Zephaniah 2 in Sunwar

1 मिनु मेकोमी “गे मुने मपाइश्‍शो रागी ङा मुर, गे नेल्‍ल काथा बुक्‍कीन।

2 इन नाक्‍त फशेम बेरशो भूस खोदेंशो पा लाक्‍नीम। आ योव़शो नाक्‍त जाक्‍चा, परमप्रभु यावे आ शुश गाइश्‍शो इन तार जुक्‍चा नु परमप्रभु यावे आ गाइश्‍शो नाक्‍त जाक्‍चा क्‍येङा ङोंइती,

3 गे रागी ङा परमप्रभु यावे आ ङोंइती ठीक पाइब नु ब्रेम्‍शो मुरपुकी परमप्रभु यावे कली मालीन। गे ठीक पाइब नु ब्रेम्‍शो थुं पाइश्‍शो दुम्‍चा मालीन। मिनु परमप्रभु यावेमी आ गाइश्‍शो नाक्‍त इन कली ख्रुइक्‍बा कों? आमोस ५:१५

4 गाजा मुर मबाक्‍थु, श्‍येत्‍थ दुम्‍ब। अश्‍कलोन नेल्‍ल ब्रेश्‍शा खतम दुम्‍शा प्रोंइसीब। नाक्‍ती उइक्‍थ दुम्‍मेनु अश्‍‍दोद ङा मुर खेरचा पुंइसीनीम। एक्रोन चहिं तुल्‍चा पुंइसीब।

5 आबी आबी, समुन्‍द्र आ शुंगीम बाक्‍ब केरेथी जात ङा मुर परमप्रभु यावे आ लोव़ इन कली ‘गे पलिस्‍ती आन रागी बाक्‍ब, कनानी, इ कली सुइ मुर मबाक्‍चा ङा पा खतम सेल्‍नुङ’ देंत। १सामुएल ३०:१४; येरमीया ४७:-

6 केरेथी आन बाक्‍तीक समुन्‍द्र आ शुंगी ङा रागी बी ब्‍यफ, क्‍यारश भेडा योव़तीके दुम्‍ब। भेडा गोठला आन बाक्‍तीक दुम्‍ब। मेको आन भेडा मेकेर वोइक्‍नीम।

7 मेको समुन्‍द्र आ शुंगी ङा रागी यहूदा आ खिं ङा लीशो मुर आन के दुम्‍ब। मेकोपुकीमी मेकेर आन बी ब्‍यफ, क्‍यारश भेडा योव़नीम। नाक्‍दो मेकोपुकी अश्‍कलोन आ खिंपुकीम इप्‍नीम। मारदे हना परमप्रभु यावे, आन परमप्रभुमी मेको आन कली कोव़ब। मिनु मेको आन कली ङोंइती खोदेंशो पा रिम्‍शो पा बाक्‍चा गेब” देंत। सेफन्‍याह ३:२०

8 मिनु “गो मोआब नु अम्‍मोनी आन शुक्‍शी पशो नेंता। मेकोपुकीमी आं मुर आन कली मरिम्‍शो पाम्‍तेक्‍म। मेको आन रागी कली ‘खतम पोक्‍नीक’ दे हिंच कोंइताक्‍म। येरमीया ४८:-; येरमीया ४९:१-६

9 मोपतीके मुर नेल्‍ल आन परमप्रभु यावे, इस्राएली आन परमप्रभुमी ‘गो ब्रोंइशा बाक्‍शो खोदेंशो पा, मोआब सोदोम खोदेंशो नु अम्‍मोन गोमोररा खोदेंशो दुम्‍ब। मेको आन बाक्‍तीके चूले वाशो नु हिक्‍सी खाल्‍टा बाक्‍शो रागी दुम्‍ब। मेको गेना हना यो मुर मबाक्‍तीक रागी दुम्‍ब। आं लीशो मुरपुकीमी मेको आन मार मार रोइक्‍नीम। मिनु आं रागी ङा ब्रोंइशो मुरपुकीमी मेकेर हुकुम पाइनीम। उत्‍पत्ती १९:२४-२५

10 मेको आन ठेयब लेश्‍शो आ पा ङा मोदेंशो ताइनीम। मारदे हना मेकोपुकीमी मुर नेल्‍ल आन परमप्रभु यावे आ मुर आन कली शुक्‍शी पा आंम कली ठेयब सेल्‍शो बाक्‍नीम।

11 परमप्रभु यावेमी मेको आन कली थम मरिम्‍शो पाइब। रागी ङा देवी देवता नेल्‍ल आन कली खतम पोक्‍ब। नेल्‍ल आन बाक्‍तीकेमी बाक्‍शा, मेको आ ङोंइती बाप्‍चा माल्‍नीम। रागी रागी समुन्‍द्र आ सुंगी नु टापु ङा मुर नेल्‍ल परमप्रभु यावे आ ङोंइती बाप्‍नीम’ देंत।

12 गे एथीयोपीया ङा मुर यो आं तरवारमी साइक्‍चा पुंइसीनीनी” दे परमप्रभु यावेमी देंत। इजीकीएल ३०:९

13 मेकोमी उत्तर गे आ गुइ दिंशा अस्‍सुर कली खतम पोक्‍ब। निनवे कली कोक्‍त नु गोरशो रागी खोदेंशो सेल्‍ब। नहुम १:१

14 मेकेर बी ब्‍यफ नु ब्‍वाकी ङा जन्‍तु नेल्‍ल इप्‍नीम। गोरशो रागी ङा बुक्‍स नु ग्रीब बुक्‍सपुकीम मेको आन थाम तारी ग्‍योव़ सेल्‍नीम। बुक्‍स झेल रे पा ग्रीनीम। खदपुकी लाप्‍चोम ग्रीनीम। मिनु दारपाइक्‍चा कली क्‍येप्‍शो शी नेल्‍ल लां रे तांइसीब। यसैया १३:२१; यसैया ३४:११

15 मेको महिंथु थुं नाइश्‍शा बाक्‍ब सहर मबाक्‍बा ङा? मेकोमी आंम कली “गो गोन नङ। आं क्‍येङा लाक्‍शा अरु सुइ मबाक्‍नीम” देंत। मेको मुल दोदेंशो पा ब्रेश्‍शो दुम्‍मे? मेको ब्‍वाकी ङा जन्‍तु आन बाक्‍तीके दुम्‍त। मेको लां रे पा गाक्‍ब नेल्‍ल मेको तशा आबी, दे हिंशा ख्रिंख्रि पाइनीम। यसैया ४७:८