Romans 1 in Sunwar

1 गो ख्रीस्‍त येसु आ वाइल पावल नङ। आ सोइश्‍शो दुम्‍शा, परमप्रभु यावेमी आ ग्‍येरपाइक्‍ब लोव़ तुइक्‍पाइक्‍चा कली योव़चा पुंइसाक्‍यी। प्रेरित ९:१५; प्रेरित १३:२; गलाती १:१५

2 मेको लोव़ साइ नेसी रे परमप्रभु यावे आ लोव़ पाइबपुकीमी ब्रेक्‍शो बाक्‍मा बाक्‍त। रोमी १६:२५-२६; लूका १:७०; तीतस १:२

3 येसु ख्रीस्‍त पिप दाऊद आ थरमी मुर दुम्‍शा, जरमेशो बाक्‍माक्‍त। रोमी ९:५; २सामुएल ७:१२; मत्ती २२:४२

4 तन्‍न मुर ला ममाइ। परमप्रभु यावे आ तौ यो बाक्‍ब। “आं तौ बाक्‍ब” दे तुइक्‍पाइक्‍चा कली परमप्रभु यावेमी आ सोक्‍त आ सक्तिम येसु ख्रीस्‍त कली बेक्‍शो रे सेंताक्‍व। मत्ती २८:१८; प्रेरित १३:३३

5 मिनु येसु ख्रीस्‍तमी नेल्‍ल अर्को रागी ङा मुर आन कली आ लोव़ तुइक्‍पाइक्‍चा कली शिशी पा योव़ती। मुरपुकीमी येसु ख्रीस्‍त आ लोव़ टीमेक्‍ल देंशा, शेंथ सोइक्‍ताक्‍यी। रोमी १५:१८; प्रेरित २६:१६-१८; गलाती २,७,९

6 इन कली यो येसु ख्रीस्‍तमी “आं मुर दुम्‍मल” दे योव़तु।

7 गे योव़चा पुंइसीशा, परमप्रभु यावे आ दाक्‍शो रोम सहरम बाक्‍बपुकी इन कली एको लोव़ ब्रेक्‍ताक्‍ङ। इं आफ परमप्रभु यावे नु प्रभु येसु ख्रीस्‍तम इन कली शिशी पा इन थुं नाइश्‍शा बाक्‍चा गेम्‍सेक्‍ल। १कोरिन्‍थी १:२; २कोरिन्‍थी १:१-२; एफिसी १:१; गन्‍ती ६:२४-२६

8 गेपुकीमी येसु ख्रीस्‍त कली थमा सुइश्‍शो नेल्‍लेमी तुइक्‍नीम। मिनु गो आं परमप्रभु यावे कली “रोम सहरम बाक्‍ब आन कली रिम्‍शो पाइतीनी” दे ठेयब सेल्‍नुङ। रोमी १६:१९

9 मिनु गो परमप्रभु यावे आ सांकछी बाक्‍ब। गो गेय पना पान नु आ तौ आ ग्‍येरपाइक्‍ब लोव़ शेंना शेंन बाक्‍नङ। गो इन पर्बम परमप्रभु यावे कली पुंइना पुंइन बाक्‍नुङ, मेको थमा बाक्‍ब। एफिसी १:१६

10 मिनु परमप्रभु यावे आ दाक्‍तीकेमी “गो रोम सहरम बाक्‍ब थमा सुइक्‍ब आन कली रीब पा ग्रुम्‍पाइय्‍यीनी” दे यो पुंइना पुंइन बाक्‍नुङ। रोमी १५:२३,३२; प्रेरित १९:२१

11 मारदे हना इन थमा सुइक्‍तीक थुं बारपा बोल्‍यो सेलु, दे इन कली ग्रुम ग्रुम दाक्‍ती। रोमी १५:२९

12 मिनु मोपा आं थमा सुइश्‍शोमी इन कली नु इन थमा सुइश्‍शोमी आं कली नेल्‍ल इं थुं बारपदल, दे मिम्‍ताक्‍ङ। २पत्रुस १:१

