Romans 16 in Sunwar
1 केन्क्रेया ङा थमा सुइक्ब आन ग्रुम्तीक खिंमी गेय पाइब फिबी दिदी आ पर्बम ब्रेक्शो बाक्नुङ।
2 फिबी दिदीमी थमा सुइक्ब शुश आन कली वारच पाप्तु। आं कली यो शुश वारच पाइक्ती। मोपतीके फिबी दिदी कली प्रभु आ नेंमी मान पतीने। मार मार माल्दा, मेको गेशा वारच पतीने।
3 अक्वीला नु प्रिस्कीला साइ गो नु गारशा, ख्रीस्त येसु आ गेय पाम्ताक्से। मेको आस कली “रिम्शो बाक्कीस” देनीन। प्रेरित १८:२; प्रेरित १८:२६
4 मिनु थमा मसुइक्बपुकीमी आं कली खेदा पामेनु, आं कली प्रोंइचा, दे वारच पय्यीसीनु, हेरा साइक्चा पुंइसाक्स। मेको निक्शीमी आं कली प्रोंइशो आ पर्बम परमप्रभु यावे कली “गे रिम्शो पाइब बाक्नीनी” देंनुङ। गो ला ममाइ, नेल्ल रागी रागी ङा थमा सुइक्बपुकीमी यो मेको निक्शी आस पशो मिम्शा, परमप्रभु यावे कली “गे रिम्शो पाइब बाक्नीनी” देंनीम। मोपतीके मेको आस कली “रिम्शो बाक्कीसे” दे मतीने।
5 आस खिंमी देल्ब थमा सुइक्ब नेल्ल आन कली यो “रिम्शो बाक्कीन” दे माइक्चा। आं दाक्शो एपेनेतस कली “रिम्शो बाक्को” दे माइक्चा। एपेनेतस एसीया रागी ङा नेल्ल क्येङा ङोंइती ख्रीस्त कली थमा सुइक्ब बाक्ब।
6 इन कली शुश वारच पाइब मरीयम कली यो “रिम्शो बाक्को” दे माइक्चा।
7 इं यहूदी जात ङा अन्ड्रोनीकस नु युनीयस साइ येसु आ नेंमी गो नु जेल्खानम बाक्शो नसी। आं क्येङा ङोंइती मेको निक्शीमी ख्रीस्त कली थमा सुइक्ताक्से। ख्रीस्त आ सोइश्शो आन दातेमी शुश जोक्ब दुम्ताक्से। मेको आस कली “रिम्शो बाक्कीसे” दे माइक्चा।
8 प्रभु आ नेंम आं दाक्शो अमप्लीआतस कली “रिम्शो बाक्को” दे माइक्चा।
9 गोपुकी नु ख्रीस्त आ गेय पा उरबानस कली “रिम्शो बाक्को” दे माइक्चा। आं दाक्शो स्ताकीस कली “रिम्शो बाक्को” दे माइक्चा।
10 ख्रीस्त कली रिम्शो पा थमा सुइक्ब अपेल्लेस कली “रिम्शो बाक्को” दे माइक्चा। अरीस्तोबलस आ खिं ङा मुर नेल्ल आन कली यो “रिम्शो बाक्कीन” दे माइक्चा।
11 इं यहूदी जात ङा हेरोदीयन कली “रिम्शो बाक्को” दे माइक्चा। नारसीसस आ खिं ङा प्रभु कली थमा सुइक्ब नेल्ल आन कली यो “रिम्शो बाक्कीन” ने माइक्चा।
12 प्रभु आ गेय पाइब त्रिफेना नु त्रिफोसा दिदी आस कली यो “रिम्शो बाक्कीसे” दे माइक्चा। प्रभु आ शुश गेय पाइब आं दाक्शो पेरसीस दिदी कली यो “रिम्शो बाक्को” दे माइक्चा।
13 प्रभुम योव़शो थमा सुइक्ब रुफुस कली “रिम्शो बाक्को” दे माइक्चा। साइ रुफुस आ ममामी आं कली आ तौ खोदेंशो पती। मेको कली यो “रिम्शो बाक्को” दे माइक्चा। मर्कूस १५:२१
14 असीनक्रीतस, फ्लेगन, हेरमेस, पत्रोबास, हेरमेस नु मेकोपुकी नु बाक्ब थमा सुइक्ब लोक्ब नेल्ल आन कली यो “रिम्शो बाक्कीन” दे माइक्चा।
