Zechariah 4 in Sunwar

1 मिनु गो नु लोव़ पाइब, स्‍वर्ग ङा गेय पाइब लेंशा जाक्‍‍त। मेकोमी आं कली मुर कली निन्‍द्रा रे पा पोक्‍शो खोदेंशो पा सेंपाइक्‍ती।

2 मिनु मेकोमी आं कली “गे मार तवी?” दे हिल्‍लो प‍ती। मिनु गो “सुन के बत्ती दातीक ता‍ता। मेको आ तारी बोस का बाक्‍त। मेको तारी ७ ओटा बत्ती बाक्‍तेक्‍म। मेको बत्ती नेल्‍लेमी दातीक सल्‍दो वोइश्‍शो बाक्‍तेक्‍म। येरमीया १:११-१३; आमोस ८:२; प्रस्‍थान २५:३१-४०

3 मिनु मेको आ नेक्‍था तेल रवा निक्‍शी, का ग्‍युरा गे नु का पेरा गे बाक्‍ताक्‍स” देंती।

4 मिनु गो नु लोव़ पाइब, परमप्रभु यावे आ स्‍वर्ग ङा गेय पाइब कली “आं प्रभु, मेको मार नसी?” दे हिल्‍लो पा‍ता।

5 मिनु मेको गो नु लोव़ पाइब, परमप्रभु यावे आ स्‍वर्ग ङा गेय पाइबमी “मेको मार नसी, गे मतुइक्‍नेवे?” देंत। मिनु गो “आं प्रभु, मतुइक्‍नुङ” देंती।

6 मिनु मेकोमी आं कली “एको परमप्रभु यावेमी जेरूब-बाबेल कली पशो लोव़ बाक्‍ब। ‘बोलम ममाइ, सक्तिमी यो ममाइ, तन्‍न आं सोक्‍तीमी पाइनुङ’ दे मुर नेल्‍ल आन परमप्रभु यावेमी देंत।

7 ठेयब डांडा गे मार नवे ङा? जेरूब-बाबेल आ ङोंइती गे दिंम दुम्‍चा माल्‍नेवे। मेकोमी परमप्रभु यावे आ खिं ङा नोले ङा फुल्‍लु वोदानु, मुर नेल्‍लेमी ठेयब सेंदा पा ‘रिम्‍शो दुम्‍त, रिम्‍शो दुम्‍त’ दे ठेयब सेंदा पा देंनीम” देंत। भजन संग्रह १२२:६

8 मिनु परमप्रभु यावेमी आं कली लोव़ पाप्‍तु। मार लोव़ पाप्‍तु देंशा हना

9 “जेरूब-बाबेलमी एको परमप्रभु यावे आ खिं ङा जग फुल्‍लु वोइश्‍शो बाक्‍ब। मिनु मेकोमीन मेको खिं सेल्ने थुम्‍ब। मिनु मुर नेल्‍ल आन परमप्रभु यावेमी आं कली इन कली लोव़ पथ सोइश्‍शो बाक्‍ब, दे तुइक्‍नीनी” देंती। एज्रा ३:८; एज्रा ६:१४-१६; जकरिया २:१३,१५

10 मिनु “सु आइक्‍च गेय गोशो नाक्‍ती आइक्‍च सेल्‍बा? नोले मेकोपुकीमी जेरूब-बाबेल आ गुइमी गारो थाप्‍तीक श्‍येले तशा, ग्‍येरसीनीम। हाग्‍गै २:३; जकरिया ४:७ मेको फुल्‍लु ङा ७ ओटा मिक्‍च परमप्रभु यावे आ मिक्‍च बाक्‍नीम। मेको मिक्‍चीमी रागी नेल्‍ल कोव़शो बाक्नीम” दे परमप्रभु आ लोव़ बाक्‍ब।

11 मिनु नोले गो मेको कली “एको बत्ती दातीक आ ग्‍‍युरा नु पेरा गे बाक्‍शो तेल रवा निक्‍शी मार में?” दे हिल्‍लो पा‍ता।

12 मिनु लेंशा मेको कली “मेको सुन के तेल लुक्‍तीके निक्‍शीमी तेल लुक्ना लुक्‍न प‍शो, एको तेल रवा निक्‍शी आस राशी मार में?” दे हिल्‍लो पा‍ता।

13 मिनु मेकोमी “एको मार बाक्‍बा, दे मतुइक्‍नेवे?” दे हिल्‍लो पती। मिनु गो “आं प्रभु, मतुइक्‍नुङ” देंती।

14 मिनु मेकोमी “मेको रागी नेल्‍ल ङा परमप्रभु यावे आ ङोंइती राप्‍चा कली तेल लुक्‍चा पुंइसीशो बाक्‍नीसी” देंत। जकरिया ६:५; प्रकाश ११:४