؟ ﭑ بَبَ، دُبَ ﭑ تَن قَن بّ.» عَ نَشَ وَ عَ شُي عِتٍشِ رَ.

39 عَ بَبَ عِسِيَفَ نَشَ عَ يَابِ، «عَ كٌلٌن، عِ مُ قَمَ بْشِ دَشَمُي سْتْدٍ، عَ نُن شِنِ نَشَن كٍلِمَ كٌورٍ مَ.

40 عِ بَلٌمَ عِ شَ سَنتِدّفّمَ نَن شُن نَ. عِ قَمَ وَلِدٍ عِ شُنيَ شَ نْي نَن بُن مَ، كْنْ يَرٍ عِ قَمَ عِ يّتّ سْتْدٍ. عَ نَ نْي نَشَن سَ عِ مَ، عِ تٌندِ مَ نّ عَ رَ.»

41 عٍسَيُ نُ عَ شُنيَ يَشُبَ رَقٍنقٍ فٍرٍ رَ، عَ شَ دُبّ سْتْقٍ شَ قٍ رَ عٍ بَبَ رَ. عٍسَيُ نَشَ عَ قَلَ عَ بْحّ مَ، «ﭑ بَبَ شَ حْنقٍ نَ بَ عَ رَ تّمُي نَشّ، ﭑ يَشُبَ قَشَمَ نّ.»

42 رٍبٍكَ تٌ بَرَ عَ شَ دِ سِنفٍ عٍسَيُ شَ نَتّ تٌنفٌشِ كٌلٌن، عَ نَشَ عَ شَ دِ قِرِن ندٍ يَشُبَ شِلِ. عَ نَشَ عَ قَلَ عَ بّ، «عِ بَرَ عَ تٌ، عِ تَارَ عٍسَيُ وَ مَ عَ فبٍحْشْقٍ عِ مَ، عَ شَ عِ قَشَ.

43 يَكْسِ ﭑ مَ دِ، عِ تُلِ مَتِ ﭑ نَ عَ قَنيِ رَ. كٍلِ بٍ، عِ شَ سِفَ شَرَنِ، ﭑ تَارَ لَبَن شْنيِ. عِ شَ سَ لُ نَا.

44 عِ شَ لُ عَ شْنيِ يِ سَشَنيِ هَن بٍيمَنُ عِ تَارَ بْحّ قَمَ فٌرٌدٍ تّمُي نَشّ.

45 عِ تَارَ بْحّ نَ فٌرٌ عِ مَ تّمُي نَشَن مَ، عَ نَ نّيمُ عِ رَبَ قْشِ رَ، نَ تّمُي ﭑ نَن حُنفُمَ عِ شَ قَ. ﭑ مُ وَ مَ فَنقٍ وٌ قِرِنيِ بِرِن نَ لْشْي كٍرٍن.»

46 رٍبٍكَ نَشَ عَ قَلَ عِسِيَفَ بّ، «ﭑ بْحّ بَرَ رَحَاشُ ﭑ مَ شِتِ شَ دِ فِنّيٍ شَ قٍ رَ. شَ عَ سَ لِ يَشُبَ قَن فِنّ تٌنفٌ عٍ يَ مَ يِ بْشِ مَ، نَ تّمُي تِدٍ يٌ مُ نَ ﭑ تَن مَ قٍ مَ سْنْن.»