15 फिलोलोगस, युलीया, नेरीयस, नेरीयस आ दिदी, ओलीम्पास नु मेको नेल्ल आन खिंम बाक्ब थमा सुइक्ब आन कली यो “रिम्शो बाक्कीन” दे मतीने।
16 येसु आ नेंमी मुम्मुशा, आसीक गेमुने। एक ङा थमा सुइक्ब नेल्लेमी इन कली “रिम्शो बाक्कीन” देंतेक्म। १कोरिन्थी १६:२०
17 आं लोक्बपुकी, एको नेल्ल क्येङा नोले ङा लोव़ पशा, अर्ती गेनन्नी। कोइ मुरुमी ख्रीस्त आ लोव़ नेंशा, दूली मिम्ताक्म। मेको मुरपुकीमी मुल सम्म दुशा गारशा बाक्शो थमा सुइक्ब लोक्ब इन कली फ्राचा माल्नीम। मेको आन क्येङा होस पा बाक्कीन। मत्ती ७:१५; २थिस्सलोनिकी ३:६; तीतस ३:१०
18 मेकोपुकीमी येसु ख्रीस्त आ गेय मपाइनीम। आन कोव़ज प्रिंचा ला मिम्शा, गेय पाइनीम। मिलो शिलो लोव़ पा रिम्शो लोव़ नेंब आन थुं क्याल्नीम। मोदेंशो मुर आन क्येङा होस पा बाक्कीन। फिलिप्पी ३:१९; कलस्सी २:४
19 गे शेंतीक लोव़ नेंशा, टीब मुर ननी, दे नेल्लेमी तुइक्ताक्मे। एको नेंशा, गो ग्येरसाक्यी। तन्न रिम्शो गेय मरिम्शो गेय, थमा शेंतीक दूली शेंतीक, थमा नु जोल तुइक्ब दुमीने, देंनुङ। मोपतीके ब्रेक्शा, शुश शेंताक्न्नी। रोमी १:८; १कोरिन्थी १४:२०
20 थुं नाइक्चा गेब परमप्रभु यावेमी रीब पा सैतान कली इन खोइल आगाम वोइक्ब। इं प्रभु येसु ख्रीस्तमी इन कली शिशी पवल।
21 गो नु गेय पाइब तिमोथीमी इन कली “रिम्शो बाक्कीन” देंत। यहूदी जात ङा लुसीयस, यासोन, सोसीपाटर सांफामी यो इन कली “रिम्शो बाक्कीन” देंतेक्म। प्रेरित १६:१-३; प्रेरित १९:२२; फिलिप्पी २:१९-२२; प्रेरित १७:६; प्रेरित २०:४
22 पावलमी अरेशा ब्रेक्पाइश्शो एको चिठी ब्रेक्ब गो तेरतीयस नङ। मिनु प्रभु आ नेंमी गो यो इन कली “रिम्शो बाक्कीन” दे ब्रेक्ताक्ङ।
23 गोम चिठी ब्रेक्पदुनु, गायस आं खिंमी बाक्तक। मिनु गायस नु आ खिंमी देल्ब थमा सुइक्बपुकीमी यो इन कली “रिम्शो बाक्कीन” दे माइक्चा देंतेक्म। इरास्तस माइश्शो सरकार आ गेय पाइबमी यो इन कली “रिम्शो बाक्कीन” देंत। थमा सुइक्ब इं लोक्ब क्वारटसमी यो इन कली “रिम्शो बाक्कीन” देंत। १कोरिन्थी १:१४
24 इं प्रभु येसु ख्रीस्त आ शिशी गेपुकी नेल्ल नु बाक्ल। आमेन।
25 परमप्रभु यावेमी इन कली आ ग्येरपाइक्तीक लोव़ नु येसु ख्रीस्त आ पर्बम शेंतीक नेंशा, बोल्यो पा थमा सुइक्ब सेल्ने चाप्ब, दे तुइक्ताक्ङ। मोपा साइ ङा ख्रुइश्शो लोव़ नेल्ल तुइक्पाइश्शो बाक्ब। १कोरिन्थी २:७; एफिसी १:९; एफिसी ३:४-९
26 परमप्रभु यावे आ लोव़ पाइबपुकीम मेको ख्रुइश्शो लोव़ ब्रेक्शो बाक्तेक्म। मेको गेना हना यो बाक्ब परमप्रभु यावे आ दाक्शो बाक्ब। मेको लोव़ रागी रागी ङा मुर आन कली तुइक्पाइश्शा थमा सुइक्ब सेल्चा कली बाक्त।
27 आ का ला बाक्शो मारेइ मारेइ तुइक्ब परमप्रभु यावे कली येसु ख्रीस्त रे पा गेना हना यो नेल्ल सक्ति नु ठेयब दुम्तीके बाक्ल। आमेन। रोमी १:५