Revelation 9 in Sunwar

1 मिनु लीशो ३ जना परमप्रभु यावे आ स्‍वर्ग ङा गेय पाइब कामी तुराही ताप्‍तु। मिनु गोमी सोरुल का सरीङ रे दोक्‍शो ताता। मेको सोरुलमी ठेयब दुइश्‍शो, पुं मपाइश्‍शो ढोडोङगा ङा लाप्‍चो रोक्‍तीके सांचो ताक्‍तु।

2 मिनु मेकोमी ठेयब दुइश्‍शो पुं मपाइश्‍शो ढोडोङगा ङा लाप्‍चो रोक्‍गानु, कुन ग्रूत। मेको कुन ठेयब मी आ कुन खोदेंब तांइसाक्‍व। मेको कुन ग्रूमेनु, नां नु सरीङ छिङछिङ दुम्‍त। योएल २:२,१०

3 मिनु मेको कुन रे माले खोदेंशो रागीमी ग्रूतेक्‍म। मेको आन सक्ति रागी ङा बिच्‍छी आन के खोदेंशो बाक्‍त।

4 मिनु मेको आन कली “मेको रागी ङा घांस नु रवा ङा सफा मबिग्रेने, परमप्रभु यावे आ छाप कुप्‍फीमी मथोक्‍शो मुर आन कली ला श्‍येत गेने। प्रकाश ७:३

5 मिनु मेको आन कली मसतीन, तन्‍न ५ महिना सम्‍म श्‍येत गेने” देंशो नेंता। मेको श्‍येत चहिं बिच्‍छीमी मुर आन कली क्राइश्‍शो खोदेंशो बाक्‍ब।

6 मिनु मोदेंशो दुम्‍मेनु, मुरपुकी बेक्‍चा दाक्‍नीम। तन्‍न बेक्‍ने मचाप्‍नीम। प्रकाश ६:३६

7 मिनु मेको माले आन रां दोदेंशो तांइसाक्‍म देंशा हना, लडाइ पचा कली ठीक पा वोइश्‍शो शारा खोदेंशो तांइसाक्‍म। मेकोपुकी सुन के सिरपेच खोदेंशो गुप्‍शो बाक्‍तेक्‍म।

8 मेको आन चां मीश मुर आन चां खोदेंशो बाक्‍त। मेको आन ख्रुइ गुप्‍स आन ख्रुइ खोदेंशो बाक्‍त।

9 मेको आन कुचु ङा फेक्‍तीके फलाम के खोदेंशो बाक्‍त। मिनु मेको आन बेरशो रेयके चहिं शुश शारामी बग्‍गी कीशा, लडाइ पथ लशो रेयके खोदेंशो नेंसाक्‍व।

10 मेको आन मीलुमी बिच्‍छी के खोदेंशो फूरो बाक्‍त। मेको आन श्‍येत गेतीके या बाक्‍त। मिनु मुर आन कली ५ महिना सम्‍म श्‍येत गेचा अधिकार तशो बाक्‍तेक्‍म।

11 मेको आन के पिप का बाक्‍त। मेको पिप सु बाक्‍त देंशा हना, दुइश्‍शो, पुं मपाइश्‍शो ढोडोङगा ङा गेय पाइब बाक्‍त। मेको पिप आ नें हिब्रू लोव़मी अब्‍बादोन नु ग्रीक लोव़मी अपोल्‍लीयोन देंनीम। मेको निम्‍फा आस अर्थ चहिं खतम पाइब बाक्‍ब।

12 ङोंइती ङा हिंचा ङा श्‍येत नुप्‍त। मिनु अर्को हिंचा ङा श्‍येत निक्‍शी बाक्‍नीस।

13 मिनु लीशो निक्‍शी परमप्रभु यावे आ स्‍वर्ग ङा गेय पाइब कामी तुराही ताप्‍तु। मिनु गो परमप्रभु यावे आ ङोंइती वोइश्‍शो सुन के सेल्‍शो चढ़ेतीके आ ४ सुर रे सेंदा ग्रूशो नेंता। प्रकाश ८:३; प्रस्‍थान ३९:१-३

14 मेको सेंदामी मेको तुराही ताप्‍ब परमप्रभु यावे आ स्‍वर्ग ङा गेय पाइब कली “युफ्रेटीस माइश्‍शो ठेयब खोला आ नेक्‍थाम पाइश्‍शो ४ जना सैतान आ गेय पाइब आन कली प्रोंइमी” देंशो नेंता। प्रकाश १६:१२

15 मिनु मेको परमप्रभु यावे आ स्‍वर्ग ङा गेय पाइबमी मेको आन कली प्रोंइतु। मेकोपुकी ङोंइती मारदे पाइश्‍शा वोइश्‍शो बाक्‍तेक्‍म देंशा हना, परमप्रभु आ देंशो घन्‍टा, नाक्‍त, महिना नु बर्स नेल्‍ल रागी ङा मुरपुकी भाग सां ङा भाग का साइक्‍चा, दे ठीक पा वोइश्‍शो बाक्‍तेक्‍म। प्रकाश ८:-

16 मिनु गोमी “शारा ङोइश्‍शो लडाइ पाइबपुकी २० करोड बाक्‍नीम” देंशो नेंता।

17 मिनु मेको शारा नु शारा ङोइक्‍बपुकी दोदेंशो तातामी देंशा हना, मेको शारा ङोइक्‍ब आन कुचुमी पीतल के फेक्‍तीके फेक्‍शो तातामी। मेको फेक्‍तीके मी खोदेंशो लल गिम गिम नु हौ ताता। मेको शारा आन पिया गुप्‍स आ पिया खोदेंशो ताता। मिनु आन शोव़ रे मी, कुन नु गन्‍धक ग्रूत।

18 मिनु मेको मी, कुन नु गन्‍धक रे मुरपुकी भाग सां ङा भाग का बेक्‍तेक्‍मे।

19 मिनु मेको शारा आन मीलु चहिं बुस्‍स आ पिया खोदेंशो तांइसाक्‍म। मोपतीके मेको शारा आन बोल शोव़ नु मीलुमी बाक्‍त। मिनु शोव़ नु मीलुमी मुर आन कली श्‍येत गेम्‍तेक्‍म।

20 मिनु मबेक्‍थु लीशो मुरपुकीमी मेको आन मरिम्‍शो पचा मप्रोनेम। मार मरिम्‍शो पाम्‍तेक्‍म देंशा हना, वोल नु देवी देवता आन कली खुम्‍की पा सेउ पाम्‍तेक्‍म। मताइब, मनेंब, मगाक्‍ब सुन, चांदी, कांसा, फुल्‍लु नु शी के सेल्‍शो मूर्ति आन कली खुम्‍की पा सेउ पाम्‍तेक्‍म। प्रकाश १६:९

21 मिनु मेकोपुकीमी मुर साइक्‍चा, टुना मुना पचा, चिन्‍ता बाक्‍चा, तेल्‍लेम पचा नु खुइ पचा मप्रोनेम। मिनु आन थुं यो परमप्रभु यावे गे मलेत्‍तेम।