Zechariah 7 in Sunwar
1 पिप दारामी सासन पशो ४ बर्स, किस्लेव माइश्शो ९ महिना ४ नाक्त परमप्रभु यावेमी जकरिया कली लोव़ पाप्तु।
2 मार लोव़ पाप्तु देंशा हना “बेथेल ङा मुरपुकीमी शरेसेर, रेगेम-मेलेक नु मेकेर ङा मुर आन कली परमप्रभु यावे आ शिशी पुंइचा कली सोइश्शो बाक्तेक्म।
3 मिनु मुर नेल्ल आन परमप्रभु यावे आ खिंमी चढ़ेब नु परमप्रभु यावे आ लोव़ पाइब आन कली ‘गोपुकी मुल सम्म शुश बर्स ङोंइती रे पशो खोदेंशो पा ५ महिनामी रोंका पा माइजा बाक्चा माल्नीकी ङा?’ दे हिल्लो पचा कली सोइश्शो बाक्तेक्म” देंत। जकरिया ८:१९; २राजा २५:८-९; येरमीया ५२:१२-१३
4 मिनु मुर नेल्ल आन परमप्रभु यावेमी मार देंत देंशा हना
5 “रागी ङा मुर नेल्ल नु चढ़ेब आन कली ‘गेपुकीमी मेको ७० बर्स ङा ५ नु ७ महिनामी रोंका पा माइजा बाक्तीनी। मार गे मेको आं पर्बम पनी ङा? यसैया ५८:५
6 मिनु गे जशा, ब्वशा तूतीनी हना, गे आंम इन पर्बम मपाइनीनी ङा?’ देनो” देंत।
7 परमप्रभुमी “यरूसलेममी शुश मुर बाक्शा, एर ओंथ ङा सहर नेल्ल रिम्शो नु सोशो बोशो बाक्मेनु, नेगेब नु पच्छिम ङा शेफेलाह नेल्ल रिम्शो पा बाक्मानु, ङोंइती ङा आं लोव़ पाइबपुकीमी मुर आन कली देंशो परमप्रभु यावे आ पशो लोव़ एकोन ममाइ ङा?” देंत।
8 मिनु परमप्रभु यावेमी लेंशा जकरिया कली लोव़ पाप्तु।
9 मिनु मुर नेल्ल आन परमप्रभु यावेमी मार लोव़ पाप्तु देंशा हना “ठीक पा निसाफ पने, दाक्मुने नु शिशी पमुने, मीका ६:८
10 वोंइश बेक्शो मीश मुर, रोम रोइक्च, अर्को रागी ङा मुर नु प्रुङग आन कली मदिपीन। मरिम्शो पमुचा ममिम्तीन। प्रस्थान २२:२०-२१
11 तन्न मेकोपुकीमी एको लोव़ मनेनेम। काइ मटीब दुम्शा, आन नोफा सुम्तेक्म।
12 मेकोपुकीमी परमप्रभु यावे आ अरेशो नु आ लोव़ मनेंचा ङा पा आन थुं खकटा सेल्तेक्म। ङोंइती मुर नेल्ल आन परमप्रभु यावेमी आ सोक्त रे पा आ अरेशो लोव़ नु मुर आन कली पतीक लोव़ पथ आ लोव़ पाइब आन कली सोइश्शो बाक्त। मोपतीके मुर नेल्ल आन परमप्रभु यावे शुश गाइश्शो बाक्ब। यसैया ४८:४
13 दोपा मेकोपुकीमी आं लोव़ मनेन्मे, मोपा गो यो मेको आन पुंइशो लोव़ मनेंनुङ।
14 मिनु गो मेको आन कली फश गिवारमी खोदेंशो पा आन मतुइश्शो रागी रागीम फ्रातामी। मोपतीके आन प्रोंइशो रागी मुर मबाक्शो दुम्त। मेकेर सुइ मलम। मोदेंशो पा रिम्शो रागी खतम दुम्त” दे मुर नेल्ल आन परमप्रभु यावेमी देंत।