13 आं लोक्‍बपुकी, गो शुश खेयप “रोम सहर पिङ” देंती, तन्‍न मुल सम्‍म पिने मचबु। अर्को रागी ङा मुर आन कली येसु ख्रीस्‍त आ लोव़ शेंना शेंन गाक्‍ती। मेको लोव़ शेंदुनु, शुशेम थमा सुइक्‍तेक्‍म। गेपुकी नु यो बाक्‍शा, येसु ख्रीस्‍त आ लोव़ पचा दाक्‍नुङ। मो पङानु, का निक्‍शी थमा मसुइक्‍बमी यो थमा सुदमेक्‍ल, थमा सुइक्‍ब आन थुं बारल, दे मिम्‍नुङ।

14 मारदे हना ग्रीक नु अर्को रागी ङा, जोक्‍ब नु मजोक्‍ब, पढेशो मपढेशो, नेल्‍ल आन कली येसु ख्रीस्‍त आ लोव़ शेंचान माल्‍नुङ।

15 मोपतीके रोमम बाक्‍ब इन कली यो ग्‍येरपाइक्‍ब लोव़ शेंचा माल्‍ती।

16 ग्‍येरपाइक्‍तीक लोव़ शेंना शेंन गाक्‍ङानु, मुने मपथु, शेंनुङ। मारदे हना मेको लोव़मी परमप्रभु यावे पाप रे प्रोंइतीक सक्ति बाक्‍ब। मेको लोव़ ङोंइती यहूदी आन कली तुइक्‍पाइश्‍शो बाक्‍माक्‍त। नोले ग्रीक आन कली यो तुइक्‍पाइश्‍शो बाक्‍माक्‍त। भजन संग्रह ११९:४६; २तिमोथी १:८; १कोरिन्‍थी १:१८,२४

17 परमप्रभु यावेमी मुर आन कली दोपा ठीक दुम्‍पाइक्‍बा, मेको आ लोव़ रे पा तुंइ‍सीब। मिनु “ठीक पाइब आं कली थमा सुइश्‍शा ब्रोंइब” दे ब्रेक्‍शो बाक्‍ब। हबकुक २:४; रोमी ३:२१-२२; गलाती ३:११

18 मुरपुकीमी “थमा माइश्‍शो सु बाक्‍मे?” दे तुइक्‍चा मदाक्‍थु, मरिम्‍शो थुं पाइश्‍शो दुम्‍शा, मरिम्‍शो गेय पाम्‍तेक्‍म। मुर आन कली मोदेंशो पशो तशा, परमप्रभु यावेम आ गाइश्‍शो कोंइताक्‍व।

19 मारदे हना परमप्रभु यावे आ पर्बम मार तुइक्‍ने चाप्‍नीमी, मेको परमप्रभु यावेमी कोंइशो बाक्‍त। प्रेरित १४:१५-१७; प्रेरित १७:२४-२८

20 मिनु रागी सेल्‍चा रे मतांइसीशो नु गेना हना यो सक्ति पाइश्‍शो परमप्रभु यावे आ सरीङ नु रागीमी सेल्‍शो मार मार रे तुंइसीब। मोपतीके मेकोपुकीम मतुइक्‍तक देंशा, माफ पुंइने मचाप्‍नीम। भजन संग्रह १९:२; हिब्रू ११:३

21 परमप्रभु यावे नेल्‍ल क्‍येङा ठेयब बाक्‍ब, दे तुइश्‍शा यो ठेयब मसेलेम। परमप्रभु यावे कली “गे रिम्‍शो पाइतीनी” दे यो मदेंम। तन्‍न आन मिम्‍तीकेमी दूली पना पन बाक्‍तेक्‍म। मिनु आन मरुप्‍ब थुं क्‍येङा मरुप्‍ब दुम्‍त। एफिसी ४:१८

22 मजोक्‍थु यो ठेयब लेश्‍शा बोरशा “गो शुश जोक्‍ब ठेयब नकी” देंतेक्‍म। मोपा मूर्ख दुम्‍तेक्‍म। १कोरिन्‍थी १:२०

