Zechariah 6 in Sunwar
1 मिनु गो लेंशा इर गे कोव़ङुनु आं ङोंइती डांडा आस दाते रे ४ ओटा बग्गी यिशो तातामी। मेको डांडा कांसा के बाक्ताक्स। प्रकाश ६:१-८; जकरिया १:८
2 ङोंइती ङा बग्गी लल शारापुकीमी कीशो बाक्तेक्म। मेको आ नोले ङा बग्गी क्येर शारापुकीमी कीशो बाक्तेक्म।
3 मेको आ नोले ङा बग्गी बुश शारापुकीमी कीशो बाक्तेक्म। मिनु नेल्ल क्येङा नोले ङा बग्गी पाङग्रे शारापुकीमी कीशो बाक्तेक्म। प्रकाश ६:१-८; जकरिया १:८
4 मिनु गो नु लोव़ पाइब, स्वर्ग ङा गेय पाइब कली “आं प्रभु, एको मार नमी?” दे हिल्लो पाता।
5 मिनु मेको परमप्रभु यावे आ स्वर्ग ङा गेय पाइबमी आं कली “एको स्वर्ग ङा ४ ओटा फश नम। एको ग्रूशा लचा कली रागी नेल्ल ङा परमप्रभु यावे आ ङोंइती जाक्तेक्म। जकरिया ४:१४
6 क्येर शारा पाइश्शो बग्गी उत्तर रागी गे लाइब। बुश शारा पाइश्शो बग्गी पच्छिम रागी गे लाइब। पाङग्रे शारा पाइश्शो बग्गी दक्खिन रागी गे लाइब” देंत।
7 मेको शारा ग्रूशा रागी कोव़थ लचा कली चुइश्शो बाक्तेक्म। मिनु मेकोमी “रागी नेल्ल कोव़थ लने” दे अरेप्तु। मिनु मेकोपुकी रागी कोव़थ लाम्तेक्म। जकरिया १:१०
8 मिनु नोले मेकोमी ठेयब सेंदा पा आं कली “कोव़ङो, मेको उत्तर रागी गे लाइबमी आं सोक्त नाइक्पाइक्तेक्म” देंत।
9 मिनु परमप्रभु यावेमी आं कली लोव़ पाप्तु।
10 मार लोव़ पाप्तु देंशा हना “ग्याइश्शा लाइक्चा पुंइसीशो बेबीलोन रे जाक्शो हेल्दाइ तोबीयाह नु येदायाह रे सुन चांदी पोक्को। मिनु मेको नाक्ती सेफन्याह आ तौ योसीयाह आ खिं लावो।
11 मेको सुन नु चांदी रे पा सिरपेच का सेलो। मिनु मेको सिरपेच लाइश्शा, यहो-सादाक आ तौ नेल्ल क्येङा ठेयब चढ़ेब यहोसु आ पियामी गुप्तो। जकरिया ३:८
12 मिनु मेको कली मुर नेल्ल आन परमप्रभु यावेमी मार देंत देंशा हना ‘मेकेर मुर का बाक्ब। मेको आ नें राशी बाक्ब। मेको राशी आ बाक्तीकेमी बारशा, परमप्रभु यावे आ खिं सेल्चा माल्ब।
13 मेकोमीन परमप्रभु यावे आ खिं सेल्चा माल्ब। मेको पिप आ मान तशा, शुश ग्योम्सीशो बाक्ब। मेको आ ठेयब नित्तीकेमी निश्शा सासन पाइब। मेको आ नित्तीकेमी आ ग्युरा गे चढ़ेब का बाक्ब। मेको निक्शी दुशा गारशा गेय पाइनीसी। भजन संग्रह ११०:४
14 मिनु मेको सिरपेच हेल्दाइ, तोबीयाह, येदायाह नु सेफन्याह आ तौ योसीयाह मिम्शा, परमप्रभु यावे आ खिंमी वोइक्चा माल्नीम।
15 शुश ङोन बाक्ब मुरपुकी यो परमप्रभु यावे आ खिं सेल्चा कली वारच पथ जाक्नीम। मिनु गेपुकीमी मुर नेल्ल आन परमप्रभु यावेमी आं कली इन कली लोव़ पथ सोइश्शो बाक्ब, दे तुइक्नीनी। गे इन थुं नेल्लेमी परमप्रभु यावे, इन परमप्रभु आ देंशो टीतीनी हना, मोदेंशो दुम्ब’ ” देंत। यसैया ६०:१०