Ruth 1 in Sunwar

1 निसाफ पाइबपुकीमी इस्राएली आन कली हुकुम पची ना, अन्‍काल दुम्‍माक्‍त। मोपतीके यहूदा रागी ङा बेथलेहेम रे मुर का, आ मीश नु आ तौ निक्‍शी लाइश्‍शा, मोआबी आन रागीम बाक्‍थ लमाक्‍त। गन्‍ती २५:१-५; १सामुएल २२:३-४

2 मेको मुर आ नें एलीमेलेक बाक्‍माक्‍त। आ मीश आ नें नाओमी नु आ तौ निक्‍शी आस नें का के माहलोन, का के किल्‍योन बाक्‍माक्‍त। मेकोपुकी यहूदा रागी ङा बेथलेहेम एफ्राथाह सहरम बाक्‍शो बाक्‍मा बाक्‍त। मिनु मोआबी आन रागी जाक्‍दीश्‍शा, मेक उइ बाक्‍मा बाक्‍त। उत्‍पत्ती ४८:७; मीका ५:१

3 मिनु नाओमी आ वोंइश एलीमेलेक बेक्‍शा, नाओमी नु आ तौ निक्‍शी प्रोंइचा पुंइसमा बाक्‍त। ब्‍यवस्‍था ७:३; ब्‍यवस्‍था २३:४; नेहेम्‍याह १३:२३

4 मिनु मेको आ तौ निक्‍शीमी मोआबी मीश आल चाक्‍ग्‍से बाक्‍त। का आ नें ओरपा, का आ नें रूथ बाक्‍माक्‍त। मेकोपुकी मेकेर १० बर्स बाक्‍मा बाक्‍त।

5 मिनु माहलोन नु किल्‍योन निम्‍फा बेक्‍सा बाक्‍त। मोपा आ वोंइश नु आ तौ निम्‍फा बेक्‍शा, नाओमी ला लीमाक्‍त।

6 मिनु नोले नाओमी आ चाइमी निक्‍शी नु मोआब रे आ रागी लेत्‍चा चिक्‍ता बाक्‍त। मारदे हना मोआब रागीम बाक्‍मेनु, नाओमीमी “परमप्रभु यावेम आ मुर आन कली मिम्‍शा, मेको आन कली जचा गेप्‍तु” देंशो लोव़ नेना बाक्‍त। २राजा ८:३

7 मिनु मेको आ चाइमी निक्‍शी नु आ बाक्‍तीके रे गाक्‍शा, यहूदा रागी लमा बाक्‍त।

8 मिनु नाओमीमी आ चाइमी निक्‍शी आस कली “इस इस माइत लेतीसे। गे दोपा बेक्‍शो आन कली नु आं कली रिम्‍शो पसी, मोपा परमप्रभु यावेमी इस कली रिम्‍शो पवल।

9 परमप्रभु यावेमी इस कली अर्को वोंइश गेशा, इस थुं नाइश्‍शा बाक्‍चा गेवल” देंमाक्‍त। मिनु आ चाइमी आस कली पुक्‍पु पाइश्‍शा, नेल्‍ल ङाक्‍मा बाक्‍त। रूथ ३:१

10 मिनु आ चाइमी निक्‍शीमी “गो थमा पा इन मुर आन बाक्‍तीके लाइनस्‍कु” देंसा बाक्‍त।

11 मिनु नाओमीमी “आं चाइमी निक्‍शी लेतीसे। मारदे गो नु लचा दाक्‍नीसी? मार, गो इस वोंइश दुम्‍पाइक्‍चा कली तौ थीने चाप्‍नुङा ङा?

12 आं चाइमी निक्‍शी लेतीस। गो खाल्‍पी दुम्‍शा, ग्‍युंबे पने मचाप्‍नुङ। गो आल मिम्‍शा, मुलाक्‍दोन वोंइश नु बाक्‍शा, तौ थिती हना यो, मेको मकोल्‍म सम्‍म

13 रिम्‍शा बाक्‍ने चाप्‍नीसी? मेको आस कली रिम्‍शा, अर्को ग्‍युंबे मपथु बाक्‍नीसी? मदुम्‍ब, आं चाइमी निक्‍शी। मारदे हना इस क्‍येङा गो परमप्रभु यावे आ गुइ रे श्‍येत जाइब बाक्‍ती” देंमाक्‍त।

14 मिनु मेकोपुकी लेंशा ङाक्‍मा बाक्‍त। मेको नोले ओरपामी आ शिमी कली पुक्‍पु पाइश्‍शा वोइश्‍शा, आ मुर आन बाक्‍तीके लेम्‍माक्‍त। रूथ चहिं आ शिमी नुन बाक्‍माक्‍त।

15 मिनु नाओमीमी “नेनो, इ देउरानी आ मुर आन बाक्‍तीके नु आ देवी देवताम लेत्‍त। गे इ देउरानी आ पशो खोदेंशो पावो” देंमाक्‍त।

16 मिनु रूथमी “इन कली प्रोंइपाइश्‍शा, आं कली लेश्‍शा, सोइक्‍चा कली ढिपी मपाइय्‍यीनी। गे ते लाइनीनी, गो यो मेकेन लाइनुङ। गे ते बाक्‍नीनी, गो यो मेकेन बाक्‍नुङ। इन मुरपुकी आं मुर दुम्‍नीम। इन परमप्रभु आं परमप्रभु दुम्‍ब।

17 गे ते बेक्‍नीनी, गो यो मेकेन बेक्‍नुङ। मिनु मेकेन थिम्‍चा पुंइसीनुङ। गो मबेक्‍थु इन कली प्रोंइतन्‍नी हना, परमप्रभु यावेमी सजाइ गेयील” देंमाक्‍त।

18 मिनु नाओमीमी रूथमी आ कली प्रोंइसीन मप्रोंइब, दे तुइश्‍शा, अरु मारेइ मदेंमाक्‍त।

19 मिनु मेको निम्‍फा गाक्‍शा, बेथलेहेम जाक्‍सा बाक्‍त। मिनु बेथलेहेम जाक्‍सानु, सहर ङा मुर नेल्‍लेमी मेको आस पर्बम लोव़ पामे बाक्‍त। मिनु मीश मुरपुकीमी “मार, एको नाओमीन बाक्‍बा?” देंमा बाक्‍त।

20 मिनु नाओमीमी “आं कली नाओमी मदेनीन। मारा देनीन। मारदे हना नेल्‍ल क्‍येङा सक्ति पाइश्‍शो परमप्रभु यावेमी आं कली मरिम्‍शो पाइश्‍शा, श्‍येत जपाइक्‍ती। नाओमी देंशो दारशो रुम्‍सीब, मारा चहिं कशो रुम्‍सीब।

21 गो मारेइ मारेइमी गाप्‍शा लशो नङ। मुल परमप्रभु यावेमी श्‍येत्‍थ लेश्‍शा चाक्‍ती। गे मारदे आं कली नाओमी देंनीनी? नेल्‍ल सक्ति पाइश्‍शो परमप्रभु यावेमी आं कली दोस गेशा, मरिम्‍शो पाइक्‍ती” देंमाक्‍त।

22 मोपा नाओमी नु आ चाइमी मोआबी रूथ मोआब रागी रे बेथलेहेम जाक्‍सा बाक्‍त। मेको बेथलेहेमम जाक्‍सानु, क्‍योव़ज मीशो बाक्‍माक्‍त।