23 मेकोपुकीम गेना हना यो बाक्‍ब परमप्रभु यावे आ छेङछेङ कली बेक्‍शा लाइब मुर, चिक्‍ब, जन्‍तु नु ग्रेशा गाक्‍ब जन्‍तु आन मूर्ति नु फाइक्‍तेक्‍म। प्रस्‍थान २०:४; ब्‍यवस्‍था ४:१५-१९; भजन संग्रह १०६; येरमीया २:११

24 मिनु परमप्रभु यावेमी मो पशो तशा, मेको आन कली प्रोंइतु। मिनु आन थुंमी मरिम्‍शो मिम्‍शा, ग्रांग्रा दिचा ङा गेय पशा बिग्रेपमुम्‍तेक्‍म। प्रेरित १४:१६

25 मेकोपुकीमी परमप्रभु यावे आ थमा लोव़ कली जोल सेल्‍तेक्‍म। नेल्‍ल सेल्‍ब परमप्रभु यावे क्‍येङा आ सेल्‍शो मुर आन कली ठेयब सेल्‍तेक्‍म। गोपुकीमी मारेइ मारेइ सेल्‍ब परमप्रभु यावे कली गेना हना यो ठेयब सेल्‍य, आमेन।

26 मोपतीके परमप्रभु यावेमी मेको आन कली आन मिम्‍शो ग्रांग्रा दिचा ङा गेय पपाइक्‍चा कली प्रोंइतु। मेको आन मीशेमी यो मगारचा ङा ग्रांग्रा दिचा ङा गेय पाम्‍तेक्‍म।

27 मेकोपुकी वोंइश मुर नु मीश मुर ब्‍वांइ‍सीचा प्रोंइशा, वोंइश मुर नु वोंइश मुर ब्‍वांइ‍साक्‍म। मोदेंशो मरिम्‍शो गेय पतीके आन सजाइ ताम्‍तेक्‍म। लेवी १८:२२; लेवी २०:१३; १कोरिन्‍थी ६:९

28 आन थुंमी “परमप्रभु यावे कली तुइक्‍चा ममाल्‍ब” दे मिम्‍ताक्‍म। मोपतीके परमप्रभु यावेमी मेको आन कली आन मरिम्‍शो मिम्‍शो पचा गेशा, प्रोंइतु।

29 मिनु आन थुं पापम ब्रीशो दुम्‍तेक्‍म। मिनु मार पाम्‍तेक्‍म देंशा हना, मारेइ मारेइ मरिम्‍शो ला पमुम्‍तेक्‍म, शिंम दुम्‍तेक्‍म, थुं चोमुम्‍तेक्‍मे, रुश पमुम्‍तेक्‍मे, मुर साइक्‍तेक्‍मे, जिम्‍तेक्‍मे, जोल पाम्‍तेक्‍मे, ख्रुइश्‍शा मुर आन लोव़ पाम्‍तेक्‍म।

30 मुर आन कली शुक्‍शी पाम्‍तेक्‍मे, परमप्रभु यावे कली काइ मदाक्‍थु, आइक्‍च सेल्‍‍तेक्‍मे, शुश तुम्‍मुम्‍तेक्‍मे, ठेयब लेत्‍तेक्‍मे, बोरतेक्‍मे। मारेइ मारेइ मरिम्‍शो पचा ला मिम्‍ताक्‍मे, आम आफ कली मटीमे,

31 बी ब्‍यफ खोदेंशो दुम्‍तेक्‍मे, देंशो लोव़ मखबेमे, अरु आन कली वारच मपामे, सुइ आन कली मदाक्‍तमे, शिशी यो मपामे।

32 परमप्रभु यावे आ निसाफ पतीक लोव़ तुइश्‍शा यो मोदेंशो मरिम्‍शो पना पन गाक्‍तेक्‍म। अरु आन कली आन खोदेंशो मरिम्‍शो पशो तशा “रिम्‍शो दुम्‍त” दे ग्‍येरसाक्‍म।